Olonjali vimue viokatumba vi kuete ovitangi omo ka vi tẽla oku linga ukamba lomãla volongenda la ina, ale olongenda la isia. b Olonjali vialua, vi sukila oku sapela ciwa lomãla vaco, poku linga ovina vimue ndeci: Oku va pasuisa, oku va pindisa kuenda oku eca ekuatiso va sukila. Akamba kuenda omanu vakuavo vakuepata, pamue ci va tĩlila oku linga ukamba lepata liokatumba. Konomuisa ­ndomo olonumbi Viembimbiliya vi pondola oku kuatisa olonjali viokatumba oku yula ovitangi viaco.

Ina umue wokatumba ko Namibia o tukuiwa hati Judith, wa popia ndoco: “Ulume wange, ukãi waye wosimbu, wa siata oku sapuila omãla vaye hati, omo okuti cilo nda linga ukãi wa isiavo, omãla vosi tu cita, ka citava oku va tenda nda vamanjavo. Olondaka viaye via ndi sumuisa calua, momo ndi sole omãla vaco ndeci ndi sole omãla vange.”

Olonoño vi tava okuti omãla vonjali yikuavo, va pondola oku nenela ovitangi olonjali viokatumba. Pole, olonjanja vimue ina yomãla la ina yokatumba, ovo va siata oku koka ovitangi viaco. Nye ci pondola oku va kuatisa?

Ceci ci nena esanju: Lekisa esunguluko komanu vosi. Nda ove unjali yokatumba, ku ecelela okuti omãla vove va linga ukamba la isiavo, ale la inavo wa va cita, omãla vaco va sumua calua. c Onjali yina ya ‘cita omãla’ yi kuete esilivilo lia velapo kokuavo. (Olosapo 23:22, 25) Nda okuti ohueli yove yosimbu ya siata oku sakalaisa vakuanjo yove, eci ci pondola oku temisa kuenda oku sumuisa ohueli yove yokaliye. Omo liaco, likolisilako oku lekisa esunguluko komanu vosi oco o teyuile ohueli yove, osimbu amamako oku kuatisa ohueli yove yosimbu nda ci tẽliwa.

OLONUMBI KOLONJALI VIA CITA OMÃLA

▪Poku sapela lohueli yove yosimbu, tiamisila ombangulo yaco komãla vene kuenda ku ka vangule ovina viatiamẽla kovitangi vikuavo. Pulisa lutate nda citava oku sokiya otembo yoku sapela lomãla olonjanja vialua votelefone. Oku ci linga, ci kuatisa vali okuti oku vangula lika votelefone olowola vimue kutanya, ale kuteke ci sule.

▪Nda ku kuete omoko yoku kala lomãla vove, oku va vilikiya votelefone, oku va tumisa ovikanda, lasapulo vo telefone kuenda vo Internet, ci ku kuatisa oku sapela lavo olonjanja vialua. (Esinumuĩlo 6:6, 7) Vamue va siata oku sapela lomãla vavo lolonjila vikuavo. Citava okuti o limbuka ovisimĩlo viomãla vove kuenda o ku va ĩha olonumbi viwa vi pondola oku va kuatisa.

OLONUMBI KU VA INA YOKATUMBA

• Kuatela ‘ohenda’ onjali yina ya cita omãla poku lekisa okuti, ku kasi oku seteka oku tambula ocikele caye. (1 Petulu 3:8) Olonjanja viosi u sapuila ovina viwa omãla va siata oku linga. (Olosapo 16:24) U pinga oco a ece alungulo, kuenje eci a ci linga, eca olopandu kokuaye.

• Ku ka lekise onyina yalua komãla eci vu kala la inavo wa va cita. Ina umue wokatumba o tukuiwa hati, Beverly ko Estados Unidos, wa popia hati: “Omãla vange volongenda la ina va siata oku ndi tukula vati, Mãi. Eci tu kala konjo, tu tava kokuavo momo tua limbuka okuti, ca sunguluka, pole, olonjanja vimue va ndi vilikiya okuti a Mãi ponele ya inavo Jane wa va cita, ale ponele yepata lia inavo. Ame la Jane tua lika ciwa. Kuenje, noke tua siata oku kuatisa omãla oku linga olomapalo vio kosikola kuenda oku ñuala ñuala lavo.”

NDOMO OLONJALI VIA CITA LOLONJALI VIOKATUMBA VI KUATA UKAMBA

• Lalimue eteke ku ka popie lãvi onjali ya cita, ale onjali yokatumba ponele yomãla. Ca leluka oku vangula ovina vĩvi, pole ovina viaco, vi pondola oku sumuisa calua omõla. Kuenda kua kũlĩhĩle ndomo olondaka viove vi ka pituluiwa. (Ukundi 10:20) Nda omõla oku sapuila hati, onjali yikuavo, ale onjali yokatumba ya ku popia lãvi, tiamisila utima wove kovisimĩlo viomõla. Citava okuti ove o popia ndoco: “Va ngecele omo wa yeva ovina viaco. Mãi yove wa ndi sumuisa calua, kuenda olonjanja vimue eci omanu ka va lipuile va yeva onyeño, va tukula ovina ka va yongola oku popia.”

• Eca alungulo amuamue kapata avali. Nda ka ca lelukile oku ci linga, lombolola etepiso liaco, pole ku ka sepule onjali yikuavo. Sokolola ulandu u kuãimo:

  Ina yokatumba: A Tim, nyalẽha etuaya liove.

  Tim: Eci tua kala la Mãi, tua enda oku sia atuaya posi kuenje, eye o a nyalẽha.

  Ina yokatumba (o tambulula lonyeño): Nyõho, wa ku longisa usiã.

  Siti nda ca sunguluka oku tambulula lolondaka vi kuãimo?

  Ina yokatumba (o vangula loku unjuka): Ciwa. Kulo tua siata oku a nyalẽha kukolo.

• Yuvula oku tuma omãla oku linga ovopange amue, votembo yina va sukila oku kala kumue lonjali yikuavo. (Mateo 7:12) Nda okuti upange waco ka citava oku u linga kepuluvi likuavo, pinga konjali yikuavo osimbu handi kua sapuilile omãla ovina wa sokiya.

Elivulu losapi hati, Step Wars, li tukula ukãi umue wa lisiõsiõla hati, ulume waye wa siata oku tundila olunda omãla vaye va kula kuenda o likala okuti, ka kũlĩhĩle ndomo omãla vaco vo lavisa. Noke ukãi waco wa popia ndoco: “Onyeño yange ya wenguka calua.” O kuatisa ndati omãla vove va kula oco ukamba va kuete lohueli yove wa amameko?

Ceci ci nena esanju: Lekisa Ohenda. Embimbiliya li popia ndoco: “Lomue ka ka sande eci caye, te eci cukuavo.” (1 Va Korindo 10:24) Seteka oku limbuka loku kũlĩha ovisimĩlo viomunu ukuavo. Omãla vana va kula ale, pamue va kuata ohele yokuti ka va soliwe vali lolonjali viavo. Ale va sima okuti, omo liukamba va kuete lonjali yokatumba, ka va soliwa vali lonjali yina ya va cita. Handi pamue olonjali vi sima okuti, nda via lemẽla omãla vavo, ovo va tila.

Ku ka kisike oku linga ukamba, pole ecelela okuti ukamba waco lomãla u kula owo muẽle. Olonjanja vimue kaciwako oku kisika omunu oco a lekise ocisola. (Ocisungo ca Salomone 8:4) Omo liaco, lekisa esunguluko poku linga ukamba lomãla vokatumba.

Ku ka tukule ovina vi kasi vutima wove, ndaño va ku tata lãvi. (Olosapo 29:11) Lavulula upopi wove ndaño ka ca lelukile oku ci linga, poku likutilila ndeci Soma Daviti a linga poku popia hati: “Kapa ondavi komẽla wange, a Yehova. Lava epito liomẽla wange.”—Osamo 141:3.

Nda o nõlapo oku kala vonjo yina omãla va kulila, citava okuti o komõha ndomo va sole onjo yaco. Ku ka linge apongoloko vonjo yaco, ca piãla enene vohondo yavo yosimbu. O sukilavo oku kũlĩhĩsa oku ilukila vonjo yikuavo.

Ina umue wokatumba o tukuiwa hati, Marion ko Kanada, wa popia ndoco: “Olonjali viange via siata oku nyĩha olombanjaile oco ndi viece komãla vange, pole ka vi eci olombanjaile kulume wange. Olonjanja vimue tu seteka oku landa olombanjaile vietu, pole ka tu kuete ndomo tu ci linga.”

Ceci ci nena esanju: Velisapo epata liove. Sapuila epata liohueli yove yosimbu, okuti wa linga ohuminyo lepata liokaliye. (1 Timoteo 5:8) Ndaño okuti ku lavoka oku soliwa lonjanga la vosi vakuepata liohueli yove yokaliye kuenda akamba vaye, pinga kokuavo oku lekisa ovituwa viwa kuenda oku kala vakuesunguluko. Lombolola ndomo omãla vohueli yove yosimbu va pondola oku yeva esumuo, nda ku lekisa ohenda kokuavo.

Ecelela va sekulu yomãla volohuela viove viosimbu, oku kuata ukamba lomãla vove. Ina umue wo ko Inglaterra o tukuiwa hati Susan, wa popia ndoco: “Noke yolosãi ekũi lecelãla tunde eci ulume wange a fa, nda kuela vali, kuenje vakuepata liulume wange wosimbu ka va solele ulume wokaliye. Ovina via pongoloka eci tua fetika oku va kongela vomuenyo wetu ndeci oku kala lomãla, oku sapela lavo, loku pandula eci va tu kuatisa.”

Oku linga ukamba volohuela viokaliye lomanu vakuavo, ci pondola oku nena ovitangi. Nda wa kapako elungulo Liovisonehua, epata liove li ka tambula asumũlũho alua, momo Embimbiliya li popia hati: “Onjo yi tungiwa lolondunge, yi kolisiwa luloño.”—Olosapo 24:3.