1. No te aha e tia i te mau Kerisetiano ia riro mai te tumu raau ra te huru? (A hiˈo atoa i te hohoˈa.)

 “IA NEHENEHE te hoê tumu raau e hautiuti rii, eita ïa te reira e fati ia puhi mai te mataˈi.” Hoê â huru no te mau Kerisetiano. Noa ˈtu te mau fifi, e titauhia ia ratou ia vai aifaito noa no te tamau i te tavini ia Iehova ma te oaoa. E nafea ïa? Ma te ore e aueue ia taui to tatou tupuraa e ma te faatura i to vetahi ê manaˈo.

2. E nafea tatou ia taui to tatou tupuraa e eaha ta tatou e hiˈopoa i roto i teie tumu parau haapiiraa?

² Ei tavini no Iehova, e hinaaro tatou e vai aifaito noa, e faaite i te haehaa e te aumihi. I roto i teie tumu parau haapiiraa, e ite tatou mea nafea teie mau huru maitatai i te tautururaa i te tahi mau Kerisetiano ia oaoa noa ˈtu te mau tauiraa rahi ta ratou i faaruru. E ite atoa tatou e nafea teie mau huru maitatai e tauturu ai ia tatou. E hiˈo anaˈe eaha te haapii mai i te hiˈoraa o Iehova raua Iesu, na hiˈoraa maitai roa ˈˈe no te huru au noa.

3. E nafea tatou e papu ai e e huru au noa to Iehova?

³ I roto i te Bibilia, te piihia ra Iehova “te Mato” no te mea eita o ˈna e aueue, e mau papu râ. (Deut. 32:4) E huru au noa atoa to ˈna. Noa ˈtu e tauiui noa te mau tupuraa i roto i teie nei ao, eita Iehova e taui, inaha hoi e faatupu iho â oia i ta ˈna mau parau fafau. I te mea e ua hamani Iehova i te taata ia au i to ˈna huru, e nehenehe atoa ïa tatou e vai hau noa noa ˈtu eaha te tupu. I roto i te Bibilia, e fanaˈo tatou i te aratairaa papu o te tauturu ia tatou  ia rave i te mau faaotiraa maitai i mua i te fifi. Maoti to ˈna hiˈoraa e ta ˈna mau aratairaa, ua haapapu Iehova e ere o ˈna i te mea etaeta.

4. Mea nafea Iehova i te faaiteraa i to ˈna huru au noa? A horoa i te hiˈoraa. (Levitiko 5:7, 11)

⁴ Mea tia roa e te au mau te mau raveraa a Iehova. Ere oia i te mea etaeta i nia i ta ˈna mau tavini. A hiˈo na eaha to Iehova huru i nia i te mau Iseraela. Aita o ˈna i titau i te feia moni e te feia veve ia pûpû i te hoê â tusia, ia pûpû râ te taata tataitahi i te tusia ia au i to ˈna tupuraa.—A taio i te Levitiko 5:7, 11.

5. Mea nafea Iehova i te faaiteraa i te haehaa e te aumihi? A horoa i te hiˈoraa.

⁵ No to ˈna huru au noa, e faaite Iehova i te haehaa e te aumihi. Ei hiˈoraa, ua faaite o ˈna i to ˈna haehaa a opua ˈi oia e haamou i te oire o Sodoma. Na roto i te mau melahi, ua horoa Iehova i te aratairaa ia Lota ia horo ê i te tuhaa fenua mouˈa ra. Ua mǎtaˈu râ Lota e taparu ihora oia ia Iehova ia vaiiho ia ˈna e i to ˈna utuafare ia haere i Zoara, hoê oire nainai ta Iehova i opua e haamou. Ua nehenehe ta Iehova e faahepo ia Lota ia pee noa i ta ˈna aratairaa. Aita râ! Ua farii Iehova i te aniraa a Lota, aita ïa o ˈna i haamou i tera oire mai ta ˈna i opua na. (Gen. 19:18-22) Tau senekele i muri mai, ua faaite Iehova i te aumihi i to Nineve. Ua tono oia i te peropheta Iona no te faaara i to Nineve e e haamou o ˈna i te oire e te feia atoa e ora ra i ǒ. I to ˈna râ iteraa e ua tatarahapa to Nineve, aroha ihora oia e aita ˈtura i haamou ia ratou.—Iona 3:1, 10; 4:10, 11.

6. Mea nafea Iesu i te peeraa i te huru au noa o Iehova? A horoa i te hiˈoraa.

⁶ Ua pee Iesu i te huru au noa o Iehova. Ua tonohia o ˈna i te fenua no te poro “i te mau mamoe tei moˈe o te utuafare o Iseraela.” Ua faaite o ˈna i te huru au noa ma te poro i te mau taata atoa. I te hoê mahana, ua taparuparu te hoê vahine e ere i te Iseraela i ta ˈna tauturu, “ua uruhia [ta ˈna] tamahine e te demoni.” Ma te aumihi, ua faaora Iesu i ta ˈna tamahine. (Mat. 15:21-28) Teie mai te tahi atu hiˈoraa. I to ˈna haamataraa i te poro, ua parau Iesu: “Te taata râ o te haavare e aita oia i ite ia ˈu . . . , e parau atoa vau e aita vau i ite ia ˈna.” (Mat. 10:33) I to Petero râ parauraa e aita oia i ite o vai Iesu, aita roa ˈtu Iesu i na reira atoa ia Petero. Ua taa ia Iesu e ua tatarahapa mau Petero e ua ite atoa o ˈna e e taata taiva ore oia. I to ˈna tia-faahou-raa, ua farerei Iesu ia Petero. I taua taime ra, ua haapapu oia e mea here na ˈna ia Petero e ua faaore i ta ˈna hapa.—Luka 24:33, 34.

7. Ia au i te Philipi 4:5, teihea huru taata ta tatou e hinaaro e riro mai?

⁷ Ua ite tatou i te huru au noa o Iehova raua Iesu. Te titau atoa ra Iehova ia faaite tatou teie huru maitai. (A taio i te  Philipi 4:5.) Te na ô ra te tahi atu huriraa: “Ia noaa i te roo o te hoê taata manaˈo aifaito.” A ui ia oe iho: ‘Ua matauhia anei au ei taata mǎrû, o te faatura ia vetahi ê e o te imi na mua i to ratou maitai? Aore ra ua matauhia vau ei taata etaeta, faaroo ore e te ore e tuu hanoa? E taata anei au o te faahepo ia ravehia te mau mea atoa mai ta ˈu e hinaaro? Aore ra te tâuˈa ra vau i to vetahi ê manaˈo ma te pee i ta ratou mau aˈoraa mai te peu e nehenehe?’ Rahi atu tatou i te faatupu i te huru au noa, rahi atu â ïa tatou i te pee i te hiˈoraa o Iehova raua Iesu. E hiˈo anaˈe e piti tupuraa o te faaite no te aha mea faufaa ia faatupu i te huru au noa: (1) Ia taui to tatou tupuraa (2) ia ore to vetahi ê mau manaˈo e tuati ra i to tatou.

8. Ia taui to tatou tupuraa, eaha te tauturu ia tatou ia faaite i te huru au noa? (A hiˈo atoa i te nota.)

⁸ Ia taui to tatou tupuraa, e titauhia ia tatou ia faaite i te huru au noa. No teie mau tauiraa, e nehenehe tatou e faaruru i te fifi manaˈo-ore-hia mai te maˈi ino mau, te fifi i te pae moni. Aore ra e taui te faanahoraa poritita a fifi atu ai to tatou oraraa. (Koh. 9:11; Kor. 1, 7:31) E nehenehe atoa te mau tauiraa i roto i te faanahonahoraa e tamata i to tatou taiva ore ia Iehova. Noa ˈtu eaha te tupu, e noaa ia tatou ia vai aifaito noa mai te peu e pee tatou i to muri nei mau manaˈo tauturu: (1) a farii i to outou tupuraa, (2) a tiatonu noa i mua, (3) a tapea i te hoê feruriraa maitai e (4) a tauturu ia vetahi ê. b E hiˈo anaˈe mea nafea vetahi o to tatou mau taeae e tuahine i te faufaaraahia a pee ai i teie mau manaˈo tauturu.

9. Eaha ta Emanuele raua Francesca i rave no te faaruru i te tahi mau fifi?

⁹ A farii i to outou tupuraa. Teie te hiˈoraa o Emanuele raua Francesca. Ua tonohia raua ei mitionare i te tahi atu fenua. No haamata noa ˈtura raua i te haapii i te reo e i te haamatau i te mau taeae e tuahine, tupu mai nei te COVID-19. No te mau opanipaniraa, aita raua i nehenehe faahou e farerei tino roa i te amuiraa. Ua pohe taue noa te metua vahine o Francesca e ua hinaaro oia e hoˈi i pihai iho i to ˈna fetii. Aita râ o ˈna i nehenehe. Eaha tei tauturu ia ˈna? A tahi, ua pure Emanuele raua Francesca ia fanaˈo raua i te paari no te faaruru i te fifi i te mahana hoê. Maoti ta ˈna faanahonahoraa, ua pahono Iehova i ta raua mau pure i te taime tano. Ua itoitohia raua a faaroo ai i te uiuiraa manaˈo a te hoê taeae tei parau: “Ia farii oioi tatou i to tatou tupuraa, e oaoa faahou tatou i te tavini ia Iehova e i te tauturu ia vetahi ê.” c A piti, ua haamaitai raua i ta raua huru pororaa na roto i te niuniu e ua haamata atoa i te hoê haapiiraa Bibilia. A toru, ua farii raua i te tauturu e te mau faaitoitoraa a te mau taeae e tuahine o te amuiraa. I te roaraa hoê matahiti, ua hapono te hoê tuahine i te tahi poroi faaitoitoraa na raua e te irava Bibilia i te mau mahana atoa. Ia farii tatou i to tatou tupuraa, e oaoa faahou tatou i te tavini ia Iehova.

10. Eaha ta te hoê tuahine i rave no te farii i te tahi tauiraa rahi?

 ¹⁰ A tiatonu noa i mua, e a tapea i te hoê feruriraa maitai. Ua hepohepo roa Christina, te hoê tuahine no Rumania no te mea ua faaorehia ta ˈna amuiraa reo Beretane. Tera râ, aita o ˈna i tiatonu noa i nia i te reira. Ua haere o ˈna i roto i te hoê amuiraa e paraparauhia te reo Tapone e ua tutava o ˈna i te poro na roto i tera reo. Ua ani oia i te tauturu a te hoê hoa ohipa no te haapii i te reo Tapone ma te faaohipa i te Bibilia e te buka Ia ora oe e a muri noa ˈtu! Ua noaa ïa ia Christina ia haapii maite i tera reo, te mea faufaa roa ˈtu â, ua hinaaro tera vahine e ite atu â no nia i te Bibilia. Ia tiatonu noa tatou i mua e ia tapea tatou i te hoê feruriraa maitai, e haamaitaihia tatou na roto i te hoê ravea aita tatou i manaˈo.

11. Eaha tei tauturu i na hoa faaipoipo ia faaruru i te fifi pae moni?

¹¹ A tauturu ia vetahi ê. Teie te hiˈoraa o te na hoa faaipoipo e ora ra i te hoê vahi ua opanihia ta tatou ohipa. I te hoê mahana, ua tupu te hoê fifi i te pae faanavairaa faufaa i to raua fenua e ua fifihia raua i te pae moni. Eaha ïa ta raua i rave? A tahi, ua faaiti raua i te mau haamâuˈaraa. A piti, ua tiatonu noa raua i nia ia vetahi ê ma te rohi i roto i te pororaa. (Ohi. 20:35) Te na ô ra te tane: “Ua tauturu mai te pororaa ia tiatonu noa i nia i to Iehova hinaaro, eiaha râ i nia i to mâua mau fifi.” Ia taui noa ˈtu to tatou tupuraa, e tia ia tatou ia haamanaˈo e mea faufaa roa ia tamau i te tauturu ia vetahi ê maoti te pororaa.

12. E nafea te hiˈoraa o te aposetolo Paulo e tauturu ai ia tatou ia faatano i ta tatou huru pororaa ia au i te tupuraa o te taata?

¹² Mea faufaa roa ia tapea noa i te huru au noa i roto i te pororaa. No te aha? No te mea e farerei tatou i te mau huru taata atoa, mea taa ê ta ratou mau peu tumu, to ratou manaˈo e to ratou tiaturiraa. E hiˈoraa maitai te aposetolo Paulo no tatou. Ua maiti Iesu ia ˈna ei aposetolo e ua “tonohia ˈtu [o ˈna] i te mau nunaa ěê.” (Roma 11:13) Ua poro o ˈna i te ati Iuda, te Heleni, te feia maramarama, te feia haehaa, te mau tia faatere e te mau arii. Ia putapû te aau o teie mau taata atoa, ua rave Paulo “i te mau mea atoa no te tauturu i te mau huru taata atoa.” (Kor. 1, 9:19-23) Ua feruri maite o ˈna i nia i te tiaturiraa o te taata ta ˈna i poro atu, nohea mai ratou, to ratou huru oraraa e to ratou taˈere. Ua faaite ïa Paulo i te huru au noa a faatano atu ai i ta ˈna e parau ia farii te taata i te poroi o te Bibilia. E nehenehe atoa tatou e haamaitai i ta tatou huru pororaa ma te faaite i te huru au noa e ma te faatano i ta tatou aparauraa ia au i te tupuraa o te taata.

13. Ia au i te Korinetia 1, 8:9, e nafea ia faatura i to vetahi ê manaˈo?

¹³ E faaite atoa tatou i te huru au noa ma te faatura i te manaˈo o vetahi ê. Ei hiˈoraa, mea au roa na te tahi mau tuahine e faauteute i to ratou vaha area te tahi atu, aita ïa. Mea au atoa paha na te tahi mau Kerisetiano e inu tanotano noa i te ava, area te tahi atu, ua faaoti ïa eiaha roa ˈtu. Aita hoê aˈe o tatou e hinaaro ia maˈihia. Ia tupu râ te reira, na tatou tataitahi e maiti i te ravea rapaauraa. Ia manaˈo tatou e mea ite aˈe tatou ma te faahepo i to tatou iho manaˈo, e nehenehe te mau taeae e tuahine e turori. Te mea peapea roa ˈtu â, e amahamaha te amuiraa. Papu, eita tatou e hinaaro ia tupu te reira. (A taio i te Korinetia 1, 8:9; 10:23,  24) E hiˈopoa anaˈe e piti hiˈoraa o te faaite ra e nafea te mau faaueraa tumu Bibilia e tauturu mai ai ia vai aifaito noa e ia faatupu i te hau.

14. Eaha te mau faaueraa tumu Bibilia no nia i te huru faaahuraa e faaneheneheraa te tia ia haapao?

¹⁴ Te huru faaahuraa e faaneheneheraa. Aita Iehova e parau roa mai eaha te ahu e tia ia oomo, ua horoa mai râ o ˈna i te mau faaueraa tumu Bibilia. Ei tavini na Iehova, e faaite tatou i te huru au noa a maiti ai i te ahu tura “ma te manaˈo paari.” (Tim. 1, 2:9, 10; Pet. 1, 3:3) Eita ïa tatou e oomo i te ahu no te faatietie ia tatou. E tauturu atoa te mau faaueraa tumu i te mau matahiapo ia ore ia faahepo i to ratou manaˈo no nia i te huru faaahuraa. Ei hiˈoraa, ua hinaaro te mau matahiapo o te hoê amuiraa e tauturu i te tahi mau taeae apî. Ua pee hoi teie mau taeae i te huru tâpûraa rouru a te mau taurearea o teie ao, mea poto e mea puharara. Mea nafea ïa te mau matahiapo i te tautururaa ia ratou? Ua parau te tiaau haaati ia ratou: “E na ô outou i teie mau taeae, ‘Ia horoa oe i te tumu parau i mua i te amuiraa, mai te peu tei nia noa to ratou mata i to oe ahu e rouru, e tia ïa ia faatitiaifaro i te reira.’” Ua haaferuri teie aˈoraa i te mau taeae, aita ïa te mau matahiapo i horoa i te hoê ture etaeta. d

15. E nafea te Bibilia e tauturu ai ia tatou ia maiti i te ravea rapaauraa? (Roma 14:5)

¹⁵ Te huru rapaauraa. E tia i te Kerisetiano tataitahi ia haapao maitai i to ˈna ea. (Gal. 6:5) Ia maiti te mau Kerisetiano i te hoê ravea rapaauraa, e haapao ratou i te ture Bibilia no nia i te toto e te  peu tahutahu. (Ohi. 15:20; Gal. 5:19, 20) Tera râ, na te Kerisetiano tataitahi e maiti i te hoê ravea rapaauraa. E pee noa paha vetahi i ta te mau taote e parau area te tahi atu, e imi ratou i te tahi atu ravea rapaauraa. Noa ˈtu eaha to tatou manaˈo, e tia ia tatou ia faatura i te tiamâraa e maiti o to tatou mau taeae e tuahine. Mea faufaa ïa ia haapao i to muri nei mau manaˈo: (1) O te Faatereraa arii a te Atua anaˈe te nehenehe e faaore roa i te maˈi. (Isa. 33:24) (2) E tia i te Kerisetiano tataitahi “ia papu maitai” ia ˈna eaha te mea maitai roa ˈˈe no ˈna. (A taio i te Roma 14:5.) (3) Eiaha e haava ia vetahi ê aore ra “e tuu i te hoê ofai turoriraa” i mua ia ratou. (Roma 14:13) (4) E faaite te mau Kerisetiano i te here ma te ore e imi i to ratou iho maitai. Ua taa ia ratou e te mea faufaa roa ˈˈe, o te auhoêraa ïa o te amuiraa. (Roma 14:15, 19, 20) Ia pee tatou i teie mau manaˈo, e vai piri noa tatou i te mau taeae e tuahine e e vai noa te hau i roto i te amuiraa.

16. E nafea te hoê matahiapo e faaite ai i te huru au noa i nia i te tahi atu mau matahiapo? (A hiˈo atoa i te mau hohoˈa.)

¹⁶ E tia i te mau matahiapo ia faaite i te huru au noa. (Tim. 1, 3:2, 3) Ei hiˈoraa, eita te hoê matahiapo e titau ia fariihia to ˈna manaˈo no te mea o ˈna te mea paari aˈe i roto i te tino matahiapo. Ua ite o ˈna e nehenehe te varua moˈa o Iehova e aratai i tera e tera matahiapo ia horoa i te hoê manaˈo o te tauturu ia ratou ia rave i te faaotiraa paari. Hau atu, aita anaˈe e faaueraa tumu Bibilia i ofatihia, e faaite te hoê matahiapo i te huru au noa ma te farii i te faaotiraa a te tino matahiapo noa ˈtu mea ê to ˈna manaˈo.

17. Eaha te mau maitai ta te mau Kerisetiano e fanaˈo ia faaite ratou i te huru au noa?

¹⁷ Mea rahi te haamaitairaa ia faaite i te huru au noa. E piri atu â tatou i te mau taeae e tuahine e e vai noa te hau i roto i te amuiraa. Mea faahiahia na tatou te faanahonahoraa a Iehova, noa ˈtu ua rau to tatou huru e taˈere te haamori nei tatou pauroa ia Iehova ma te tahoê. Te mea oaoa roa ˈtu â, te pee nei tatou i te huru au noa o Iehova, to tatou Atua.