A faataa mai na, ua paari oe ihea?

Ua fanauhia vau i Italia i 1943. Ua paari au e to ˈu mau taeae e tuahine i roto i te tahi oire iti. E taata faaapu e e tamuta to ˈu metua tane. Ua haapii to ˈu na metua ia matou ia riro ei Katolika itoito.

No te aha oe i hinaaro ai e riro ei perepitero?

I to ˈu tamariiraa, mea au roa na ˈu ia faaroo i te mau perepitero i te fare pureraa. Ua faahiahia vau i to ratou mau reo e ta ratou mau peu. No reira vau i hinaaro ai e riro ei perepitero. I te 13raa o to ˈu matahiti, ua afai to ˈu mama ia ˈu i te tahi vahi nohoraa no te mau piahi e faaineinehia ia riro ei perepitero.

Ua haapii anei outou i te Bibilia i roto i tera faaineineraa?

I to ˈu manaˈo, aita. I te 15raa o to ˈu matahiti, ua horoa mai hoê o te mau orometua i te tahi buka no nia i te mau Evanelia o te faatia ra i te oraraa o Iesu e ta ˈna taviniraa. Ehia taime to ˈu taioraa i te reira! I te 18raa o to ˈu matahiti, ua haere au i te haapiiraa teitei i Roma no te mau tia haapaoraa Katolika e tei raro aˈe te reira i te faatereraa a te pâpa. Ua haapii au i te reo Latino, Heleni, te tuatapaparaa o te taata, te philosophia, te ihi feruriraa e te haapiiraa no nia i te Atua. Noa ˈtu e tamau aau matou i te mau irava Bibilia e e faaroo atoa i te taioraa o te reira i te mau Tapati atoa, aita matou i haapii mau i te Bibilia.

Eaha mau na ta oe ohipa a riro ai ei tia faatere?

Na ˈu e tiaau i te mau ohipa atoa. Ua riro atoa râ vau ei orometua no te faataa i te mau faaotiraa ravehia i te piti o te apooraa a te Vaticana.

No te aha oe i feaa ˈi no nia i ta oe haapaoraa?

Ua huru ê au i na ohipa e toru. Ua faaô te ekalesia Katolika i roto i te ohipa poritita. Ua farii noa i te mau peu iino a te pǔpǔ ekalesiatiko, oia atoa a te feia o te paroita. E au ra e mea hape vetahi mau haapiiraa Katolika. Ei hiˈoraa, nafea pai hoê Atua here e nehenehe ai e faautua i te taata e a muri noa ˈtu i muri aˈe i to ˈna poheraa? Nafea te Atua e farii ai i te mau pure faahiti-noa-hia na nia iho e tamau-aau-hia ma te faaohipa i te tahi korona? a

Eaha ïa ta oe i rave?

Ma te taˈi, ua pure au. Ua hoo atoa mai hoê Bibilia Katolika pia-apî-hia na roto i te reo Italia e ua haamata i te taio i te reira. (La Bible de Jérusalem) I te tahi Tapati poipoi, a tatara ˈi au i to ˈu ahu i muri aˈe i te pureraa, haere mai nei e piti Ite no Iehova i te fare o te mau perepitero. Hoê hora hau to matou paraparauraa  no nia i te Bibilia e te mau tapao o te haapaoraa mau.

Eaha to oe manaˈo i tera mau taata?

Mea papu ia faataa i ta ratou mau tiaturiraa e mea aravihi ia faaohipa i te mau irava i roto i te tahi huriraa Bibilia Katolika. Ua faahiahia roa vau ia ratou. I muri aˈe, ua haere mai te tahi atu Ite e farerei ia ˈu, o Mario to ˈna iˈoa. Mea faaoromai e mea itoito mau oia. I te mau Mahana maa atoa, noa ˈtu te ûa e te mahana, e taˈi mai iho â te ôe o te opani i te hora 9 i te poipoi.

Eaha te huru o te tahi atu mau perepitero?

Ua ani au ia ratou ia amui mai i ta mâua mau aparauraa, aita râ hoê aˈe i haafaufaa i te haapiiraa Bibilia. O vau râ, mea au roa ïa na ˈu. Ua haapii au i te mau mea faahiahia mai te tumu e vaiiho ai te Atua ia tupu te ino e te mauiui. Mea maoro hoi to ˈu hinaaroraa ia taa i te reira.

Eaha ta to outou mau taata rahi i rave ia faaea oe i te haapii i te Bibilia?

I 1975, ua haere au e rave rahi taime i Roma no te faaite i to ˈu mau manaˈo. Ua tamata to matou mau taata rahi i te haaferuri ia ˈu, aita râ hoê aˈe i faaohipa i te Bibilia. I te 9 no Tenuare 1976, ua papai au i to Roma no te faaite no ˈu e e ere faahou vau i te Katolika. E piti mahana i muri aˈe, ua faarue au i te fare perepitero e ua rave i te tahi pereoo auahi no te haere i te tairururaa. E rave rahi amuiraa tei titauhia-manihini-hia e a tahi ra vau e putuputu ai e te mau Ite no Iehova. I ǒ, mea taa ê roa i ta ˈu i matau i te ite. E apee te mau Ite atoa i te taioraa o te mau irava Bibilia a faaroo noa ˈi i te mau oreroraa parau no nia i te mau tumu parau e rave rau.

Eaha te huru o to oe fetii?

Ua patoi uˈana mai te rahiraa o ratou ia ˈu. Ua faaroo râ vau ua haapii hoê o to ˈu mau taeae e te mau Ite i Lombardie, te tahi oire i te pae apatoerau i Italia. Ua haere au e farerei ia ˈna e ua tauturu mai te mau Ite o tera vahi ia imi i te ohipa e hoê nohoraa. I tera matahiti au i bapetizohia ˈi ei Ite no Iehova.

Ua tatarahapa anei oe?

Aita roa ˈtu! I teie nei, e taairaa piri mau to ˈu e te Atua. Maoti hoi te Bibilia, eiaha râ te philosophia aore ra te haapaoraa, ua ite au o vai te Atua. E nehenehe atoa vau e haapii ia vetahi ê ma te papu e te haavare ore.