“Suku yokilu o katula usoma, kuenje ka u nyolẽha, ka u tambuiwa lomanu vofeka yiñi; puãi owo u nyõla loku lia ovosoma aco osi, haiwo u kala muẽle hũ oloneke ka vi pui.”—Daniele 2:44.

Usoma wa Suku uviali umue wo kilu. Yesu Kristu eye wa nõliwa oco a kale Ombiali yi ka piñanya olombiali viosi viomanu kuenda oka ecelela okuti, ocipango ca Suku ci lingiwa palo posi ndeci ci kasi oku lingiwa kilu. (Mateo 6:9, 10) Uviali waco ka u ka piñanyiwa luviali womunu momo, owo ‘usoma ka u pui wa Ñala yetu Yesu Kristu.’ Kuenje, ku ka kala ombembua ka yi pui.—2 Petulu 1:11.

‘Satana o liluvikiya ndungelo wocinyi. Nda oloñuatisi viaye vi liluvikiya ndoloñuatisi viesunga, ka ci komohisa. Esulilo liavo li ka sokisiwa lovilinga viavo.’—2 Va Korindo 11:14, 15.

Atavo esanda a ka kunduiwa kumue lovilinga Vieliapu. Omo okuti atavo esanda a kuete olonepele, kuenda a siata oku pesela osonde, ka a ka kalako vali. Ovina viaco vi ka ecelela okuti omanu vana va sole “Suku yocili o kasi lomuenyo” vo fendela ‘lekolelo, lespiritu kuenda ocili.’ Kuenje, ci ka nena ombembua pokati komanu loku li kuata omunga!—1 Va Tesalonike 1:9; Va Efeso. 4:5; Yoano 4:23.

“Suku o ka kala kumue lavo. Eye o ka puenya asuelẽla osi vovaso omanu. Oku fa ka ku ka kalako vali, ndaño oku lila loku liyula lupongo laviovo ka vi ka kalako vali. Momo ovina viatete vi ka pita.”—Esituluilo 21:3, 4, NW.

Yehova Suku oka tẽlisa olohuminyo viaco vonduko Yomõlaye, Yesu, una wa fila omanu vosi voluali. (Yoano 3:16) Vemehi liuviali wa Yesu, omanu va ka lipua. Ka ku ka kala vali ohali, momo ‘Suku o ka kala kumue lomanu kuenda o ka puenya asuelẽla osi vovaso avo.’ Ekambo lio ku lipua kuenda ohali vi ka pua; ‘momo olondingesunga vi ka piñala ofeka, kuenda vi ka tungamo oloneke ka vi pui.’—Osamo 37:29.

‘Yesu Kristu wa kuata ocinyoha cinene, haiyo onyoha yosiahũlu. Onyoha yaco okuti Satana Eliapu, ungelo wo kuta oco a kale kelienge ohulukãi yanyamo. Noke, wa imbiwa vekungu, loku u yikilamo okuti, ka kembi vali olofeka.’—Esituluilo 20:2, 3.

Eci Satana kumue lolondele viaye va ka imbiwa “vekungu,” atutu aye ka a ka kalako vali. Satana ka ka kuata vali ongusu yoku yapuisa omanu. Omanu va ka kuata ombembua, momo voluali ka mu ka kala vali atutu a Satana kumue lolondele viaye!

“Oloneke via sulako” vi ka sulila ‘kohali ya pialã’ Yesu a tukula hati: “Koloneke viaco ku kala ohali ya lua, yimue ya linga ndoyo ka ya leya tunde kefetikilo lioluali toke cilo, kuenje ka yiya vali.”—Mateo 24:21.

Ohali yaco yi ka pialã okuti lalimue eteke yi keya vali. Uyaki waco uka sulila ‘kovita vieteke linene lia Suku Tõlo,’ u tukuiwa hati “Harmagedo.”—Esituluilo 16:14, 16.

Omanu vosi va sole ovina via sunguluka va lavoka lesanju esulilo lioluali lulo lua vĩha. Kũlĩhĩsa asumũlũho amue Usoma wa Suku u ka nena.

“Owiñi wakahandangala” u ka teyuiwa voluali luokaliye muna mu kakala ombembua: Ondaka ya Suku yi popia hati: “Owiñi wakahandangala” womanu va tunda ‘kohali ya piãla,’ u ka popeliwa oco u kale voluali luokaliye luesunga. (Esituluilo 7:9, 10, 14; 2 Petulu 3:13) Owiñi waco u ka velisapo eyovo litunda ku Yesu Kristu okuti, eye “Kameme ka Suku, u upa akandu oluali.”—Yoano 1:29.

Ekuatiso li tunda kelongiso lia Suku: Voluali luokaliye, ‘mu ka yuka ukũlĩhĩso wa Yehova.’ (Isaya 11:9) Velongiso litunda ku Suku mu ka kongela oku longisiwa ndomo tu kala lombembua lomanu vosi kuenda lovina viosi via tu ñuala. Suku wa likuminya hati: “Ame ndi Yehova Suku yove, hu longisa eci cu ku kuatisa, hu songuila vonjila ya ku sungulukila.”—Isaya 48:17.

Omanu va fa va ka pinduiwa: Yesu eci a kala palo posi, wa pindula ekamba liaye Lasaru wa file. (Yoano 11:1, 5, 38-44) Ohuminyo eyi, yeca uvangi wokuti, veliangiliyo Liusoma wa Suku, Yesu o ka pindula omanu valua.—Yoano 5:28, 29.

Ku ka kala ombembua ka yipui, kuenda esunga: Vuviali wa Kristu, ovina viosi ka vi likuata locihandeleko ca Suku, ka vi ka kalako vali. Tua ci kũlĩha ndati? Omo okuti Yesu o kuete epondolo lioku kũlĩhĩsa ovitima viomanu, o ka talavaya lunene waco oco a sombise olondingesunga kuenda olondingãivi. Vana ka va yongola oku siapo ovituwa ka via sungulukile, ka va ka kuata epuluvi lioku kala voluali luokaliye lua Suku.—Osamo 37:9, 10; Isaya 11:3, 4; 65:20; Mateo 9:4.

Toke cilo, tua konomuisa onepa yimue yovitumasuku Viembimbiliya vi lekisa okuti, tu ka kuata ekalo liwa kovaso yoloneke. Eci Usoma wa Suku u ka viala ongongo, ‘ombembua’ yi ka kala otembo ka yipui. (Osamo 37:11, 29) Ovina viosi vi koka evalo kuenda ohali komanu, ka vi ka kalako vali. Omo liaco, tu lavoka oku tẽlisiwa kuohuminyo eyi ya Suku yokuti: “Tala ovina viosi ndi vi lingisa viokaliye. . . . momo olondaka evi via sunguluka, kuenda viocili.”—Esituluilo 21:5.