Yehova wa eca ongongo kulume kuenda kukãi. Ongongo oyo ocitumãlo cetu. Ocili okuti, olohueli viatete okuti Adama la Heva, ka via lulikiwile oco vi yukise ilu, momo otembo yaco Suku wa lulika ale ovangelo oco va kale kilu. (Yovi 38:4, 7) Omo liaco, Suku wa kapa omunu watete vocumbo ceposo ca tukuiwa hati, ocumbo Cedene. (Efetikilo 2:15-17) Yehova wa eca kokuaye kuenda kocitumbulukila caye elavoko lioku kala otembo ka yi pui palo posi.—Tanga Osamo 37:29; 115:16.

 Kefetikilo ocumbo Cedene oco lika ca kala ocitumãlo ceposo. Olohueli viatete via sukilile oku yukisa oluali locitumbulukila cavo. Vokuenda kuotembo nda va viala oluali luosi kuenda oku lu lingisa ofeka yelau. (Efetikilo 1:28) Ongongo lalimue eteke yi ka kunduiwa. Oyo yi ka amamako oku kala ocitumãlo comanu.—Tanga Osamo 104:5.

Tala ovideo Momo Lie Suku a Lulikila Ongongo?

 Adama la Heva va lueyela Yehova Suku, kuenje va tundisiwa vocumbo ceposo. Ocumbo Ceposo ca nyõleha, kuenda lomue o tẽla oku ci tumbulula. Embimbiliya li popia hati: “Oluali lua eciwa peka lia vakuevĩho.”—Yovi 9:24.—Tanga Efetikilo 3:23, 24.

 Anga hẽ Yehova wa ivalako ocipango caye catete catiamẽla komanu? Sio! Eye ukuonene wosi. Kuenda o ka ci tẽlisa. (Isaya 45:18) Yehova o ka tumbulula epata liomanu ndeci a yonguile kefetikilo.—Tanga Osamo 37:11, 34.

 Ofeka Yeposo yi ka tumbuluiwa palo posi eci Yesu a ka viala ndombiali Yusoma wa Suku. Vokuenda kuyaki u tukuiwa hati, Harmagedo, Yesu o ka songuila ovangelo va Suku loku kundula ovanyali Vaye. Noke o ka kapa Satana vokayike kuenje o kalamo ci soka 1.000 kanyamo. Pole, afendeli va Suku va ka puluka kenyõleho liaco, momo Yesu o ka va songuila loku va teyuila. Ovo va ka kuata omuenyo ko pui Voluali Luokaliye palo posi.​—Tanga Esituluilo 20:1-3; 21:3, 4.

 Otembo yipi Suku a ka malako evĩho palo posi? Yesu wa eca “ondimbukiso” yoku lekisa otembo yoku iya kuesulilo. Ovitangi vi kasi voluali koloneke vilo, vi kapa kohele omuenyo womanu, kuenda vi lekisa okuti, “tu kasi koloneke via sulako violuali lulo.”​—Tanga Mateo 24:3, 7-14, 21, 22.

 Vokuenda kuohulukãi yanyamo, Yesu o ka viala oluali luosi oku upisa kilu kuenje o ka malako ohali yosi. (Isaya 9:6, 7; 11:9) Yesu ka ka kala lika Osoma, pole o ka kalavo Ocitunda Cinene kuenje o ka tuvika akandu omanu vosi va sole Suku. Noke vonduko ya Yesu, Suku o ka malako ovovei, oku kuka, kuenda oku fa.​—Tanga Isaya 25:8; 33:24.

 Omanu vana va pokola ku Suku va ka kala vofeka yeposo. (1 Yoano 2:17) Yesu wa tuma olondonge viaye oku sandiliya ambombe kuenda oku va longisa ndomo va pondola oku taviwa la Suku. Koluali luosi Yehova o kasi oku pongiya olohuluwa viomanu oco vi kale voluali luokaliye palo posi. (Sofoniya 2:3) Volonjango Viusoma Violombangi Via Yehova, omanu va kasi oku lilongisa ndomo va pondola oku kala olohueli viwa kuenda olonjali viwa. Handi vali, omãla kuenda olonjali va kasi oku fendela kumosi loku lilongisa ndomo va kuatisiwa lolondaka viwa.—Tanga Mika 4:1-4.