E enemi puai roa te pohe, ua rau ïa ta te taata raveraa no te ora e a muri noa ˈtu. E mauiui iho â tatou ia pohe tei herehia e tatou. I te apîraa, eita paha tatou e manaˈo e pohe. E moemoeâ noa râ te reira!

Ua hinaaro te mau arii no Aiphiti e ora noa i muri aˈe i te pohe. Ua faaohipa ratou e tausani taata no te imi i te ravea no te ora maoro atu â. E paturaa rahi ta ratou no te tuu i te mau tino pohe o te hui arii ia vai maoro te reira. Ua manaˈo e e nehenehe faahou ratou e rave i tera mau tino, ua ino râ te reira. Aita ïa ta ratou opuaraa i manuïa.

Ua tamata atoa te mau arii Tinito i te tahi atu mau ravea no te ora e a muri noa ˈtu. Ua ani te arii Qin Shi Huangdi i to ˈna mau taata ia hamani i te tahi raau taa ê no te ore e pohe. Ua faaohipa râ ratou e rave rahi raau taero e e au ra e ua pohe te arii a inu ai i te tahi o tera mau raau.

E taata maimi i te fenua apî Juan Ponce de León. I 1513, ua tere oia i te mau motu i Antilles no te maimi i te vahi o te pape pihaa e nehenehe ai te taata e apî noa. Ua tapae oia i te tuhaa fenua Floride, ua pohe râ i muri aˈe i te hoê aroraa e te mau taata tumu no Marite. Aita ïa te vahi o tera pape pihaa i itehia aˈe.

Ua hinaaro ïa te mau arii Aiphiti, Tinito e taata maimi i te fenua apî e ora e a muri noa ˈtu. E ere paha ta ratou mau raveraa i te mea au, e opuaraa maitai râ. Te hinaaro ra hoi tatou paatoa e ora noa, e ere anei?

No te aha tatou e ore ai e hinaaro e pohe? Te faataa ra te Parau a te Atua i te tumu. No to tatou Atua poiete ra o Iehova *, te na ô ra te Bibilia: “Ua faanehenehe oia i te mau mea atoa i te tau mau ra, e ua tuu oia i te manaˈo [“o te tau otia ore,” Traduction du monde nouveau] i roto i [te  aau o te taata].” (Koheleta 3:11) E hinaaro tatou e oaoa i te oraraa i te fenua nei e a muri noa ˈtu, eiaha râ e 80 matahiti noa. (Salamo 90:10) Tera te hinaaro o to tatou aau.

No te aha te Atua i tuu ai i te tau otia ore i roto i to tatou aau? No te haamauiui anei ia tatou? Aita roa ˈtu! Te fafau maira te Atua e fatata roa te pohe i te faaorehia. E pinepine te Bibilia i te faahiti i te reira, oia atoa i te parau fafau a te Atua no nia i te ora mure ore.—A hiˈo i te tumu parau tarenihia,  “E faaorehia te pohe.”

Ma te papu, ua na ô Iesu Mesia: “Teie hoi te ora mure ore, ia ite ratou ia oe i te Atua mau ra, e ia Iesu i te Mesia i ta oe i tono mai.” (Ioane 17:3) Te vai ra ïa te ravea no te faaore i te pohe. Ua haapapu râ Iesu e o te Atua anaˈe te nehenehe e rave i te reira.