Ondaka yiwa yokuti omanu va ka kala otembo ka yi pui palo posi, ya sonehiwa Vembimbiliya. (Osamo 37:29) Embimbiliya li kuete 66 kalivulu. Suku wa tumile 40 kalume vakuekolelo oco va sonehe Embimbiliya. Alivulu atete atãlo a sonehiwa la Mose ci soka 3.500 kanyamo konyima. Elivulu lia sulako tunde eci lia sonehiwa lupostolo Yoano papita ale ci soka 1.900 kanyamo. Ava va soneha Embimbiliya va soneha ovisimĩlo vielie? Suku wa vangula lasonehi Vembimbiliya lekuatiso liespiritu sandu liaye. (2 Samuele 23:2) Ovo va soneha ovisimĩlo via Suku okuti viavo muẽle havioko. Omo liaco, Yehova eye Usovoli Wembimbiliya.—Tanga 2 Timoteo 3:16; 2 Petulu 1:20, 21.

 Tala ovideo Helie Usovoli Wembimbiliya?

 Tua kũlĩha okuti Embimbiliya lia tunda ku Suku momo li tu sapuila ocili covina vi keya kovaso. Lomue omunu o pondola oku ci linga. (Yehosua 23:14) Suku ukuonene wosi, eye lika wa kũlĩha ovina vi ka pita lomanu kovaso yoloneke.—Tanga Isaya 42:9; 46:10.

 Tu lavoka okuti elivulu li tunda ku Suku, li litepa lalivulu akuavo, kuenda Embimbiliya oco muẽle li kasi. Kua siata oku pangiwa Ambimbiliya alua a sandekiwa kovita vialua vialimi. Tunde kosimbu Embimbiliya lia siata oku litava lukũlĩhĩso wolonoño. Alume 40 va soneha Embimbiliya ovisimĩlo viavo ka via lipatãlele. a Ovina via lomboluiwa Vembimbiliya viatiamẽla kocisola, vi eca uvangi wokuti olio lia tunda muẽle ku Suku umue ukuacisola okuti, Suku yocili. Handi vali, olio li kuete unene woku pongolola omuenyo womanu okuti va kuata ekalo liwa. Ovina evi ovio via siata oku vetiya omanu valua oku kolela okuti Embimbiliya Ondaka ya Suku.—Tanga 1 Va Tesalonike 2:13.

 Tala ovideo Ndamupi tu Kolela Okuti Embimbiliya li Vangula Ocili?

 Embimbiliya li lombolola olondaka viwa viokuti, Suku o ka lingila omanu ovina viwa. Ovisonehua vi lombolola ndomo omanu va pumba esumũlũho lioku kala vocumbo ceposo palo posi, kuenda ndomo ocumbo caco ci ka tumbuluiwa.—Tanga Esituluilo 21:4, 5.

 Vondaka ya Suku mu sangiwa ovihandeleko, lolonumbi, kuenda alungulo. Handi vali, Embimbiliya li lombolola ndomo Suku a siata oku tata omanu tunde kosimbu, kuenje ulandu waco u situlula ovituwa via Suku. Omo liaco, Embimbiliya li ku kuatisa oku kũlĩha Suku. Olio li ku sapuila ndomo o pondola oku linga ekamba liaye.—Tanga Osamo 19:7, 11; Tiago 2:23; 4:8.

 Ombrochura yilo yi ku kuatisa oku kuata elomboloko Liembimbiliya poku kuama ongangu ya Yesu. Eye wa enda oku tukula ovinimbu Viembimbiliya loku situlula “elomboloko Liovisonehua.”—Tanga Luka 24:27, 45.

 Ka kuli ovina vialua vi kuete esilivilo okuti olondaka viwa vi tunda ku Suku ci sule. Pole, omanu vamue ka va kapeleko olondaka viaco, kuenda vakuavo ka va vi sole. Pole, ku ka sumue. Elavoko liove lioku kuata omuenyo ko pui, lia tamba koku kũlĩha Suku.—Tanga Yoano 17:3.