Citava okuti wa fetika osimbu oku namulãla, pole cilo wa fetika oku kuata atatahãi. O sukila hẽ oku amamako lukamba waco ale o liwekapo? Ocipama eci ca sonehiwa locimãho coku ku kuatisa oku nõla onjila o kuama.

Vocipama eci

•  Ceci o sukila oku linga nda o kuete atatahãi

•  Nõlapo onjila yimue

•  Nda wa nõlapo oku liwekapo

 Noke yoku namulãla vokuenda kuotembo yalua, pamue vu limbuka okuti, kavali kene ka vu kuete ovituwa vimuamue ndeci wa endi oku sima. Ndeci:

•   Umue pokati kene o sole oku enda kokalunga, pole ukuavo o sole oku ñuala ñuala.

•   Umue pokati kene wa lianja, ukuavo ka vangula calua.

•   Umue o kuete ocituwa coku kemba, ukuavo o sole oku vangula ocili.

 Limbuka okuti atosi a tukuiwa ndeti a litepa. Vetosi liatete mua kongela oku litepa kuolonjongole; vetosi liavali mua kongela ovituwa; vetosi liatatu mua kongela ovisimĩlo.

 Sokolola: Pokati katosi a-a, etosi lipi o sima okuti ka lialelukile kokuave oku liyula nda wa kueleli? Vu sima hẽ okuti kavali kene vu sukila oku linga apongoloko?

 Ulume lukãi citava okuti va kuata olonjongole kuenda ovituwa via litepa, pole, va pondola oku kuata esanju volohuela. Momo oku kuata ovituwa vimuamue ka ci lomboloka oku lisetahãla. Olonjanja vimue, ulume lukãi va lilongisa oku sola ovina vimuamue kuenje va limbuka okuti va kuatisiwa calua omo lioku kuata ovituwa via litepa. a

 Handi vali, o sukila oku kuela lomunu o kuete ovisimĩlo ndevi viove ale wa tiamẽla ketavo limuamue kuenda ovituwa vioku tepisa pokati keci ciwa leci cĩvi. Nda wa limbuka okuti pali etepiso, ondimbukiso yokuti o sukila oku liwekapo oku namulãla.

 Ndeci, kũlĩhĩsa eci ci pondola oku pita nda ene watiamẽli katavo a litepa. Elivulu limue li lombolola catiamẽla kolohuela liti: “A konomuiso a lingiwa a lekisa okuti, olohueli viatiamẽla katavo a litepa, ca leluka oku linyãla.”

 Onumbi Yembimbiliya: “Ko ka likutili kokanga ka ya lisokele lava ka va tavele.”—2 Va Korindo 6:14.

 Embimbiliya li popia okuti wosi o kuela, o “laika oku tala ohali ketimba.” (1 Va Korindo 7:28) Omo liaco, ku ka komõhe nda o kuete ovitangi osimbu o kasi oku namulãla.

 Oku kuata ovitangi vitito pamue ka ci lomboloka okuti o sukila oku liwekapo oku namulãla. Pole, epulilo lieli: Ene vu tẽla oku potolola ovitangi viaco lumbombe? Kavali kene vu ka sukila oku kuata uloño waco woku tetulula ovitangi nda wa kueli.

 Onumbi Yembimbiliya: “Pole, likuateli ocisola pokati, lingi vakuahenda, loku li ecela pokati.”—Va Efeso 4:32.

 Handi vali, oku kuata ovitangi olonjanja vialua ci lekisa okuti, ka vu kuete ovituwa vimuamue. Nda oco, hĩse oku ci limbuka cilo osimbu ka wa kueleli!

 Oku malusula: Nda wa limbuka okuti o kuete atatahãi catiamẽla komunu o kasi oku namulãla laye ale o sima okuti kua lipongiyile oco o kuele, ku ka yuvule atatahãi aco!

 Onumbi Yembimbiliya: “Ukualondunge o mola ohele kuenje o salama, pole, omunu wa kamba olondunge amamako oku enda kuenje o tala ohali.”—Olosapo 22:3.

 Oku liwekapo oku namulãla ci sumuisa calua. Pole, nda umue pokati kene o kuete atatahãi catiamẽla kukamba waco vokuenda kuotembo yalua, onjila ya sunguluka oku liwekapo.

 Pole, o ci linga ndati? Nda ekalo li ecelela, ombangulo yoku liwekapo oku namulãla ka yi ka lingiwe poku tuma esapulo ale oku telefonala. O sukila oku nõla ocitumãlo kuenda elivala limue lia sunguluka oco vu sapeli ondaka yaco.

 Onumbi Yembimbiliya: “Vanguli ocili omunu lukuene.”—Sakariya 8:16.

 Nda ove wa liwekipo oku namulãla, ci situlula okuti wahongua? Sio, haicoko. Ivaluka okuti oku namulãla ku ku kuatisa oku nõla onjila yimue: Oku kuela ale sio. Pole, ndaño ceci o liwekapo oku namulãla, o pondola oku lilongisa ovina vialua vi kuete esilivilo kulandu waco.

 Lipula ndoco: ‘Nye nda lilongisila koku namulãla kuaco? Anga hẽ ca ndi kuatisa oku limbuka okuti ndi sukila oku kulapo vali kamue kolondunge osimbu sia kuelele? Nda nda nõlapo oku namulãla vali, ocina cipi ca litepa ndi sukila oku linga?’