ARATAIRAA BIBILIA: “O vai . . . te tiahapa i to [te Atua] ra sekene? . . . O te taata haerea piˈo ore, o tei haapao i te parau-tia ra; o tei parau i te parau mau i roto i to ˈna ra aau.”—Salamo 15:1, 2.

TE MAU MAITAI: E haafaufaa te rahiraa i te haerea tia e te hapa ore. Ia faufaahia râ ratou ma te rave i te tahi ohipa tano ore, e itehia to ratou huru mau.

I roto i te ohipa a Raquel, e titau-atoa-hia ia hoo mai i te taoˈa i te mau taiete. Te na ô ra oia: “E tamata vetahi feia hoo taoˈa i te peta ia ˈu. Ia hoo mai au i te reira ia ratou, e faaaufau-rahi-hia ta matou taiete e o vau te fanaˈo i te moni haamâmâraa o te mau taoˈa i hoohia mai. Ua haamanaˈo râ vau i te aˈoraa Bibilia no nia i te haerea tia e aita vau i farii. Ua tiaturi atu â ta ˈu paoti ohipa ia ˈu i to ˈna iteraa i te reira.”

Ahiri Raquel i farii, e moni rahi ta ˈna e noaa mai, no te hoê taime poto râ. Ua ite anaˈe hoi to ˈna paoti i te reira, e tihatihia paha oia e ia imi o ˈna i te tahi atu ohipa, eita e tiaturi-faahou-hia. Hau roa ˈtu â, aita Raquel i hinaaro ia faahapa noa to ˈna aau ia ˈna e ua haafaufaa ïa i te manaˈo haava maitai. Te parau ra te Maseli 22:1: “O te iˈoa maitai tei hau i te taoˈa rahi ra; e te ite-maitai-hia mai i te ario e te auro.”

No to Jessie haerea tia, ua tiaturi-mau-hia o ˈna e e roo maitai to ˈna i te aro o te paoti ohipa. Eaha te mau maitai ta ˈna i fanaˈo? Te tahi tiaraa teitei i roto i te taiete e te parau faatia na ˈna iho e faanaho i ta ˈna ohipa. E taime rahi aˈe ïa to ˈna no ta ˈna vahine, ta ˈna mau tamarii e no te tavini i te Atua.

No te tihepu mai i te feia rave ohipa, e imi vetahi paoti i te mau pǔpǔ taata matauhia no to ratou haerea tia. Ua papai te tahi tia faatere taiete i Philipino i te piha ohipa a te mau Ite no Iehova no te horoa i te ohipa i te mau melo o tera haapaoraa. Ua na ô oia e feia itoito, e haerea tia to ratou e mea haapao maitai atoa i te ohipa. O te Atua râ o Iehova te faahanahanahia, na ˈna hoi i haapii ia tatou ia au ore i te ino e ia hinaaro i te maitai.—Amosa 5:15.