21 no Titema 2012 ia au i te tarena Maya, e taui te huru o teie nei ao i te manaˈo o te taata e rave rahi. Eaha to oe manaˈo? Ia au i te mea ta oe e tiai ra, e topa paha to oe hau, e inoino paha oe, aore ra eita oe e tâuˈa. E parau tohu tano ore anei â teie no nia i te hopea o teie nei ao?

Ia au i te Bibilia, eaha “te hopea o teie nei ao”? (Mataio 24:3) Te mǎtaˈu ra vetahi ia taninahia te fenua. Te maere ra vetahi i te mau faatiaraa no nia i te taime hopea. Ua rohirohi noa paha vetahi ia parauhia mai e ua fatata te hopea. Mea tano aore ra mea hape anei teie mau huru o te taata?

E maere paha oe ia haapii i ta te Parau a te Atua e faahiti ra no nia i te hopea o teie nei ao. Te faaite ra te Bibilia i te mau tumu e tiai ru ai i te hopea. Tera râ, te faataa atoa ra te reira i te inoino e itehia ia ore te mea tiaihia e tupu oioi. Te anihia ˈtu nei oe ia hiˈo i ta te Bibilia pahonoraa i te tahi mau uiraa matauhia no nia i te hopea o teie nei ao.

TA TE BIBILIA PAHONORAA: “Na [te Atua] i haamau i te tumu o te fenua, ia ore roa ia aueue.”—SALAMO 104:5.

Eita te fenua e haamouhia e te auahi aore ra e te tahi atu mau mea. Te haapii ra te Bibilia e e nohoraa te fenua no te taata e a muri noa ˈtu. Te na ô ra te Salamo 37:29: “E parahi te feia parau-tia i nia i te fenua, e parahi tamau â ratou i reira.”—Salamo 115:16; Isaia 45:18.

I muri aˈe i to te Atua poieteraa i te fenua, ua parau oia e “mea maitai roa” te reira. (Genese 1:31) Aita Iehova i opua noa ˈˈe e haamou i te fenua, ua fafau râ oia e haapohe i te feia e tuino i te reira. Eita ïa te fenua e mou.—Apokalupo 11:18.

E feruri paha oe i te Petero 2, 3:7 o te na ô ra: “Area te raˈi e te fenua e vai nei, te tapeahia nei ïa e taua parau ra no te auahi.” Aita anei te reira e faaite ra e e taninahia te fenua? I te tahi taime, te faaohipa ra iho â te Bibilia i te mau taˈo “raˈi,” “fenua,” e “auahi” i roto i te auraa taipe. Ei hiˈoraa, ia parau te Genese 11:1: “Hoê roa o to te ao nei reo,” te auraa o te taˈo “ao,” o te huitaata ïa.

E auraa taipe atoa to te mau taˈo raˈi, fenua e auahi i roto i te Petero 2, 3:7. Te faaite ra te mau irava 5 e 6 e e taairaa to te reira i te diluvi i to Noa tau. O te hoê ïa ao i tahito ra tei haamouhia eiaha râ to tatou paraneta. Ua tamâ ïa te diluvi i te hoê totaiete ino, aore ra “fenua.” Ua tamâ atoa te reira i te “raˈi,” oia hoi te feia faatere o tera totaiete taata. (Genese 6:11) Te tohu atoa ra te Petero 2, 3:7 i te hoê haamouraa taatoa na roto i te auahi o taua totaiete ino ra e to ˈna mau faatere piˈo.

TA TE BIBILIA PAHONORAA: “Te mou nei . . . teie nei ao, e ta to te ao atoa e hinaaro nei; o tei haapao râ i to te Atua ra hinaaro, e tia ïa i te oraraa e a muri noa ˈtu.”—IOANE 1, 2:17.

E mou “teie nei ao,” aore ra te taatoaraa o te taata aita e ora ra ia au i te hinaaro o te Atua, eiaha râ te fenua. Ia ora mai te tahi taata maˈi ai taata, e tatara ê paha te taote tâpû i te hoê oru o tera maˈi. Mai tera taote, e ‘tâpû ê’ te Atua i te feia ino  ia nehenehe te feia maitai e ora ma te oaoa i te fenua. (Salamo 37:9) I roto i tera auraa, e mea maitai “te hopea o teie nei ao.”

Ia au i te reira, ua faaohipa vetahi mau huriraa Bibilia i te Mataio 24:3 mai teie, “te hopea o te faanahoraa o te mau mea” aore ra “te hopea o te anotau.” I te mea e e ora ˈtu te huitaata e eita te fenua e mou, e ere anei i te mea tano ia manaˈo e o te hoê anotau apî, te hoê faanahoraa apî o te mau mea te itehia i muri iho? Te pahono ra te Bibilia, e. No reira hoi oia i parau ai “te ao a muri nei.”—Luka 18:30.

No nia i tera tau no a muri aˈe, ua parau Iesu o “te faahouraa” te reira, aore ra i roto i te tahi atu huriraa o “te faaapîraa o te mau mea atoa” ïa. I reira, e ora faahou te huitaata ia au iho â i te opuaraa matamua a te Atua. (Mataio 19:28) E fanaˈo ïa tatou i reira i

• Te hoê fenua paradaiso hau e ruperupe no te taatoaraa.—Isaia 35:1; Mika 4:4.

• Te hoê ohipa papu e te oaoa.—Isaia 65:21-23.

• Te oreraa o te mau maˈi atoa.—Isaia 33:24.

• Te apî-faahou-raa o te tino.—Ioba 33:25.

• Te tia-faahou-raa mai te pohe mai.—Ioane 5:28, 29.

Ia rave tatou i “to te Atua ra hinaaro,” i ta ˈna e ani maira, eita tatou e mǎtaˈu i te hopea o teie nei ao. E tiai ru râ tatou i te reira.

TA TE BIBILIA PAHONORAA: “Ia hiˈo outou i taua mau mea nei i te tupuraa, ua fatata ïa te basileia o te Atua.”—LUKA 21:31.

I roto i ta ˈna buka (The Last Days Are Here Again), ua papai o Richard Kyle e “ua faatupu te tauiraa taue e te arepurepu totiare i te hoê tupuraa e manaˈo ai te taata i te mau tohu o te hopea o teie nei ao,” mai te peu iho â râ e mea fifi ia faataa i te reira.

Aita te mau peropheta tei parau no nia i te hopea i faataa i te mau tupuraa peapea o to ratou tau. Ua faaurua râ te Atua ia ratou ia faataa i te mau tupuraa o te haapapu e ua fatata mai te hopea o teie nei ao. E hiˈo anaˈe i te tahi mau parau tohu, e na oe e ite e te tupu ra te reira i to tatou tau.

•   Tamaˈi, oˈe, aueueraa fenua, e maˈi pee haapohe.—Mataio 24:7; Luka 21:11.

• Rahi te ino i te tupuraa.—Mataio 24:12.

• Tuino te taata i te fenua.—Apokalupo 11:18.

• Miimii te taata, hinaaro i te moni e te mea e navenave ai ra, aore râ i hinaaro i te Atua.—Timoteo 2, 3:2, 4.

• Utuafare amahamaha.—Timoteo 2, 3:2, 3.

• Tâuˈa ore rahi i te fatataraa mai o te hopea.—Mataio 24:37-39.

• Pororaa i te evanelia o te Basileia o te Atua na te ao atoa.—Mataio 24:14.

Ua parau Iesu, ia ite outou i “taua mau mea nei,” e haapapu mai te reira e ua fatata te hopea o teie nei ao. (Mataio 24:33) Te tiaturi nei te mau Ite no Iehova e te tupu nei iho â tera mau mea, e te faaite nei ratou i to ratou faaroo i te taata ma te poro i roto e 236 fenua.

TA TE BIBILIA PAHONORAA: “E parau hoi te taata e, E hau, e aita e ino, ei reira ra ratou e roohia-noa-hia mai ai e te pohe oioi, mai te vahine hapu ia roohia i te mauiui ra, e e ore roa ratou e ora.”—TESALONIA 1, 5:3.

Te taai ra te Bibilia i te haamouraa o teie nei ao i te mauiui fanau, e tupu taue iho â te mauiui o te hoê mama fanau. E au atoa te taime e tae atu ai i te hopea i te fanauraa. E ite te mama hapû i te mau tapao e te fatata ra oia i te fanau. E horoa paha to ˈna taote i te taio mahana fanauraa e e maorohia paha te reira, ua papu râ ia ˈna e e tae mai iho â to ˈna aiû. Oia atoa, eiaha te mau tiairaa tei ore i tupu ia taui i te mau haapapuraa e o te mau mahana hopea teie.—Timoteo 2, 3:1.

‘Mai te peu e e mea papu e te fatata maira te hopea,’ e ui paha oe, ‘no te aha te taata e ore ai e farii i te reira?’ Te faaite ra te Bibilia e ia piri mai te hopea, eita e rave rahi e tâuˈa i te mau haapapuraa o te reira. Eita ratou e ite i te mau tauiraa faufaa i te anotau hopea, e tâhitohito ratou ma te parau e, “Te vai noa nei â hoi te mau mea atoa mai te taotoraa mai â o te feia metua ra, mai te hamaniraa mai â i te matamua ra.” (Petero 2, 3:3, 4) Mea papu te mau tapao o te mau mahana hopea, e rave rahi râ te ore e haapao i te reira.—Mataio 24:38, 39.

 I roto i teie tumu parau, tau irava noa tei hiˈohia mai no nia i te hopea o teie nei ao. * E hinaaro anei oe e ite atu â? Mai te peu e e, a farerei atu i te mau Ite no Iehova. E farii ratou i te faatere i te hoê haapiiraa Bibilia tamoni ore e oe. E nehenehe te reira e tupu i to oe fare, aore ra i te tahi atu vahi ta oe e hinaaro, aore ra na roto i te niuniu paraparau. To oe noa taime te titauhia, te mau maitai râ ta oe e fanaˈo aita ïa e faaauraa.