Ocitende covokalunga ocinyama cimue ci kasi pocitumãlo covawe peli oviendalomuenyo vialua kosi yokalunga. Ekova liayo liakasa, halio lieyuka olosongo. Ocitende covokalunga ci likisa lonjanga. Vakukutu ale volosengundu li pondola oku leñela ale oku kõla ndevaya limue. Kuenje olio li tẽla oku likupika oco liñile pocitumãlo ca sukatela kuenda oku kõla oco ovanyali vaye ka va ka tẽle oku upapo. Ocitende co vokalunga ci kuete uloño waco omo liekova liayo likomohĩsa.

 Kũlĩhĩsa ndoco: Ekova liocitende co vokalunga li pondola oku kõla loku leñela ale oku pita pokati. Oco li linge epongoloko liaco, ocitende covokalunga ci tokeka ale ka litokeka olosinga viekova liayo poku talavaya leteku liu kuatisa oku kolisa loku leñelisa ekova.

 Ateku amue a kuatisa oku tokekisa olosinga, loku lingisa okuti ekova li kõla calua. Ateku akuavo ka ha tokekisa olosinga kuenda a lingisa okuti ekova lileñela. Ekova liocitende co vokalunga li pondola oku leñela calua loku melẽha ndu okuti likasi oku yenguluka.

 Olonoño vi kasi oku seteka oku panga ovimalẽho vikuete ovoloño amuamue oku likisa kuekova liocitende co vokalunga. Ovo va yongola oku panga ovimalẽho vioku pelala vowoño vi talama lonjila yimue okuti vi kapiwa pocitumãlo ca sunguluka kuenda noke vi leñela oco ku yuvuiwe okuti etimba lilikala ocimalẽho caco.

 Nye o sima? Ekova likomohĩsa liocitende lio vokalunga lia tukuluka ño? Ale ca lulikiwa?