Onatele ya siata oku tukuiwa okuti ocipito Cakristão coku sambiliya oku citiwa kua Yesu. Ovihilahila vialua vi lingaiwa kocipito caco, ci tu kokela oku lipula ndomo ocipito caco ca fetika oku tiamisiwila koku citiwa kua Yesu.

Momo kuli uhembi umue va siata oku tukula okuti Papai Noel. Kunyamo wo 1931, omo liovihilahila ndeci, eteke liesanju, olonjele vi yela, oku pindala atama levala li kusuka kuenda Papai Noel wa wala uwalo u kusuka, ko Estados Unidos kuli onjo yimue yoku panga o serveja ya siata oku nganyala olombongo vialua, omo lioku kapa oviluvialuvia viaco vololata vio serveja. Oku upisa kunyamo wo 1950, vamue vo kofeka yo Brasil va seteka oku pongolola Papai Noel lomunu umue wa kemãla vofeka yavo, loku u tukula okuti Kukululu yomanu vo kofeka yo India. Onima yipi yeyililako? Ulongisi umue o tukuiwa hati, Carlos E. Fantinati, wa popia okuti, “Papai Noel wa velapo okuti Kukululu yomanu vo kofeka yo India kuenda oñaña Yesu va sule. Kuenje Papai Noel wa linga ocindekaise ca velapo koku sambiliya eteke 25 ya Cembanima.” Anga hẽ uhembi wa Papai Noel owo lika ocitangi catiamẽla Konatale? Oco tu sange etambululo tu kũlĩhĩsi ulandu wekongelo liatete Liakristão.

“Elivulu limue lia lombolola okuti, “Vokuenda kuocita catete kuenda cavali, Ekongelo liatete lia lambalaliwa calua omo lioku likala oku sambiliya eteke lioku citiwa kuomanu va pondiwa, kuenda oku citiwa kua Yesu.” Momo lie? Momo Akristão va tendele ovipito vioku sambiliya eteke lioku citiwa ndocituwa ca vakualofeka ovo va sukilile oku yuvula. Ocili okuti, Vembimbiliya ka mu sangiwa eteke Yesu a citiwa.

Eci pa pita ci pitahãla 400 kanyamo noke yolofa via Yesu, ndaño okuti Akristão vatete va enda oku likala oku sambiliya eteke lioku citiwa, Etavo Liokatolika, lia tumbika ocipito Conatale. Onembele ya yonguile oku kuata ekemãlo. Kuenje omo liekemãlo liaco, ya kisika omanu valua oku sambiliya ocipito Conatele. Unyamo lunyamo oku upisa keteke 17 ya Cembanima toke keteke 1 ya Susu, “onepa yalua ya va Roma va enda oku linga ovipito, oku yeva, oku litumbika kayele, oku linga olomapalo, kuenda oku linga ovipito vikuavo vioku sivaya olosuku viavo. Kuenje keteke 25 ya Cembanima, va Roma va enda oku sambiliya oku tunda kuekumbi. Onembele poku tumbika Onatele, ya yonja va Roma valua oku sambiliya oku citiwa kua Yesu okuti, oku tunda kuekumbi hakuokuo. Elivulu limue lia sonehiwa lulume umue o tukuiwa hati, by Gerry Bowler lia lombolola ndoco: handi va amamako oku linga ovipito viaco kotembo yombambi.” Ocili okuti, ovo “va amamako oku sambiliya eteke liowusa liokaliye lovihilahila viosimbu.”

Ovipito Vionatale ka vi kuete efetikilo liwa. Ulume umue o tukuiwa hati, Stephen Nissenbaum, velivulu a soneha wa lombolola okuti, “Onatale ocipito cimue ca vakualofeka ca luvikiyiwa oco ci molẽhe ndu okuti Cakristão.” Pole, Onatale yi sepula Suku kuenda Omõlaye Yesu Kristu. Anga hẽ ondaka eyi yi kuete esilivilo? Embimbiliya li pula ndoco: “Esunga li kuete ukamba we leci hacesungako? Ale, ocinyi ci kuete ukamba we lowelema?” (2 Va Korindo 6:14) Ndeci uti umue u kula okuti nda wa penga lomue o tẽla oku u pengulula, cimuamue haico ci pita Lonatele okuti ka citava oku yi ‘pengulula.’—Ukundi 1:15.