Vhurifhi Ha U Thoma Vhu Yaho Kha Vhakorinta 8:1-13
8 Ndi khou ni ṅwalela nga ha zwiḽiwa zwine zwa ṋekedzwa midzimu ya zwifanyiso,+ ndi ri: Roṱhe ri a ḓivha nga ha enea mafhungo.+ Ane a ḓivha nga maanḓa u a ḓikukumusa, fhedzi lufuno lu a fhaṱa.+
2 Naho muthu a nga amba uri: “Ndi a ḓivha,” ha athu u zwi ḓivha zwavhuḓi.
3 Ane a funa Mudzimu, u ḓivhiwa nga Mudzimu.
4 Kha ri ambe nga ha u ḽa zwiḽiwa zwo ṋekedzwaho midzimu ya zwifanyiso. Ri a zwi ḓivha uri midzimu ya zwifanyiso a i tshithu,+ na uri hu na Mudzimu muthihi fhedzi.+
5 Naho hu na zwine zwa vhidzwa “midzimu,” ṱaḓulu kana kha ḽifhasi,+ samusi hu na “midzimu” minzhi na “marena” manzhi,
6 riṋe ri na Mudzimu muthihi fhedzi,+ ane a vha Khotsi ashu wa ṱaḓulu,+ ndi ene o sikaho zwithu zwoṱhe, na riṋe ro sikwa ngae;+ ri na Murena muthihi, Yesu Kristo, zwoṱhe zwo vha hone ngae,+ na riṋe ro vha hone nga nṱhani hawe.
7 A si vhoṱhe vhane vha ḓivha zwenezwi.+ Ngauri vhaṅwe vho vha vha tshi rabela midzimu ya zwifanyiso, musi vha tshi ḽa zwiḽiwa zwi ṋekedzwaho midzimu ya zwifanyiso+ vha humbula uri vha khou gwadamela yeneyo midzimu, luvalo lwavho lu a vha dina ngauri a lu ngo gudiswa.+
8 Fhedzi zwiḽiwa zwi nga si ri sendedze tsini na Mudzimu;+ arali ri sa ḽi, a ri shayi tshithu, arali ri tshi ḽa, a ri vhuyelwi nga tshithu.+
9 Ni ṱhogomele uri zwine na khetha u zwi ita zwi si khukhulise vha si na lutendo lwo khwaṱhaho.+
10 Arali iwe a re na nḓivho wa vhoniwa u tshi khou ḽa zwiḽiwa thembeleni ya midzimu ya zwifanyiso, naa luvalo lwa a si na lutendo lwo khwaṱhaho lu nga si ite uri a ḽe zwiḽiwa zwo ṋekedzwaho midzimu ya zwifanyiso?
11 Nga nṱhani ha nḓivho yau, wahau a si na lutendo lwo khwaṱhaho, we Kristo a mu fela, u a khukhulisea.+
12 Musi ni tshi khakhela vhahaṋu na u khukhulisa luvalo lwavho lu songo khwaṱhaho,+ ni khou khakhela Kristo.
13 Arali zwiḽiwa zwi tshi khukhulisa wahashu, a thi tsha ḓo ḽa ṋama, uri ndi sa khukhulise wahashu.+
