Oco tu kuate esanju komuenyo, ci kuete esilivilo oku kuata akamba. Akamba vawa, va tu kuatisa oku kala omanu vawa haivo va pama.—Olosapo 27:17.

 Pole, Embimbiliya li lekisa okuti ci kuete esilivilo oku kuata utate poku nõla akamba. Olio li tu sapuila onima tu pondola oku kuata nda tua nõla akamba vãvi. (Olosapo 13:20; 1 Va Korindo 15:33) Oku linga ukamba lomanu vaco, va tu vetiya oku nõla olonjila vĩvi kuenda oku kuata ovituwa vĩvi.

Vocipama cilo

•  Ekamba liwa li lomboloka nye?

•  Ovolandu api atiamẽla kakamba vawa tu sanga Vembimbiliya?

•  Ange hẽ omunu umue o pondola oku kala ekamba lia Suku?

•  Ovisonehua Viembimbiliya vi vangula catiamẽla kukamba

 Embimbiliya li longisa okuti, ekamba liwa ka li lomboloka lika omunu una o sole ovina viosi etu tu sole. Ndeci, Olosamo 119:63 ku popia hati: “Ndikamba lia vosi vana va ku sumbila, kuenda lia vana va pokola kolonumbi viove.” Ca ku lomboloka? Usonehi Wosamo eyi, wa enda oku nõla lika akamba vana va enda oku sanjuisa Suku haivo va likolisilako oku pokola olonumbi Viaye.

 Embimbiliya li lekisavo ovituwa ekamba liwa li sukila oku kuata. Ndeci:

•   “Ekamba liocili li lekisa ocisola otembo yosi kuenda olio li linga manjove kotembo yohali.”—Olosapo 17:17.

•   “Kuli akamba va li linga cĩvi omunu lukuavo, pole, kuli ekamba limue li kakatela okuti, manjove ketimba ci sule.”—Olosapo 18:24.

 Ovinimbu evi vi tu longisa okuti, ekamba limue liwa, ukuacili, ukuacisola, ukuacikembe kuenda ukuakueca. Ekamba liocili, omunu una o pondola oku tu kuatisa kolonepa viosi viomuenyo wetu. Ekamba liocili li kuetevo utõi woku tu lungula eci tu kasi oku loña konjila ka ya sungulukile, ale ceci tu laika oku nõla onjila yimue yĩvi.—Olosapo 27:6, 9.

 Vembimbiliya tu sangamo ovolandu wakamba vocili vomanu vakuanyamo a litepa, ovituwa, ofeka, ulandu womuenyo kuenda ovikele viunene. Kũlĩhĩsa ovolandu atatu.

•   Ruti la Naomi. Ruti wa kuelele lomõla ulume wa Naomi. Citava okuti eye la Naomi va li silile anyamo alua. Handi vali, va kala vakuavituwa via litepa. Pole, ndaño latepiso aco, va lisolele calua kuenda va linga akamba vocili.—Ruti 1:16..

•   Daviti la Yonatão. Ulandu u lekisa okuti Yonatão wa kala ukulu wa Daviti ci soka 30 kanyamo. Pole, ndaño ndoco, Embimbiliya li popia okuti “va linga akamba” vawa.—1 Samuele 18:1.

•   Yesu lovapostolo vaye. Yesu wa kuatele unene woku tumila ovapostolo vaye, momo wa kala ulongisi wavo haeye Ñala yavo. (Yoano 13:13) Pole, lalimue eteke a simĩle okuti ovapostolo vaye ka va sesamẽla oku kala akamba vaye. Handi vali, Yesu wa kuatele ukamba wocili, lomanu vana va kapeleko alongiso aye. Eye wa popia hati: “Ndu tukuli akamba, momo ndo sapuili ovina viosi nda yeva ku Isiange.”—Yoano 15:14, 15.

 Oco, omanu va pondola oku kala akamba va Suku. Embimbiliya liti: “Eye [Suku] o kuete ukamba wocili lomunu wa suñama.” (Olosapo 3:32) Volondaka vikuavo, ci lomboloka okuti, Suku ekamba liomanu vana va pua etondelo, vakuacili, vo sumbila kuenda va likolisilako oku ambata omuenyo wavo ndomo ci likuata lolonumbi viaye viatiamẽla kueci ciwa leci cĩvi. Ndeci, Vembimbiliya, ulume ukuekolelo Avirahama o tukuiwa okuti, ekamba lia Suku.—2 Asapulo 20:7; Isaya 41:8; Tiago 2:23.