Ua inoino anei oe i te tahi haapaoraa? Eita paha ïa oe e hinaaro e faaô i roto i te tahi atu. Te vai ra râ te hoê haapaoraa papu. I te fenua nei, ua haaputuputu Iesu i ta ˈna mau pǐpǐ haapao maitai ei pǔpǔ e ua haapii ia ratou ia ora ia au i te mau ture aveia a te Atua. I teie atoa mahana, te vai ra te mau pǐpǐ a te Mesia o te tutava nei i te ora ia au i te mau ture aveia Kerisetiano. O vai ratou?

Ua parau Estelle tei faahitihia ˈtu na: “Ua haamata vau i te taa i te Bibilia i to ˈu haapiiraa e te mau Ite no Iehova. Aita i maoro roa to ˈu taaraa i te Ioane 8:32 o te na ô ra: ‘E ite ïa outou i te parau mau, e na te parau mau outou e faatiamâ.’”

Ua tapao atoa o Ray tei faahitihia ˈtu na: “Maoti ta ˈu haapiiraa Bibilia e te mau Ite no Iehova, ua ite au e e ere te Atua te tumu o te mauiui o te taata. Ua oaoa roa vau i te ite noa ˈtu e e tumu maitai iho â i vaiiho ai te Atua i te ino i teie mahana, fatata râ oia i te faaore i te reira mai ta ˈna i tǎpǔ.”

I te mea e e rave rahi o te haafaufaa ore nei i te mau ture aveia morare, e ere ïa i te mea ohie ia rave i te mea maitai. Tera râ, e nehenehe. Te hinaaro ra te rahiraa taata i te tauturu no te taa e faaohipa i te Bibilia. No reira te mau Ite no Iehova e faatere ai i te mau haapiiraa Bibilia ma te tamoni ore i te fare e te mau mirioni taata na te ao. I te mau hebedoma atoa, te hiˈopoa nei ratou i ta te Bibilia e haapii mau ra. Ma te na reira, e haafatata ˈtu ratou i to ratou Atua Poiete e a ite atu ai i te hoê oraraa oaoa. *

Ia farerei noa ˈtu oe te mau Ite no Iehova, no te aha e ore ai e ani atu eaha te tumu i tiaturi ai ratou i ta ratou haapaoraa? A hiˈopoa i ta ratou mau haapiiraa e to ratou haerea. I muri aˈe, na oe iho e ite e te vai mau ra anei te hoê haapaoraa papu.