I te matahiti i muri aˈe, ua anihia te rima tauturu no te haere e tavini i te amaa no Afirika apatoa, e matini neneiraa apî hoi ta ratou. Ua tapao ïa vau i to ˈu iˈoa. Ua oaoa roa vau i te maitiraahia vau e e toru atu â taeae. Te vai ra o Dennis Leech, Bill McLellan e o Ken Nordin. Ua faaarahia mai matou, ua reva anaˈe matou, aita e titeti no te hoˈi mai!

Niuniu atura vau i to ˈu mama no te faaite atu te reva ra vau i Afirika apatoa! Aita o ˈna i faarahi i te parau. Ua ite râ vau e turu mai o ˈna i ta ˈu faaotiraa, e faaroo rahi hoi to ˈna e mea here na ˈna ia Iehova. Ua ite to ˈu papa e to ˈu mama e mihi raua ia ˈu, noa ˈtu râ, ua vaiiho raua ia ˈu ia haere.

I te Betela o Brooklyn, e toru avaˈe to matou faaineineraahia i nia i te tahi mau matini neneiraa. E faareva ˈtura matou i Afirika na nia i te pahi. E 20 matahiti ïa to ˈu i tera taime. I te taeraa matou i te oire o Cap, rave atura matou i te pereoo au auahi i te po no te haere i Johannesbourg. I te aahiata, ua tapea matou i te hoê oire iti i te medebara o Karoo. Mea veavea e mea mǎrô tera vahi. Hiˈo atura matou na rapae ma te feruri eaha râ te huru o te oraraa i tera vahi. E ia hoˈi atu matou na ǒ tau matahiti i muri mai, e ite matou i te nehenehe o tera mau vahi e te huru oraraa au mau.

Ua ohipa vau tau matahiti i nia i te matini neneiraa parauhia linotype. E nenei au i Te Pare Tiairaa e te A ara mai na! E nenei te amaa i te mau vea na roto e rave rahi reo e paraparauhia i Afirika. Eita noa ïa te amaa e haapao i te tuhaa fenua no Afirika apatoa, e rave rahi atoa râ fenua i te pae apatoerau o Afirika. Ua oaoa roa matou ua faaohipa maitaihia teie matini neneiraa apî!

I muri mai, ua ohipa vau i roto i te hoê tuhaa e haapao ra i te neneiraa, te haponoraa e te ohipa huriraa. Mea oaoa roa to ˈu oraraa!

I 1968, ua faaipoipo vau ia Laura Bowen, te hoê pionie e ohipa atoa ra i te tuhaa huriraa i te Betela. I tera ra tau, aita te feia faaipoipo-apî-hia e faaea i te Betela, ua tauihia ïa ta mâua taviniraa. Ua riro mai mâua ei pionie taa ê. Ua haapeapea rii au i te mea ua tavini au 10 matahiti i te Betela e aita vau i haapeapea noa ˈˈe no te maa e te nohoraa. E nafea mâua? E horoa mai te Betela na mâua tataitahi 25 moni Afirika, piri ïa i te 12 000 moni farane. E titauhia râ ia naea ta mâua hora pororaa, te mau hoˈi-faahou-raa e farerei e te mau papai ta mâua e vaiiho atu i te taata. I tera moni, e aufau mâua i to mâua fare, te maa, to mâua faurao e te tahi atu mau haamâuˈaraa.

Ua tonohia mâua i roto i te hoê pǔpǔ i pihai iho i te oire o Durban. Mea rahi te taata no Initia. Piri i te matahiti 1875, ua haere mai to ratou mau tupuna i Afirika no te ohipa i roto i te tihota. I teie mahana, e ohipa ê ta ratou e te vai noa ra ta ratou mau peu tumu e ta ratou maa aminamina. I te mea e paraparau ratou na roto i te reo Beretane, mea ohie ïa no mâua ia poro atu ia ratou.

E titauhia i te mau pionie taa ê ia poro 150 hora i te mau avaˈe atoa. Ua faanaho ïa mâua Laura no te poro e ono hora i te mahana matamua. Mea veavea roa, aita ta mâua e haapiiraa Bibilia e aita atoa e hoˈi-faahou-raa e farerei. Ua poro noa ïa mâua i tera e tera fare. A poro noa ˈi mâua, hiˈo atura vau i ta ˈu uati, e 40 minuti noa tei mairi!

I muri mai râ, ua faanaho maitai mâua ta mâua porotarama. I te mau mahana atoa e faaineine mâua ta mâua maa. Ia hinaaro mâua e faafaaea rii, e tapea mâua i to mâua pereoo i raro aˈe i te hoê tumu raau marumaru. I te tahi taime, e haere mai te mau tamarii Initia na pihai iho a mataitai noa mai ai ia mâua. E tau mahana i muri iho, aita mâua i taio faahou i te hora, mea tere te hora!

Ua oaoa roa mâua i te haapii i te parau mau i te feia aau farii i roto i tera tuhaa fenua. E feia mǎrû e te faatura roa te feia no Initia e te tiaturi ra ratou i te Atua. Mea rahi tei farii i te poroi. Mea au na ratou e haapii no nia ia Iehova e ia Iesu, no nia i te Bibilia, te ao apî fafauhia, te hau e te tiaturiraa no te feia pohe. E hoê matahiti i muri aˈe, e 20 haapiiraa Bibilia ta mâua i faatere. I te mau mahana atoa, e faatere mâua i te haapiiraa a faaea roa ˈtu ai no te tamaa e te hoê utuafare. Mea oaoa roa ta mâua taviniraa!

I muri iho, ua tonohia mâua i roto i te tuhaa haaati. I te mau hebedoma atoa, e tere mâua na roto i te mau amuiraa no te faaitoito ia ratou e e faaea mâua i ǒ te mau taeae e tuahine. I tera mau taime, e riro roa mâua ei mero o to ratou utuafare, e hauti mâua e te mau tamarii e te mau animara. E piti matahiti i muri iho, taniuniu mai nei te amaa ia hoˈi e tavini i te Betela. Pahono atura vau: “Ua au roa mâua i te tuhaa haaati!” Noa ˈtu râ, e farii mâua i te mau faaotiraa atoa i ravehia.

I te Betela, ua ohipa vau i roto i te tuhaa no te taviniraa. Ua oaoa roa vau i te tavini i pihai iho e rave rahi taeae paari i te pae varua. I tera ra tau, ia tere te mau tiaau haaati i roto i te mau amuiraa, e papai ratou i te rata na roto i te reo Xhosa, Zoulou e te tahi atu mau reo a hapono atu ai i te amaa. I muri mai, e huri te tahi mau taeae o te tuhaa no te taviniraa i tera mau rata na roto i te reo Beretane. E faaineine te amaa i te rata faaitoitoraa i te mau  amuiraa na roto i te reo Beretane a hurihia ˈtu ai i te reira na roto i te mau reo Afirika. Mea itoito mau teie mau taeae! Maoti ratou i taa ˈi ia ˈu te mau fifi ta te mau taeae e tuahine i Afirika e faaruru ra.

I tera ra tau, e faataa-ê-hia te ereere e te popaa. E paraparau e e poro ïa te mau taeae ereere na roto i to ratou iho reo e e apiti atoa ratou i te mau putuputuraa na roto i to ratou iho reo.

I te mea ua tono-noa-hia vau i roto i te mau tuhaa fenua reo Beretane, aita i rahi te feia ereere ta ˈu i matau. I teie nei râ, ua ite au i ta ratou mau peu tumu. Ua ite atoa vau e, te mau fifi ta te mau taeae e faaruru ra, no te mau peu e tiaturiraa ïa a te tahi atu mau haapaoraa. Mea itoito roa to tatou mau taeae i ǒ! Ua faarue ratou i tera mau peu tumu noa ˈtu te haavîraa uˈana a te fetii e te feia tapiri. I te tahi atu mau vahi, mea veve roa te taata. Mea rahi tei ore i haere i te haapiiraa, mea faatura roa râ ratou i te Bibilia.

Ua ohipa atoa vau i roto i te tuhaa e turu ra i te tiaraa amui ore e te tiamâraa i te pae o te haamoriraa. Mea putapû mau ia ite i te taiva ore e te itoito o te mau tamarii Ite no Iehova tei tuuhia i rapae i te haapiiraa no te mea aita ratou i apiti atu i te mau pure e te mau himene aiˈa.

E fifi ê atoa ta te mau taeae no Swaziland (parauhia i teie mahana Eswatini) i faaruru. I te poheraa te arii Sobhuza II, ua titauhia i te huiraatira taatoa ia apiti atu i te mau peu e ravehia ia pohe te hoê taata. E hahu te mau tane i to ratou rouru e e tâpû haapoto roa te mau vahine i to ratou rouru. Mea rahi te taeae e tuahine tei hamani-ino-hia no te mea aita ratou i hinaaro e rave i tera mau peu. Ua putapû roa matou i to ratou taiva ore ia Iehova.

I 1981, ua hoˈi au i te vahi neneiraa. I to ˈu iteraa i te mau raveraa apî, ua faahiahia roa vau, auê ïa tauiraa rahi! Ua horoahia mai te hoê matini neneiraa ia tamata matou.  E i muri iho, ua hoo mai matou e pae matini mai tera no te mono i na iva matini neneiraa linotype na te amaa. Ua matara atoa mai te tahi atu vahi neneiraa. Mea tere te ohipa!

I te omuaraa, e maha matou taeae no Kanada tei tonohia mai no te ohipa i nia i te matini linotype rarahi e te taere ia tere. Maoti râ te ravea roro uira MEPS, ua maitai atu â ta matou ohipa. (Isa. 60:17) I teie mahana, ua faaipoipo matou e maha tuahine pionie, paari i te pae varua o te here mau ra ia Iehova. Te tavini noa ra mâua Bill i te Betela. Area Ken e o Dennis, ua fanau ïa raua i te tamarii.

Mea rahi te ohipa i ravehia i te amaa. Ua hurihia e ua neneihia te mau papai na roto e rave rahi reo e ua haponohia te reira i te tahi atu mau amaa. No te rahi o te ohipa, ua titauhia te hoê Betela apî. Ua patu ïa te mau taeae i te reira i te pae tooa o te râ no Johannesbourg e ua avarihia i 1987. E oaoa iti rahi to ˈu i te apitiraa i tera maraaraa rahi e i te taviniraa e rave rahi matahiti ei mero no te Tomite amaa no Afirika apatoa.

I 2001, ua titau-manihini-hia vau no te tavini i te amaa no Marite. Noa ˈtu mea mauiui ia faarue i to mâua mau hoa i Afirika apatoa, ua oaoa mâua i te revaraa e i te riroraa ei mero o te utuafare o te Betela no Marite.

Ua haapeapea râ mâua no te mea e atea roa mâua i te mama o Laura. No te mea tei New York mâua, eita ïa ta mâua e nehenehe e haapao ia ˈna. Ua parau mai râ na toru tuahine o Laura e na ratou e haapao i to ratou mama. Teie ta ratou i parau: “Eita matou e nehenehe e rave i te taviniraa taime taatoa. Ia haapao matou ia mama, e nehenehe ïa orua e tamau i roto i ta orua taviniraa.” Auê mâua i te mauruuru ia ratou.

I to ˈu nei pae, na to ˈu ïa taeae e ta ˈna vahine i Toronto i haapao ia mama. Ua hau i te 20 matahiti to ˈna raveraa ia mama ia ˈna ra. Te mauruuru nei au i to ˈna haapao-maitai-raa ia mama e tae roa ˈtu i to ˈna poheraa. Auê ïa haamaitairaa rahi teie mau mero utuafare te farii nei i te metua paari i roto i to ratou utuafare noa ˈtu e ere i te mea ohie no ratou!

Ua ohipa vau tau matahiti i te tuhaa e faaineine ra i te mau papai. E faaohipa na matou i te mau ravea apî e tei faaohiehia. I muri mai, ua ohipa atoa vau i te tuhaa hooraa. Auê ïa oaoa rahi i te tavini i te Betela no Marite a 20 matahiti i teie nei. E 5 000 matou mero o te utuafare o te Betela e e 2 000 rima tauturu no rapae mai.

A 60 matahiti i teie nei, aita roa ˈtu vau i manaˈo i reira vau i teie mahana. I tera roaraa matahiti, ua turu noa mai Laura ia ˈu. Auê ïa oraraa faahiahia mau to ˈu! Ua oaoa mâua i te mau huru taviniraa atoa ta mâua i rave. Mea rahi atoa te taata ta mâua i farerei i tera roaraa matahiti. Ua oaoa roa mâua i te ohiparaa e o ratou, oia atoa te mau taeae i roto i te mau amaa e rave rahi ta mâua i tere. I teie nei, e 80 tiahapa matahiti to ˈu. Ua iti mai ta ˈu ohipa, na te mau taeae apî i teie nei e rave i te rahiraa o te ohipa. Ua faaineine-maitai-hia ratou e mea aravihi roa ratou!

Te na ô ra te Salamo 33:12: “E oaoa te nunaa o Iehova to ˈna Atua.” E parau mau roa tera! Auê au i te oaoa i te taviniraa e to ˈu mau taeae e tuahine ei nunaa oaoa no Iehova!