بائبل کے مطابق اِسرائیل کے بادشاہ داؤد گیارہویں صدی قبل‌ازمسیح میں رہتے تھے اور اُن کی نسل سے آنے والوں نے سینکڑوں سال تک حکمرانی کی۔‏ لیکن کچھ لوگوں کا کہنا ہے کہ داؤد ایک فرضی کردار تھے اور اُن کے بارے میں بہت عرصے بعد کہانیاں گھڑی گئیں۔‏ کیا بادشاہ داؤد واقعی ایک حقیقی شخص تھے؟‏

سن 1993ء میں ماہرِآثارِقدیمہ ایوراہام بیران اور اُن کے ساتھیوں نے پتھر کا ایک ٹکڑا دریافت کِیا۔‏ اُنہیں یہ ٹکڑا شمالی اِسرائیل میں تل‌دان نامی ایک قدیم ٹیلے سے ملا۔‏ اُس ٹکڑے پر ایک تحریر کندہ تھی جس میں ”‏داؤد کے گھرانے“‏ کا ذکر کِیا گیا تھا۔‏ وہ ٹکڑا نویں صدی قبل‌ازمسیح کا ہے اور اُس پر لکھی تحریر میں قدیم سامی زبانوں کے حروف اِستعمال کیے گئے ہیں۔‏ وہ ٹکڑا غالباً اُس یادگار کا حصہ تھا جسے ارامیوں نے تعمیر کِیا تھا۔‏ اُس یادگار پر ارامیوں نے بڑی شیخی بگھارتے ہوئے بنی‌اِسرائیل پر اپنی فتوحات کو بیان کِیا تھا۔‏

بلاگ ‏”‏بائبل ہسڑی ڈیلی“‏ کے ایک مضمون کے مطابق کچھ لوگ یہ نہیں مانتے کہ اُس تحریر میں ”‏داؤد کے گھرانے“‏ کے ذکر سے یہ ثابت ہوتا ہے کہ بادشاہ داؤد واقعی ایک حقیقی شخص تھے۔‏ لیکن اُس بلاگ میں یہ بھی بتایا گیا ہے کہ اِس حوالے سے بائبل کے بہت سے عالموں اور آثارِقدیمہ کے ماہرین کی رائے فرق ہے۔‏ اُن کے مطابق تل‌دان پر ملے ہوئے پتھر کے ٹکڑے سے یہ ثابت ہوتا ہے کہ بائبل میں ذکرکردہ بادشاہ داؤد واقعی تھے۔‏ یہ دریافت اُن اہم ترین دریافتوں میں سے ایک ہے جن کا ذکر رسالے ‏”‏ببلیکل آرکیولوجی ری‌ویو“‏ میں کِیا گیا ہے۔‏