Мен Лондоннуң Паддингтон деп сырый чурттакчылыг районунга төрүттүнген мен. Авам болгаш үш угбаларым-биле кады чурттап турган бис. Ачавыс бистиң чуртталгавыска бирде көстүп кээр, бирде чиде бээр кижи турган. Ол арагачы чораан.

Бичии турумда-ла авам мени удуурунуң бетинде, мөргүүр кылдыр өөредип каан. Меңээ чүгле Ырлар ному бар бичии Библия турган. Аңаа аялгаларны бодум чогаадып алгаш, ырлаар турган мен. Бир-ле катап бир номга мындыг сөстер номчаан мен: «Эртенги хүн дүшпейн баар хүн чедип кээр». Ол сөстер бажымдан үнместээн. Ооң соонда хондур удуп шыдаваан мен. Келир үе дугайында бодалдар меңээ дыш бербээн. Чуртталганың ужур-утказы черле турар ужурлуг деп боданып турган мен. «Бо делегейже чүге чедип кээн мен?» Мен өлүксевейн турган мен!

Караң көрнүр чорукту сонуургап эгелээн мен. Өлген улус-биле чугаалажырын база шенеп турган мен. Школага өөренип турган эштерим-биле кады хөөрлерже база баар турган бис. Оон ыңай коргунчуг фильмнер көрүп, сирилээже дээр коргар турган бис.

10 харлыымда-ла багай орукче кире берген мен. Таакпы тыртып эгелээш, аңаа хандыкшып, удатпаанда мырыңай марихуана тыртып эгелээн мен. 11 харлыымда араганы амзааш, амданынга таарзынмаан-даа болзумза, ооң канчаар дээштиин сонуургаан мен. Оон ыңай музыка, танцыга база ынак болгаш, арга тыптып кээрге-ле, хөглээшкиннерже, дүнеки клубтарже баар турган мен. Кежээлерде бажыңымдан дезип чорупкаш, чүгле эртен эрте чанып кээр мен. Ынчангаш дараазында хүнде шагзыргай, күш чок боор болгаш, кичээлдеримче барбас турган мен. А чамдыкта чедип кээр-даа болзумза, чапсар үезинде ижип аар турган мен.

Школаны дыка багай демдектерлиг дооскан мен. Ону көргеш, мени көңгүс билбес турган авам дыка хорадаан. Бис алгыжып алган бис. Оон мен бажыңдан чоруй барган мен. Бир кезек үеде таныжым Тонниниң чанынга чурттап турган мен. Ол бичии херектер үүлгедип, наркотиктер садып, база каржы-дошкун аажы-чаңы-биле билдингир кижи чораан. Удаваанда иштели бергеш, 16 харлыымда оглумну божаан мен.

Иегованың Херечилери-биле бир-ле дугаар бот иелер приюдунга чурттап тургаш, ужурашкан мен. Тус черниң чагыргазы меңээ аңаа оглум-биле кады чурттаар өрээл берген. Иегованың Херечилери боор ийи херээжен кижи аңаа турган чамдык аныяк иелерге үргүлчү кээр турган. Бир катап оларның чугаазынче киржи берген мен. Иегованың Херечилери чазып турар деп шынзыдыксаан мен. Ынчалза-даа олар мээң шупту айтырыгларымга тодаргай, билдингир кылдыр Библияның бодундан харыылап бергеннер. Олар дыка эки, аянныг болгаш мээң сеткилимге аажок киргеннер. Ынчангаш мен олар-биле Библия өөренирин чөпшээрешкен мен.

Удаваанда Библиядан мээң чуртталгамны шуут өскертиптер чүүлдү көрүп каан мен. Бичиимден тура өлүмден коргар турган мен. Иисус диргизиишкин дугайында өөредип турган деп, ам билип каан мен! (Иоанн 5:28,29). Бурган меңээ ынак деп база билип алган мен (1 Пётр 5:7). Ылаңгыя Иеремия 29:11-де сөстер меңээ дыка дээштиг болган. Ында мынча дээн: «Силерге хамаарыштыр чүнү баш бурунгаар бодап алганымны Мен билир болгай мен — деп, Дээрги-Чаяакчы медеглээн. — Силерге келир үени, идегелди хайырлаар дээш, Мен айыыл-халап эвес, амыр-тайбыңны бээр деп бодалдыг мен». Черге дываажаңга мөңгеде чурттаар идегелдиг апарган мен (Ырлар 36:29).

Иегованың Херечилери меңээ шын сеткилинден ынакшылын көргүскен. Оларның аразында кайы хире аянныг, чылыг байдал тергиидеп турарын ужуражылгаларынче чаа бир дугаар баргаш, көрген мен. Олар шупту эп-найыралдыг болган (Иоанн 13:34, 35). Тус черниң хүрээзинге мени канчаар хүлээп алганы, бо улустуундан дыка улуг ылгалдыг болган. Иегованың Херечилери меңээ дыка эки хамаарылгалыг турган. Олар менче үезин чарып, кичээнгейин көргүзүп база дузаны херек кырында кадып турганнар. Мен бодумну улуг, ынакшылдыг өг-бүлениң кезии кылдыр миннинген мен.

Библияны өөренип тургаш, Бурганның негелделеринге дүгжүр дизе, чуртталгамны өскертир ужурлуг мен деп билип каан мен. Таакпыны октаары меңээ берге турган. Ынчалза-даа ону шыдапкан мен. Ол-ла үеде мээң дыңнап турар ырыларым таакпылаар, марихуана тыртар күзелимни күштелдирип турар деп билип кааш, оларны дыңнаарын соксаткан мен. Арага ижиптер күткүлгеге алыспас дээш, хөглээшкиннерже, дүнеки клубтарже барбайн барган мен. Меңээ эки салдарлыг база бедик мөзү-шынар дүрүмнеринден туттунарынга дузалаар улус-биле эдержип эгелээн мен (Чугаалар 13:20).

Ол-ла үелерде Тонни база Иегованың Херечилери-биле Библияны өөренип эгелээн. Кажан Иегованың Херечилери Библияның дузазы-биле ооң айтырыгларынга харыылап бээрге, ол алыс шынны тып алганынга шынзыккан. Ол бодунуң чуртталгазын бүрүнү-биле өскертипкен. Багай эш-өөрден адырылгаш, кем-херек үүлгедир амыдыралын каапкаш, марихуана тыртарын октапкан. Бис Иегованың сеткилинге кирерин күзээш, оглувус долу өг-бүлеге өссүн дээш, өгленип алыр деп шиитпирлеп алган бис. 1982 чылда өгленип алган бис.

Мээң кылыксап турганым өскерлиишкиннерни кылып шыдапкан улустуң дугайында бижип каан статьяларны «Таңныыл суургазындан» болгаш «Оттуп келиңер!» * деп дептерлерден дилеп турганымны сактыр мен. Ол статьялар мени сорук киирер турган. Олар мени дүжүп бербейн, улаштыр туржурунче деткээн. Иеговадан мени кагбас кылдыр чаннып дилеп турган мен. 1982 чылда бис Тонни-биле сугга суктургаш, Иегованың Херечилери апарган бис.

Иегова Бурган-биле найыралым мээң амы-тынымны камгалаан. Бис Тонни-биле Бурганның деткимчезин берге үелерде база көрген бис. Иеговага ынанып өөренип алган бис база Ол кезээде бистиң чанывыска бооп, бистиң өг-бүлевис дээш сагыш човап турган деп билир бис (Ырлар 54:23).

Оглувус биле уруувус Иеговага ынак бооп өзүп келгенинге аажок өөрүүр бис. Оларның ажы-төлү база Бурганны билип ап, алыс шынны өөренип турар боорга, дыка аас-кежиктиг мен.

Дүнелерде мени моон соңгаар келир үе дугайында дүвүренчиг бодалдар азы өлүм дугайында бодалдар үглевейн барган. Тонни-биле кады неделя санында чыыштан чыышче кады бүзүрээн акы-угбаларны эргий кезип, деткип чоруп турар бис. Бис олар-биле кады улуска Иисус Христоска бүзүрей бээринге база мөңге чурттаар аргалыг апаарынга дузалап турар бис.