A nga hẽ ovalandu Embimbiliya ocili? Omanu va fetika hẽ oku vangula alimi vepuluvi limuamue ndomo ca tukuiwa? Vamue va patãla ulandu Wembimbiliya u lekisa ndomo omanu va fetika oku vangula alimi a litepa kuenda oku li sanduila kolonepa viosi violuali. Ulume umue usonehi wa popia hati: “Ulandu watiamẽla kombonge yo Bavele wesanda.” Ulongisi umue u Yudea wa popia hati: “Oku lombolola ono yapata uveke.”

Momo lie omanu ka va tavela kulandu wo Bavele? Ocisimĩlo caco ka ci likuata lono yalimi. Olonoño vimue via popia hati: Alimi a vanguiwa ka a tukulukile ocipikipiki pole, a tunda kalimi “omanu va vangula tunde vutila.” Vakuavo va tava okuti alimi alua a tunda kolondaka viatatama. Ovisimĩlo evi ka vi likuata leci Ulongisi W. T. Fitch, velivulu liaye losapi hati: The Evolution of Language a soneha ndoco: “Ka tu kuete handi atambululo a suapo.”

Vakuakulembulula ovina via lembikiwa kuenda va kua kũlĩhĩsa, nye va popia catiamẽla kono yalimi kuenda koku livokiya kualimi? Anga hẽ ovina va sanga vi likuata lovisimĩlo via tukuiwa ndeti? Ale ovina va sanga vi likuata lulandu wo Bavele? Tu kũlĩhĩsi tete ulandu Wembimbiliya.

Embimbiliya li tukula oku pongoluiwa kualimi kuenda oku lisanduila kuomanu kovitumãlo vialua oku tunda ‘ketapi liofeka yo Sinare’ okuti noke yeya oku tukuiwa hati, o Bavulono. (Efetikilo 11:2) Otembo yipi kua pita ocina caco? Embimbiliya li popia okuti “omanu va ­tepiwa” koloneke via Pelegi eci kua kambele 250 ­kanyamo osimbu Avirahama ka citiwile. Citava okuti tunde eci kua pita ulandu wo Bavele papita ale ci soka 4.200 kanyamo.—Efetikilo 10:25; 11:18-26.

Olonoño vikuavo via popia hati, alimi a vanguiwa koloneke vilo a tunda kelimi liolojali, okuti tunde eci va fetika oku li vangula pa pita ale ci panda 100.000 kanyamo. a Vakuavo va popia vati alimi a vanguiwa koloneke vilo, a tunda kalimi alua omanu va vangowaile kosimbu okuti papita ale 6.000 kanyamo. Pole, alimi a livokiya ndati? Orevista yimue losapi hati, Economist, yi popia hati: “Etambululo liepulilo eli lia tatama. Va kuaku lilongisa ovina vi kasi lomuenyo ka va kuatele ovina vi va kuatisa oku kũlĩha ovolandu a pita kosimbu. Orevisata yaco yamisako hati, oku livokiya kualimi ku tiamisiwila kovisimĩlo vimue, pole ka via suilepo.”

Pole, kuli “olono vialimi.” Olono viaco vi lomboloka nye, kuenda vi situlula ndati alimi omanu va vangula? O Nova Enciclopédia Britânica, yilombolola ndoco: Oco tu sange ulandu u lekisa elimi omanu va enda oku soneha, te tua tiukila eci ci soka 4.000 ale 5.000 kanyamo kosimbu.” Pi vakuakulembulula ovina via ­lembikiwa va sanga “ulandu welimi lia sonehiwa”? Kombuelo yo Mesopotâmia pocitumãlo pa kala ofeka yo Sinare kosimbu. b Omo liaco, ulandu owu u likuata leci ca tukuiwa Vembimbiliya.

Ulandu Wembimbiliya u popia okuti, eci omanu va kala oku tunga o Bavele, Suku ‘wa pongolola elimi liavo, oco ka va ka liyeve vali pokati.’ (Efetikilo 11:7) Kuenje “va liwekako oku tunga imbo” lio Bavele kuenda ‘va li sanduila kuosi kilu lieve.’ (Efetikilo 11:8, 9) Embimbiliya ka li popi okuti alimi osi a tunda “kelimi limuamue.” Olio li lekisa okuti kueya alimi o kaliye, okuti elimi lelimi li situlula ovisimĩlo lolonjongole viomunu, kuenda alimi osi a litepa.

Nye ci popiwa catiamẽla kalimi a vanguiwa voluali koloneke vilo? Anga hẽ alimi osi amuamue ale a litepa? Onoño yimue wacitiwila ko Belarus o tukuiwa hati Lera Boroditsky, wa soneha ndoco: “Vakuakukonomuisa alimi, va kũlĩhĩsa lika ondaka yimosi yeci ci soka 7.000 a vanguiwa voluali, kuenda va limbuka okuti alimi a litepa calua.” Ndaño okuti alimi amue a lisetãhala ndeci elimi lio Cantonese kuenda o Hakka a vanguiwa kombuelo yo China, pole, a litepa lalimi akuavo a lisetãhala ndeci elimi lio West Catalan, ale lio Valencian, ana a vanguiwa ko Espanya.

Elimi lelimi omanu va vangula li kuete onjila ya litepa yoku lombolola ovina vimue ndeci: Avala, oku tukula etendelo liocina cimue, ocitumãlo kuenda onumbi. Kelimi limue omunu o pondola oku popia ndoco: “Keka liove liondio kuli ocipuka.” Pole, kelimi likuavo o popia ndoco: “Keka liove lioko nele yombuelo kuli ocipuka.” Oku li tepa kualimi kua tukuiwa ndeti ku sulemo. Omo liaco, ka cikomohĩsa oku limbuka okuti omanu va kala oku tunga ombonge yo Bavele ka va tẽlele oku amamako lupange wavo.

Elimi lipi omanu va vangowaile kefetikilo?

Embimbiliya lilombolola okuti ulume watete Adama, wa kuata epondolo lioku limbuka olondaka viokaliye eci a luka olonduko ovinyama viosi kuenda ovina vipãlala. (Efetikilo 2:20) Adama wa tukula olondaka viesivayo poku situlula olonjongole viaye kukãi waye kuenda wa lombolola ciwa ocihandeleko ca Suku kuenda ovitangi vi yilila koku tomba ocihandeleko caye. (Efetikilo 2:23; 3:1-3) Elimi liatete, lia kuatisa omanu oku sapela pokati.

Epongoloko lialimi lia pita ko Bavele lia ecelela omanu oku talavaya luloño kuenda ongusu yavo. Pole, elimi liavo liokaliye liatatamele, ndeci ca kala elimi liatete. Ka papitile otembo yalua alume va tunga alupale alua, va sokiya ovimunga via sualali kuenda oku linga ovina vikuavo. (Efetikilo 13:12; 14:1-11; 37:25) Va tẽla ndati oku vokiya ukũlĩhĩso welimi kuenda elitokeko liolondaka? Ndomo ca lekisiwa Vembimbiliya okuti elimi liatete liomanu kuenda alimi a fetikila ko Bavele, ka a piñaliwile kolosima, pole alimi atatama.

Akonomuiso a lingiwa koloneke vilo, a likuata locisimĩlo eci. O Enciclopédia de Cambridge Yalimi yi popia ndoco: “Ndaño omanu vamue va molẽha ndu okuti vambata omuenyo umue wa leluka, elimi va vangula li amamako oku kuata olondaka viokaliye, pole, li amamako oku tatama.” Ulongisi Steven Pinker wo kosikola Harvard College velivulu liaye losapi Language Instinct, wa soneha ndoco: “Alimi osi a kasi oku kuata Olondaka Viokaliye.”

Noke yoku konomũisa “ono” yalimi, oku litepa ku kasi pokati kalimi aco, kuenda oku tatama kualimi osimbu, ocisimĩlo cipi tu kuete? Omanu valua va popia okuti ulandu Wembimbiliya wa tiamẽla kocitumãlo co Bavele, wocili.

Embimbiliya li tu sapuila okuti Yehova Suku wa pongolola alimi omanu ko Bavele momo, va lekisa esino. (Efetikilo 11:4-7) Pole, eye wa likuminya hati: ‘Mongolola upopi womanu, ho pui esanda, okuti vosi yavo va vilikiya onduko ya Yehova, loku u vumba lutima umuamue.’ (Sofoniya 3:9) ‘Upopi wa pua esanda,’ ocili ci sangiwa Vondaka ya Suku okuti ci kasi oku kongela omanu vosi voluali koloneke vilo. Omo liaco ca sunguluka oku sima okuti kovaso yoloneke Suku o ka kongela omanu loku va ĩha elimi limuamue oco a maleko ombuanja ya fetikila ko Bavele.