EPULILO 9
Ndi Tava hẽ Okuti Ovina Via Lulikiwa Ale Via Tukuluka ño?
NYE O SUKILA OKU LINGA?
Sokolola ulandu u kuãimo ndoco: Umalẽhe umue o tukuiwa hati Alex, wa enda oku tava ku Suku, kuenda kovina via lulikiwa. Pole, cilo o kuete atatahãi. Momo, ulongisi waye wo kosikola una o longisa ovina viatiamẽla ko biologia, wa lombolola hati, elongiso liokuti ovina via tukuluka ño, liocili, kuenda ovoloño a siata oku eca uvangi waco. Omo okuti Alex ka yongola oku kutisiwa osõi pokati kakamba vaye vo kosikola, o lipula ndoco: ‘Nda olonoño via siata oku popia hati elongiso liokuti ovina via tukuluka ño, liocili, ndi kuete hẽ omoko yoku kuata atatahãi atiamẽla kelongiso liaco?’
Nda ove wa kalele Alex, nda wa tava hẽ kelongiso liokuti ovina via tukuluka ño omo okuti alivulu a lekisa uvangi waco?
SOKOLOLA LUTATE!
Cikale omanu va tava okuti kuli Suku, ale vana va tava okuti ovina via tukuluka ño, va kũlĩha ovina va tava. Pole, ka va kũlĩhĩle esunga lieci va tavela kelongiso liaco.
-
Kuli omanu vamue va tava okuti, ovina via lulikiwa, omo okuti, va lilongisa ovina viaco ketavo liavo.
-
Omanu vakuavo va tava kelongiso liokuti, ovina viosi via tukuluka ño, momo oco va longisiwa kosikola.
APULILO EPANDU TU SUKILA OKU KONOMUISA
Embimbiliya li popia hati: “Onjo yosi ya tungiwa [lomunu] umue, pole, u wa tunga ovina viosi Suku.” (Va Heveru 3:4) Ove hẽ o tava okuti ulandu owu Wembimbiliya wocili?
Oku popia okuti, ovina vi kasi voluali ka vi kuete Ululiki, ci sokisiwa loku popia hati, onjo ka ya tungiwile lomunu umue
OCISIMĨLO: Ovina viosi vi kasi mulo voluali, via tunda ketenda limue linene lia tuikilamo.
1. Helie wa ecelela okuti, etenda liaco li tuikila mulo voluali?
2. Ca sunguluka hẽ oku popia okuti, ovina viosi vi kasi mulo voluali via tukuluka ño, ale kuli umue wa vi lulika?
OCISIMĨLO: Omanu va tunda kolosima.
3. Nda omanu va tunda kolosima, momo lie va kuetele olondunge via velapo okuti, violosima vi sule?
4. Momo lie ka ca lelukilile oku kuata elomboloko liekalo “liovina vimue” vi kuete omuenyo?
OCISIMĨLO: Elongiso liokuti, ovina vi kasi mulo voluali via tukuluka ño, li kuete uvangi wocili.
5. Anga hẽ omunu o kuete ocisimĩlo eci, wa konomuisa lutate ondaka yaco?
6. Omanu vañami va tava kelongiso liokuti ovina via tukuluka ño, omo va yeva okuti, vana va loñoloha va tava kondaka yaco?
Ufeko umue o tukuiwa hati, Julia, wa popia hati: “Sokolola ndeci okuti, o kasi oku pita vusenge umue, kuenje, o sanga onjo yimue yafina ya tungiwa lavaya. Ove hẽ o komõha loku popia hati, oviti via kupuka ciwa, kuenje via tunga onjo yaco?’ Ocili okuti, ku tava kondaka yaco! Ka citava okuti, oviti vi litunga ovio muẽle. Momo lie, omanu vamue va siatela oku tava kelongiso liokuti, ovina vi kasi mulo Voluali via tukuluka ño?”
Umalẽhe ukuavo o tukuiwa hati, Gwen wa popia hati: “Sokolola ndeci okuti, omunu umue oku sapuila hati, vonjo yimue yupange mua tuikila etenda limue, kuenje otinda ya li sanduila vovimano, kuenda kilu lionjo yaco. Kuenje, ya pongoloka ondisionaliu yimue yinene. Ove hẽ o tava kulandu wa tukuiwa ndeti?”
MOMO LIE TU TAVELA KULULIKI?
Embimbiliya li tu vetiya oku kuata ‘uloño woku sokolola.’ (Va Roma 12:1) Olondaka evi vi lomboloka okuti, ka tu sukila oku tava kululiki omo liovisimĩlo vi kuãimo ndeci:
-
OCISIMĨLO (Ndi tava okuti, kuli umue wa velapo omanu vosi)
-
OKU TAVA KOVISIMĨLO VIOMANU VAKUAVO (Omanu vosi va kasi vetavo nda tiamẽla, va kuete ocisimĩlo ndeci ca tukuiwa ndeti)
-
OKU VETIYIWA LEPATA (Olonjali viange via ndi longisa oku tava ku Suku, kuenda sia kuatele epondolo lioku nõla onjila ndi yongola oku kuama)
O sukila oku kuata uvangi u lekisa esunga lieci o tavela kocina cimue.
Ufeko umue o tukuiwa hati Teresa, wa popia hati: “Kosikola ndi tangela, nda ulongisi o lombolola ekalo lietimba lietu, ndi tava okuti, kuli Suku. Ovimatamata viosi vietimba lietu, oku kongelamo vina vitito, vi kuete ocikele cimue. Lomue o pondola oku limbuka ndomo ovimatamata vietimba lietu vi talavaya. Etimba lietu lia pangiwa lonjila yimue yi komõhisa!”
Ukuenje umue o tukuiwa hati Richard, wa popia hati: “Eci ndi mola ovina vimue ndeci: Osapalalo yimue ya lepa calua, ocimbaluku cimue, ale ekãlu, nda siata oku lipula ndoco: ‘Helie wa panga ovina evi?’ Oco omunu umue a pange ekãlu, o sukila oku kuata uloño walua. Eye, o sukila oku kuata uloño woku kapa olopesa viaco vekãlu, oco liende ciwa. Omo okuti oco ekãlu liende lia sukila oku pangiwa lomunu, wa loñoloha, omunu wa lulikiwavo la umue wa loñoloha calua.”
Umalẽhe umue o tukuiwa hati Anthony, wa popia hati: “Osimbu nda kala oku amamako oku lilongisa ovina viatimẽla kovoloño, ca ndi vetiya oku kuata atatahãi atiamẽla kelongiso liokuti, ovina vi kasi voluali via tukuluka ño. . . . Ndi sima okuti, ca leluka oku tava kelongiso liokuti, kuli umue wa lulika ovina vi kasi mulo voluali. Pole, ka ca lelukile oku ‘tava’ kelongiso liokuti, ovina viosi via tukuluka ño.”
SOKOLOLA ULANDU U KUÃIMO NDOCO:
Pa pita ale anyamo alua tunde eci olonoño via fetika oku konomuisa elongiso liokuti, ovina vi kasi voluali via tukuluka ño. Pole, toke cilo pokati kolonoño pali olonamalãla viatiamẽla kelongiso liaco. Omo okuti pokati kavo pali olonamalãla, anga hẽ ka ca sungulukile oku kuata atatahãi atiamẽla kelongiso liokuti, ovina vi kasi voluali via tukuluka ño?
Ove o ka ci Sola
AMALẼHE VA PULA
Ovina Via Lulikiwa Ale Via Tukuluka ño?—Onepa 3: Momo Lie Ndi Tavela Okuti Ovina Via Lulikiwa?
Anga hẽ o sukila oku liwekapo oku tava kolonoño oco o tave okuti ovina via lulikiwa
