Don kuenda Margaret * va kuata esanju eci va nyuliwa lomõlavo ukãi kuenda epata liaye. Margaret wa pongiya omasa kuenda ongundi okuti okulia kumue kuwa ku soliwe lolonekulu viaye vivali.

Noke yoku tumãla, Margaret wa nena okulia kuenje wa ku kapa komesa. Eye wa li tuvula, kuenje wa limbuka okuti vetiyela mua kala lika usole wa tokota kuenda ongundi. Margaret wa ivalako oku kapa oku lia kuaco, okuti o masa! *

Ndaño okuti tuakulu ale tu kuete uloño walua, vosi tua siata oku lueya. Citava okuti, tu lueya poku vangula, poku linga ocina cimue ale ka tua kapeleko ocina cimue kuenje tu ivalako. Momo lie omanu va siatela oku lueya? Tu pondola oku liyaka ndati lakulueya? Citava hẽ oku ci yuvula? Oku kuata ocisimĩlo ca sunguluka catiamẽla koku lueya, ci ka tu kuatisa oku tambulula apulilo aco.

Eci tu linga ocina cimue ciwa, tu tava oku pandiyiwa kuenda tu limbuka okuti tu sesamẽla epandiyo liaco. Eci tu lueya ndaño okuti halocipangoko ale ka ci limbukiwa lomanu vakuavo, ka tu sukila hẽ oku tava okuti tua linga cimue cĩvi? Ocili okuti oku ci linga ci sukila umbombe.

Nda tua likapako calua etu muẽle, ka tu ka limbuka akulueya etu kuenje tu ka vetela evelo vakuetu ale ka tu ka tava ovina tua linga. Ocituwa caco olonjanja vialua ci nena ovitangi. Ocitangi caco ci ka amamako okuti ka ci potoluiwa kuenda omanu vakuavo va ka livetela evelo. Ndño okuti tua yula ocitangi caco cilo, tu sukila oku kũlĩha okuti vokuenda kuotembo, “Suku o ka sombisa omunu lomunu pokati ketu ndeci ci soka lovilinga vietu.”—Va Roma 14:12.

Suku o kuete ovisimĩlo via sunguluka viatiamẽla kakulueya. Kelivulu Liosamo, Suku o tukuiwa okuti “Ukuahenda, o kasi locali,” eye “ka lemaela ño-o hũ. Ka tema tema olonjanja viosi.” Eye wa kũlĩha okuti omanu ka va lipuile kuenda wa kũlĩha ekalo lietu, momo “ivaluka okuti tuneketela.”—Osamo 103:8, 9, 14.

Ndeci Isia umue ukuahenda, Suku o yongola okuti etu tumãla vaye tu kuata ovisimĩlo ndevi viaye viatiamẽla koku lueya. (Osamo 130:3) Ondaka yaye, yeca alungulo alua kuenda olonumbi, vi tu kuatisa oku liyaka lakulueya etu kuenda akulueya a vakuetu.

Eci omunu umue a lueya, o pita otembo yalua loku vetela evelo vakuavo ale oku lisandela esunga lieci a vanguila ocina cimue ale ceci a linga. Pole, ca sunguluka okuti eci o lueyela umue o pinga ongecelo kuenje ukamba wene wamamako. Anga hẽ wa linga cimue cĩvi okuti, ca ku kokela esumuo ove muẽle ale omunu ukuavo? Momo lie ku yuvuila oku vetela evelo vakuene kuenda oku  likolisilako oku yuvula ocitangi caco? Oku amamako oku vetela evelo vakuene, ka ci kuatisa oku potolola ocitangi caco, pole ci ka livokiya. Omo liaco, lilongisa, ci potolola kuenda ivailako.

Eci omunu umue a lueya, ca leluka oku lekisa okuti ka tua ci solele. Ca velapo oku kuama elungulo lia Yesu eci a popia hati: “Ovina viosi vu yongola okuti omanu vo vi lingili, haivio vu linga kokuavo.” (Mateo 7:12) Ocili okuti eci ove o lueya o yongola okuti vakuene va ku kuatela ohenda ale va ivalako ovina wa linga. Momo lie ku lekisilavo ohenda ku vakuene?—Va Efeso 4:32.

O Dicionaliu yimue yi lombolola okuti oku lueya ku tunda kesombiso ka lia sungulukile, ekambo liukũlĩhĩso ale ka tua tiamisile utima kocina cimue tu linga. Tu sukila oku limbuka okuti olonjanja vimue omanu va pondola oku lekisa ovituwa via tukuiwa ndeti. Omo liaco, tu ka tepulula akulueya etu nda tua kapako olonumbi vi sangiwa Vovisonehua.

Cimue pokati Kovisonehua viaco vi sangiwa kelivulu Liolosapo 18:13, kuna tu tangako ndoco: “Nda umue o kumbulula osimbu ka yevele ciwa, wa linga uveke kuenje cu kutisa osõi.” Oku sanda otembo yoku yevelela ovina kuenda oku kũlĩhĩsa etambululo liove ci ku kuatisa oku tambulula lonjila yimue ka ya sungulukile. Ukũlĩhĩso o ka kuata poku konomuisa lutate, ci ka ku kuatisa oku linga esombiso ka lia sungulukile kuenda oku yuvula oku lueya.

Ocisonehua cikuavo Cembimbiliya ci popia hati: “Nda citava, kali vakuambembua lomanu vosi.” (Va Roma 12:18) Likolisilako oku sanda ombembua kuenda omunga. Eci o talavaya lomanu vakuavo, va kapako, lekisa esumbilo kokuavo, likolisilako oku va pandiya kuenda va pamisa. Nda okuti osimbu u talavaya kua molẽha olondaka ale ovilinga vimue vi sumuisa, citava oku ecela lonjanga kuenda nda ocitangi caco calua, ci potoluiwe lombembua.

Lilongisila kokulueya ove. Ku ka lisandele esunga omo liocina cimue wa popia ale wa linga, pole ci tenda ndepuluvi lioku kuata ovituwa viwa. Anga hẽ o sukila oku lekisa epandi, ohenda ale oku likandangiya? Nye ci popiwa catiamẽla kesuluviko, kombembua kuenda kocisola? (Va Galatia 5:22, 23) Citava okuti, o ka lilongisa ovina o sukila oku linga konjanja yikuavo. Ku ka kapeko akulueya osi va ku lingila. Esanju li ku kuatisa oku yuvula oku sumua lonjanga.

Oku kuata ovimĩlo via sunguluka viatiamẽla kakulueya, ci ka tu kuatisa oku lilongisila kakulueya aco. Nda tua ci linga tu ka kuata ombembua letu muẽle kuenda la vakuetu. Nda tua lilongisila kakulueya etu, tu ka kala vakualondunge kuenda omanu va ka tu sola. Ka tu ka kuata ocinyeñowusa ale oku livetela evelo etu muẽle. Oku kũlĩha okuti vakuetu va siatavo oku lueya, ci tu kuatisa oku kuata ukamba lavo. Ca velapo ceci okuti tu ka kuatisiwa poku lilongisa oku setukula ocisola ca Suku kuenda onjongole yaye yoku ecela.—Va Kolosai 3:13.

Eci Margaret wa tukuiwa kefetikilo liocipama a lueya, anga hẽ ca nyõla esanju liepata? Ocili okuti ka ca nyõlele. Omanu vosi, capiãla enene Margaret va ci kapa keselula kuenje va sola okulia kuaco ndaño okuti ka kua endele o masa! Noke lianyamo amue, olonekulu vivali va lombolola ulandu watiamẽla kondalelo yaco liepata komãla vavo kuenda va ivailuka ovina viwa va inakulu yavo va enda oku linga. Ovina viaco via kala lika oku lueya kumue!