TE PEU HIˈO FETIA: Te tiaturi ra vetahi e no te ite i to ratou ananahi, e titauhia ia hiˈo i te mau fetia. Ei hiˈoraa, ia fanauhia te hoê tamarii, e hiˈopoahia te mau apaparaa fetia no te ite eaha to ˈna oraraa no a muri aˈe. E mataitai aore ra e taio ratou i te mau tohuraa tapao no te ite eaha te tupu no ratou a nehenehe atu ai e ape i te ino.

TE FENG SHUI: Te tiaturi atoa ra vetahi e nehenehe ratou e fanaˈo i te hoê oraraa oaoa maoti te huru i patuhia ˈi to ratou fare. Te na ô ra Lo Wing, a te hoê tane e ora ra i Hong-Kong: “Ua parau mai te hoê taata aravihi i roto i te feng shui, ia tuu vau i te hoê pôro manamana i te hoê vahi taa maitai o ta ˈu fare hooraa taihaa, e moni-rahi-hia vau.”

TE HAAMORIRAA I TE TUPUNA: E tiaturi te tahi atu e ia haamori ratou i to ratou mau tupuna aore ra i te mau atua e rave rau, e paruruhia e e haamaitaihia ratou. Te na ô ra Van, te hoê vahine no Vietnam: “I tiaturi na vau e ia haamori au i to ˈu mau tupuna, e fanaˈo ïa vau i te hoê oraraa maitai i teie nei â e te hoê a muri aˈe papu no ˈu e ta ˈu mau tamarii.”

TE ORA-FAAHOU-RAA I ROTO I TE TINO Ê: E rave rahi te tiaturi nei e ia pohe te hoê taata e ora faahou o ˈna i roto i te hoê tino ê, te tino taata, te tino animara e te vai atu â. E na te mau ohipa ta ratou i rave i roto i to ratou oraraa na mua ˈtu e faaite mai e oraraa oaoa anei ta ratou e fanao aore ra aita.

E rave rahi atoa te tiaturi nei i te mau peu tahutahu mai teie: Te hiˈoraa i te apu rima o te taata, te tohuraa tapao, te faaohiparaa i te iri Ouija^®, te hutiraa i te pere e te vai atu â. Te manaˈo ra ratou na te reira e tauturu ia ratou ia ite eaha to ratou ananahi.

E fanaˈo anei te feia e rave ra i teie mau peu i te hoê oraraa maitai e te hoê a muri aˈe papu?

Teie te hiˈoraa o Hào, te hoê tane e ora ra i Vietnam. Ua tiaturi o ˈna e nehenehe o ˈna e fanaˈo i te hoê oraraa faahiahia maoti te peu hiˈo fetia, te feng shui e te haamoriraa tupuna. Tera iho â anei tei tupu? Te na ô ra Hào: “Ehia moni ta ˈu i pau, ua meumeu roa te tarahu, ua fifihia to ˈu utuafare e ua ahoaho roa vau.”

I tiaturi na Qiuming, te hoê tane no Taïwan i te peu hiˈo fetia, te ora-faahou-raa i roto i te tino ê, te hoê oraraa faataa-aˈena-hia, te feng shui e te haamoriraa tupuna. A hiˈopoa maite ai i teie mau peu, ua parau o ˈna: “Ua taa ia ˈu e aita hoê aˈe tuatiraa i roto i te mau haapiiraa e te mau peu tataitahi. I reira atoa to ˈu iteraa e aita te mau peu hiˈo fetia e horoa i te hoê tohuraa tano. Hoê â huru atoa no te tiaturiraa e ora faahou tatou i roto i te tino ê ia pohe noa ˈtu tatou. E nafea te oraraa i muri mai e maitai atu â ˈi mai te peu eita oe e haamanaˈo i ta oe i rave na mua ˈˈe?”

Mai ta Hào, Qiuming e e rave rahi taata i haapii, aita te tiaturiraa o te hoê oraraa faataa-aˈena-hia, o te ora-faahou-raa i roto i te tino ê, te hiˈo fetia e te haamoriraa i te tupuna e nehenehe e faaite mai eaha to tatou oraraa no a muri aˈe. Te auraa anei ïa aita e ravea ia maitai atu â to tatou oraraa no a muri aˈe?

E rave rahi te manaˈo ra e no te fanaˈo i te hoê a muri aˈe maitai, e titauhia ia haere i te haapiiraa teitei e ia riro ei taata moni. Eaha tei tupu no te feia tei rave i tera faaotiraa?