1. Ndomo ca tangiwa ku Va Kolosai 2:4, 8, Satana o seteka oku tu yapuisa ndati?

SATANA o yongola okuti tu liwekapo oku sola Yehova. Oco a tẽlise ocimãho caye, o seteka oku vetiya ovisimĩlo vietu oco tu pokole kokuaye. Eye o setekavo oku tu yapuisa, pocakati colonjongole vietu.​—Tanga Va Kolosai 2:4, 8.

2-3. (a) Momo lie tu sukilila oku kapako elungulo li sangiwa ku Va Kolosai 2:8? (b) Nye tu lilongisa vocipama cilo?

² Anga hẽ tu kasi kohele yoku yapuisiwa la Satana? Oco, tu kasi kohele! Ivaluka okuti elungulo li sangiwa ku Va Kolosai 2:8, upostolo Paulu ka li tiamisilile ku vana okuti hakristãoko. Eye wa li tiamisila Kakristão olombuavekua. (Va Kol. 1:2, 5) Ovo, va kala kohele yoku yapuisiwa kuenje etu koloneke vilo, tu kasivo kohele yoku yapuisiwa. (1 Va Kor. 10:12) Momo lie? Momo Satana wa imbiwa palo posi kuenje o yongola oku yapuisa afendeli va Suku vakuekolelo. (Esit. 12:9, 12, 17) Handi vali, tu kasi kotembo yokuti omanu vãvi lolohembi va kasi oku amamako oku ‘linga eci cĩvi.’—2 Tim. 3:1, 13.

³ Vocipama cilo, tu lilongisa ndomo Satana a siata oku kuama “ovisila viomanu” oco a yapuise ovisimĩlo vietu. Tu kũlĩhĩsavo amue pokati ‘katutu’ aye. (Va Efe. 6:11) Vocipama cikuavo, tu ka konomuisa ndomo tu yuvula atutu a pondola oku yapuisa ovisimĩlo vietu. Tete, tu ka konomuisa  ndomo Satana a yapuisa va Isareli noke yoku iñila Vofeka Yohuminyo.

4-6. Ndomo elivulu Liesinumuĩlo 11:10-15 li lekisa, apongoloko api atiamẽla koku lima va Isareli va sukilile oku linga eci va iñila Vofeka Yohuminyo?

⁴ Satana wa seteka oku yapuisa va Isareli oku fendela oviteka. Wa ci linga ndati? Eye wa kũlĩhĩle okuti ovo va sukilile oku lia, omo liaco wa kuama onjila yaco oco a va yapuise. Eci va Isareli va iñila Vofeka Yohuminyo ovo va sukilile oku lilongisa ndomo va lima. Va Isareli eci va kala Kegito, va enda oku tapela ovikũla viavo lovava o kolui Nilu. Pole, Vofeka Yohuminyo ka mua kaile olondui vinene kuenje oco va lime va sukilile ovava ombela kuenda olume. (Tanga Esinumuĩlo 11:10-15; Isa. 18:4, 5) Omo liaco, va Isareli va sukilile oku lilongisa olonjila viokaliye vioku lima. Eci ka ca lelukile kokuavo, momo vosi vana va kuatele uloño woku lima, va fila vekalasoko.

⁵ Yehova wa sapuila afendeli vaye okuti ekalo liavo lia laikele oku pongoloka. Kuenje Yehova wamisako lelungulo lia molẽha ndu okuti ka lia kuatele elitokeko londaka oku lima, olio hati: “Lunguki sanga ovitima viene vi kembisua kuenje vu pambuka loku vumba olosuku viñi, loku vi fendela.” (Esin. 11:16, 17) Momo lie Yehova a va lunguila oco ka va ka fendele olosuku viesanda, osimbu okuti tete wa kala oku vangula catiamẽla konjila yokaliye yoku lima?

⁶ Yehova wa kũlĩhĩle okuti, va Isareli va ponduile oku setekiwa la vakualofeka vana va lisunguile lavo, oco va va longise ndomo va laikele oku lima. Ocili okuti, omanu vana va lisunguile lavo va loñolohele koku lima okuti va Isareli ci sule kuenje afendeli va Suku  nda va lilongisilako uloño umue, pole, nda ca va kokela oku yapuisiwa. Ovisimĩlo via va Kanana vakuakulima, via kunamelele kelongiso lia Baale. Ovo va kolelele okuti Baale eye ukuakueca ombela. Yehova ka yonguile okuti afendeli vaye va yapuisiwa lalongiso aco esanda. Pole, olonjanja vialua va Isareli va nõlelepo oku kuama efendelo lia Baale. (Ate. 25:3, 5; Olong. 2:13; 1 Olos. 18:18) Limbuka okuti Satana wa tẽla oku yapuisa ovisimĩlo via va Isareli.

7. Ekolelo lia va Isareli lia setekiwa ndati eci va iñila Vofeka Yohuminyo?

⁷ Onjanjo yatete Satana a kuama onjongole yomunu yokuti, ombela yi loka oco yi tapele osi. Vofeka Yohuminyo, ombela ka ya lokaile calua kesulilo liosãi ya Kupupu toke Yenyenye Linene. Oco va Isareli va kuate okulia, ca sukilile okuti ombela yi fetika kosãi ya Mbalavipembe. Satana wa vetiya va Isareli oku sima okuti, oco va kuate ekalo liwa va sukilile oku kuama oviholo via vakualofeka. Ovo, va kolelele okuti suku yavo wa ponduile oku nena lika ombela, nda vo fendela. Vana ka va kuatele ekolelo ku Yehova, va simĩle okuti nda va kuama oviholo via vakualofeka vioku fendela Baale, ka ku kala vali ocitenya calua.

8. Yipi onjanjo ya vali Satana a kuama? Ci lombolola.

⁸ Onjanjo yavali Satana a kuama olonjongole vievĩho liukahonga va Isareli va kuata. Omanu vaco vakualofeka poku fendela osuku yavo, va enda oku kongelamo evĩho liukahonga. Elinga liaco liupuepue, lia enda oku lingiwa lakãi kuenda alume va enda oku kala vonembele yaco. Alume oku lipekela lalume kumue lolonjila vikuavo vievĩho liukahonga, via kala ocituwa cimue ca enda oku taviwa la vakualofeka! (Esin. 23:17, 18; 1 Olos. 14:24) Vakualofeka va tavaile okuti efendelo liaco, li vetiya suku yavo oku sumũlũisa osi, oco yime okulia kualua vofeka. Va Isareli valua va yapuisiwa lovituwa via vakualofeka vievĩho liukahonga noke va fetika oku kuama olosuku viesanda. Kuenje va yapuisiwa la Satana.

9. Ndomo ca tangiwa kelivulu lia Hosea 2:16, 17, Satana wa tẽla oku yapuisa ndati va Isareli oco va ivale Yehova?

⁹ Onjanjo yatatu Satana a kuama yoku vetiya va Isareli oku ivala Yehova. Kotembo yuprofeto Yeremiya, Yehova wa popele okuti ovaprofeto vesanda va laikele oku yapuisa afendeli Vaye okuti, va ivalako onduko Yaye oco ‘va tave ku Baale.’ (Yer. 23:27) Afendeli va Yehova citava okuti va liwekapo oku tukula onduko yaye, loku yi piñainya londuko ya Baale okuti yi lomboloka “Cime cange.” Eci ca kokela atatahãi va Isareli oku limbuka etepiso li kasi pokati ka Yehova la Baale kuenje eci nda ca va leluisa oku tenga efendelo lia Baale leli lia Yehova.—Tanga Hosea 2:16, 17.

10. Olonjanjo vipi Satana a siata oku kuama koloneke vilo?

¹⁰ Satana koloneke vilo o kuamavo olonjongole viaco. Eye o seteka omanu lolonjongole viavo, levĩho liukahonga kuenda oku va tateka oku kũlĩha Yehova. Tete tu konomuisa onjanjo yatatu.

11. Ndamupi Satana a vetiya omanu oku ivala Yehova?

¹¹ Satana o vetiya omanu oku ivala Yehova. Noke yoku fa kuovapostolo va Yesu, vana va enda oku litukula hati, Akristão va fetika oku longisa uhembi. (Ovil. 20:29, 30;  2 Va Tes. 2:3) Olonanguluke viaco via fetika oku tateka ocili catiamẽla ku Suku. Ndeci, ovo va liwekapo oku tukula onduko ya Suku Vambimbiliya avo kuenda va nõlapo oku yi tukula okuti “Ñala.” Omo lioku piñanya onduko ya Suku la “Ñala,” ci kasi oku tateka omanu vakuakutanga Embimbiliya oku limbuka oku litepa ku kasi pokati ka Yehova ‘loloñala’ via tukuiwa Vembimbimbiliya. (1 Va Kor. 8:5) Ovo va tukula Yehova la Yesu okuti “Ñala” kuenje eci ci tateka omanu oku limbuka okuti Yehova la Yesu va litepa. (Yoa. 17:3) Omo liaco, elongiso liokuti suku umosi muvatatu li kasi oku livokiya, pole, elongiso liaco, ka li sangiwa Vondaka ya Suku. Kuenje, omanu valua va tava okuti ka va pondola oku kũlĩha Suku. Eci haciliko!—Ovil. 17:27.

12. Ndomo ca tangiwa ku Va Roma 1:28-31, atavo esanda nye a siata oku vetiya kuenda nye ca siata oku yililako?

¹² Satana o vetiya omanu oku linga evĩho liukahonga. Kotembo ya va Isareli, Satana wa kuama etavo liesanda oco a vetiye evĩho liukahonga. Koloneke vilo, eye o kuamavo olonjila vimuamue. Etavo liesanda liecelela kuenda li vetiya evĩho liukahonga. Omo liaco, vana va li tukula okuti va fendela Suku va siata oku siapo olonumbi via sunguluka. Ukanda upostolo Paulu a sonehela va Roma wa tukula onima yi yilila koku likala olonumbi viaco. (Tanga Va Roma 1:28-31.) Pokati ‘kovina viumbondo’ mu sangiwa evĩho liosi liukahonga oku kongelamo oku lipekela kuomanu vakuavimatamata vimuamue. (Va Rom. 1:24-27, 32; Esit. 2:20) Ci kuete esilivilo lialua oku kapako olonumbi Viembimbiliya!

13. Onjanjo yipi yikuavo Satana a siata oku kuama?

¹³ Satana o yapuisa omanu lolonjongole viavo. Vosi yetu tu kuete onjongole yoku lilongisa uloño umue, okuti tu pondola oku likuatisa kuenda oku kuatisa epata lietu. (1 Tim. 5:8) Pamue tu kuata uloño waco omo lioku lilongisa kosikola loku kala ondonge ya loñoloha. Pole, tu sukila oku lekisa utate. Kolofeka vimue, olondonge ka vi lilongisa lika uloño, pole, vi lilongisavo olondunge violuali. Olondonge vi vetiyiwa oku patãla okuti ka kuli Suku kuenda oku patãla eci Embimbiliya li popia. Olondonge viaco vi  popia okuti omunu wosi wa loñoloha o tava okuti ovina via tukuluka ño. (Va Rom. 1:21-23) Elongiso liaco, lia litepa ‘lukũlĩhĩso wa Suku.’—1 Va Kor. 1:19-21; 3:18-20.

14. Olondunge violuali via siata oku vetiya omanu oku linga nye?

¹⁴ Olondunge violuali vi patãla ovihandeleko viesunga via Yehova. Eci ka ci vetiya oku lekisa epako liespiritu lia Suku, pole, ci vetiya “ovilinga vietimba.” (Va Gal. 5:19-23) Olondunge violuali, vi vetiya oku kala ukuepela oku litunula kuenda omanu va linga “vakuakulisola ovo muẽle.” (2 Tim. 3:2-4) Ovituwa viaco via litepa leliketiso, lumbombe, okuti ovio ovituwa afendeli va Suku va vetiyiwa oku lekisa. (2 Sam. 22:28) Akristão vamue va siata oku pita kolosikola via velapo, ovisimĩlo viavo via pongoluiwa lovisimĩlo violuali okuti, via Suku havioko. Tu kũlĩhĩsi ulandu umue u lekisa eci ci pondola oku pita letu nda ka tua kuatele utate

15-16. Nye wa lilongisa kulandu wa manji umue ukãi?

¹⁵ Manji umue ukãi o kasi kupange wotembo yosi ci pitãhala 15 kanyamo, wa popia hati: “Omo okuti nda papatisiwile ale, nda kũlĩhĩle ale ohele yi tunda koku iñila kosikola yavelapo, pole, sia kapeleko elungulo liaco. Nda simaile okuti elungulo liaco ka li tiamisiwila kokuange.” Ovitangi vipi manji a liyaka lavio? Eye wa popia vali hati: “Oku iñila kosikola yaco, ca pesela otembo yange, longusu kuenda sia kuatele vali otembo yoku likutilila ku Yehova ndomo nda lingaile, nda kavaile calua okuti ca tĩlile oku longisa Embimbiliya komanu kuenda oku pongiya ciwa ovipama violohongele. Ndi pandula  calua, omo cilo nda limbuka okuti elilongiso lia velapo lia kapele kohele ukamba wange la Yehova, noke nda sukilile oku liwekapo. Kuenje nda ci linga.”

¹⁶ Ovisimĩlo vipi manji a kuata omo lielilongiso liaco? Eye wa tambulula hati: “Ñuete osõi yoku popia okuti, elilongiso nda kuama lia ñokela oku sepula vakuetu, ca piãla enene vamanji, poku lavoka kokuavo ovina ka vi kasi vepondolo liavo kuenda oku liamũha lavo. Papita otembo yalua oco ndi siepo ovisimĩlo viaco. Ulandu nda pita lawo wa ndongisa okuti, oku sinĩla alungulo a eciwa la Isietu wokilu pocakati cocisoko caye, ci koka ohele. Yehova wa ñulĩha ciwa, okuti ame muẽle ci sule. Nda sukilile oku pokola kokuaye!”

17. (a) Nye wa nõlapo oku linga? (b) Nye tu ka lilongisa vocipama cikuavo?

¹⁷ Omo liaco, amamako oku yuvula oku yapuisiwa “lolondunge violuali kuenda ovisila viomanu” violuali lua Satana. Ku ka kembiwa la Satana. (1 Va Kor. 3:18; 2 Va Kor. 2:11) Ku ka ecelele okuti Satana oku kokela oku ivalako Yehova kuenda onjila ndomo eye a yongola okuti u fendela. Kapako olonumbi viesunga via Yehova. Ku ka ecelele okuti Satana oku vetiya oku sinĩla alungulo a Yehova. Nye o sukila oku linga, nda wa limbuka okuti o kasi oku yapuisiwa lovisimĩlo violuali lulo? Ocipama cikuavo, ci ka lekisa ndomo Ondaka ya Suku yi pondola oku tu kuatisa oku nyõla “ovina via pama ndombonge,” kovisimĩlo kuenda kovituwa.—2 Va Kor. 10:4, 5.