UA ITE aˈena anei oe i te taata i te raveraa i te mea ino?— a Ua ite Samuela. I ora na oia i te vahi ta oe e ore e manaˈo e e tupu mai teie mau mea. Tei te sekene o te Atua, aore ra vahi haamoriraa, i te oire o Silo. E hiˈo anaˈe mea nafea, a 3 000 tiahapa matahiti aˈenei, te sekene i te riroraa ei fare no Samuela.

Hou te fanauraa o Samuela, ua hinaaro rahi roa to ˈna metua vahine o Hana i te hoê aiû. I te hoê tere i te sekene, ua pure Hana no te reira i te Atua. Te pure uˈana roa ra oia i hautiuti noa ˈi to ˈna vaha. Ua manaˈo atura te tahuˈa rahi ra o Eli e ua taero oia. I to ˈna râ iteraa e ua hepohepo roa oia, ua haamaitai Eli ia ˈna ma te parau: “Ia faatia mai hoi te Atua no Iseraela i ta oe i ani atu ia ˈna ra.”—Samuela 1, 1:17.

I muri aˈe, ua fanauhia mai o Samuela e ua oaoa roa Hana i parau atu ai oia i ta ˈna tane ia Elikana: ‘E faaea iho â vau i te faaamu ia Samuela i te û mama, e afai au ia ˈna i te sekene no te tavini i te Atua i reira.’ E tera iho â ta ˈna i rave! I reira, e maha aore ra e pae paha matahiti to Samuela.

Ua ruhiruhia Eli, e aita ta ˈna na tamaiti ra o Hophini e Phinehasa e haamori ra ia Iehova ma te tia. Te rave atoa ra raua i te mau taatiraa morare ore e te mau vahine o tei haere mai i te sekene! Ia manaˈo oe, e mea tia ia aha to raua metua tane?— Oia, e mea tia ia aˈo oia ia raua e eiaha oia ia faatia ia raua ia rave i tera mau ohipa ino.

Ua paari o Samuela apî i reira, e ua ite paha oia i te haerea ino o na tamaiti a Eli. Ua pee anei Samuela i to raua hiˈoraa ino?— Aita, ua rave noa oia i te mea tia, mai ta to ˈna na metua i haapii ia ˈna ia rave. Eita râ e maerehia e ua  riri Iehova ia Eli. Ua tono aˈera oia i te hoê peropheta no te faaite ia Eli e nafea Oia e faautua ˈi i te utuafare o Eli, i ta ˈna na tamaiti iino iho â râ.—Samuela 1, 2:22-36.

Ua tamau Samuela i te tavini e o Eli i te sekene. E i te hoê po te taoto ra hoi Samuela, ua pii mai te hoê reo i to ˈna iˈoa. Ua horo atu Samuela ia Eli ra, ua parau râ Eli e aita oia i pii atu ia ˈna. Ua tupu faahou tera ohipa. I te toruraa o te taime, ua faaue Eli ia Samuela ia parau: “E parau mai oe, e Iehova e, te faaroo nei hoi to tavini.” Ia Samuela i parau atu i te reira, ua paraparau maira Iehova ia ˈna. Ua ite anei oe eaha ta Iehova i faaite ia Samuela?—

Ua faahiti faahou te Atua ia Samuela i ta ˈNa opuaraa e faautua i te utuafare o Eli. Ia poipoi aˈe, ua mǎtaˈu aˈera Samuela i te faaite atu ia Eli i ta Iehova i parau. Ua taparuparu râ Eli ia Samuela: “Eiaha oe e huna i taua parau ra ia ˈu.” No reira, i te pae hopea, ua faaite Samuela ia Eli i te mau mea atoa ta Iehova i parau e rave Oia—mai ta ta ˈNa peropheta i faataa na mua ˈtu ia Eli. Teie ta Eli i pahono: “E rave oia i tei au ia [Iehova] ihora.” Ua haapohehia ihora Hophini e Phinehasa, e ua pohe atoa Eli.—Samuela 1, 3:1-18.

I tera noa taime, “tupu atura Samuela, e ua ati maira Iehova ia ˈna.” I reira, e taurearea paha o Samuela, te hoê taime faufaa i roto i te oraraa o te feia apî. Ia manaˈo oe, mea ohie anei no Samuela ia tamau i te rave i te mea tia noa ˈtu e aita vetahi ê e na reira ra?— Noa ˈtu e e ere i te mea ohie, ua tavini Samuela ia Iehova ma te haapao maitai i te roaraa o to ˈna oraraa.—Samuela 1, 3:19-21.

E o oe? E riro anei oe mai ia Samuela a paari ai oe? E tamau anei oe i te rave i te mea tia? E tamau anei oe i te haapao i te mau haapiiraa o te Bibilia e ta to oe na metua i haapii ia oe? Mai te peu e e na reira oe, e faaoaoa ïa oe ia Iehova e i to oe na metua atoa.