Chiqish 20:1-26
20 Keyin Xudo mana bu so‘zlarni aytdi+:
2 «Men sizlarni Misrdan, sizlar qullikda bo‘lgan yurtdan* olib chiqqan Tangringiz Yahovaman+.
3 Mendan o‘zga xudolaringiz bo‘lmasin+.
4 O‘zingiz uchun na osmonda, na yerda, na suvlarda mavjud bo‘lgan hech bir narsaning o‘yma tasviri yoki shaklini yasamanglar+.
5 Ularga sajda va xizmat qilmanglar+. Chunki Men, Xudoyingiz Yahova mutlaq sadoqatni talab qiladigan Tangriman+. Mendan nafratlangan otalarning gunohi oqibatlarini ularning o‘g‘illari, nevaralari va evaralari boshdan kechirishiga yo‘l qo‘yaman;
6 lekin Meni sevib, amrlarimga amal qilganlarning ming-ming avlodlariga mehr-sadoqatimni namoyon etaman+.
7 Allohingiz Yahovaning ismini noo‘rin tarzda tilga olmanglar+, chunki Yahova Uning ismini noo‘rin tarzda tilga olgan kishini jazosiz qoldirmaydi+.
8 Shabbat kuni muqaddas ekanini yodingizda tutinglar+.
9 Olti kun mehnat qilib, ishlaringizni shu kunlar ichida bajaringlar+.
10 Ammo yettinchi kun Tangringiz Yahovaga atalgan Shabbat bo‘ladi. Na o‘zingiz, na o‘g‘il-u qizingiz, na qul-u cho‘ringiz, na uy hayvoningiz, na yashash joyingizdagi musofir hech qanday ish qilmasin+.
11 Zero, Yahova olti kun ichida osmon-u yerni, dengiz va undagi bor narsani yaratib, yettinchi kuni dam olishni boshladi+. Shu bois, Yahova yettinchi kunni muborak qilib, uni muqaddas qildi.
12 Yahova sizlarga berayotgan yurtda uzoq umr ko‘rish uchun, ota-onangizni hurmat qilinglar+.
13 Qotillik qilmanglar+.
14 Zino qilmanglar+.
15 O‘g‘rilik qilmanglar+.
16 Yaqiningizga qarshi soxta guvohlik bermanglar+.
17 Yaqiningizning uyiga ko‘z olaytirmanglar. Na uning xotiniga, na qul-u cho‘risiga, na qoramoliga, na eshagiga va unga tegishli hech bir narsaga ko‘z olaytirmanglar»+.
18 Butun xalq momaqaldiroq gumburlab, chaqmoq chaqqaniga guvoh bo‘ldi, burg‘u ovozini eshitdi va tog‘dan tutun chiqayotganini ko‘rdi. Bularni ko‘rib eshitgach, ularni titroq bosdi va ular joylaridan qo‘zg‘almay turishdi+.
19 Ular Musoga: «Bizga o‘zingiz gapiring, biz esa eshitamiz. Xudo bizga gapirmasin, aks holda o‘lib ketamiz»+,— deyishdi.
20 Shunda Muso ularga: «Qo‘rqmanglar. Chunki haq Tangri sizlarni sinash uchun+ hamda doimo Undan qo‘rqib, gunoh qilmasligingiz uchun kelgan»+,— deb aytdi.
21 Xalq uzoqda joyidan qo‘zg‘almay turdi, Muso esa haq Xudo turgan joyga, qora bulutga yaqin bordi+.
22 Keyin Yahova Musoga quyidagicha dedi: «Isroil o‘g‘illariga mana bunday deb ayt: “O‘zlaringiz ko‘rganingizday, Men sizlarga osmondan gapirdim+.
23 Kumush va oltindan xudolar yasamanglar. Zero, Mendan bo‘lak xudolaringiz bo‘lmasligi kerak+.
24 Men uchun tuproqdan qurbongoh yasab, uning ustida kuydiriladigan qurbonlig-u tinchlik qurbonliklarini keltiringlar hamda qo‘y-echki va qoramolingizni qurbon qilinglar. Ismim tilga olinishi uchun Men tanlaydigan hamma joyda+ yoningizga kelib, sizlarga baraka yog‘diraman.
25 Bordi-yu, qurbongohni toshdan quradigan bo‘lsangiz, uni yo‘nilgan toshlardan bunyod etmanglar+. Qurbongohni yasashda keskich ishlatsangiz, uni harom qilib qo‘yasizlar.
26 Jinsiy a’zolaringiz ko‘rinib qolmasligi uchun, qurbongohimga zina ham yasamanglar”.
Izohlar
^ So‘zma-so‘z «qullar uyidan».
