Ekisoda 10:1-29
10 Yehova a amba na Mushe a ri: “Iya ha Farao, ngauri ndo tendela mbilu yawe na mbilu dza vhashumeli vhawe dzi tshi rindila,+ uri ndi kone u sumbedza honovhu vhuṱolo hanga a tshi zwi vhona,+
2 uri u kone u vhudza vhana vhau na vhaḓuhulu vhau nga ha nḓila ye nda pfisa ngayo Egipita vhuṱungu na nga ha vhuṱolo he nda vhu ita khavho;+ ndi hone vha tshi ḓo ḓivha uri ndi nṋe Yehova.”
3 Mushe na Aroni vha ya ha Farao vha amba nae vha ri: “Yehova Mudzimu wa Vhahevheru o ri: ‘Naa u ḓo ḓiṱukufhadza lini kha nṋe?+ Litsha vhathu vhanga vha ṱuwe uri vha ye u ntshumela.
4 Arali wa ḓi dzulela u hana vhathu vhanga vha tshi ṱuwa, ndi ḓo ḓisa dzinzie shangoni ḽau matshelo.
5 Dzi ḓo ḓala kha ḽifhasi, a zwi nga konadzei u vhona mavu. Dzi ḓo ḽa zwoṱhe zwe tshifhango tsha ni siela zwone, dzi ḓo ḽa miri yaṋu yoṱhe ine ya mela masimuni.+
6 Dzi ḓo ḓadza nnḓu dzau, nnḓu dza vhashumeli vhau na nnḓu dzoṱhe dza Egipita nga nḓila ine vhokhotsi au na vhomakhulu wau vha sa athu u i vhona u bva tshee vha dzula kha ḽeneḽi shango u swika zwino.’”+ Nga zwenezwo, a ṱuwa phanḓa ha Farao.
7 Nga murahu ha zwenezwo, vhashumeli vha Farao vha amba nae vha ri: “Naa uyu munna u ḓo litsha lini u ri pfisa vhuṱungu?* Litsha avha vhathu vha ṱuwe vha ye u shumela Yehova Mudzimu wavho. Naa a u zwi vhoni uri Egipita ḽo tshinyadzwa?”
8 Mushe na Aroni vha ḓiswa ha Farao, a amba navho a ri: “Ṱuwani ni ye u shumela Yehova Mudzimu waṋu. Hone hu ḓo ṱuwa vhafhio?”
9 Mushe a mu fhindula a ri: “Ri ḓo ṱuwa na vhana vhashu, vhaaluwa vhashu, vharwa vhashu na vhananyana vhashu, nngu dzashu na kholomo dzashu,+ ngauri ri khou ya u itela Yehova vhuṱambo.”+
10 Farao a amba navho a ri: “Ngavhe Yehova a tshi nga vha na inwi, arali nda nga vhuya nda ni litsha na ṱuwa na vhana vhaṋu!+ Zwi tou vha khagala uri hu na vhuvhi vhune na khou ṱoḓa u vhu ita.
11 Na khathihi! Nga hu ṱuwe vhanna fhedzi vha ye u shumela Yehova, ngauri ndi zwenezwo zwine na khou humbela zwone.” Musi a tshi fhedza u amba zwenezwo vha pandelwa phanḓa ha Farao.
12 Yehova a amba na Mushe a ri: “Imisa tshanḓa tshau u sumbe shango ḽa Egipita uri hu ḓe dzinzie, u itela uri dzi ḓale shangoni ḽoṱhe ḽa Egipita, dzi ḽe zwimela zwa shangoni, zwoṱhe zwe tshifhango tsha sia zwone.”
13 Nga khathihi fhedzi Mushe a imisa thonga yawe a sumba shango ḽa Egipita, Yehova a ita uri muya wa vhubvaḓuvha u vhudzule shangoni ḓuvha ḽoṱhe na vhusiku hoṱhe. Nga matsheloni muya wa vhubvaḓuvha wa ḓisa dzinzie.
14 Nzie dza ḓala shangoni ḽoṱhe ḽa Egipita dza kavha Egipita ḽoṱhe.+ Dzo vha dzo ḓala+ vhukuma; ho vha hu sa athu u vhuya ha vha na nzie nnzhi nga u ralo, a hu tsha ḓo dovha ha vha na nzie nnzhi nga u ralo.
15 Dza ḓala shangoni ḽoṱhe, dza swifhadza shango, dza ḽa zwimela zwoṱhe zwa shangoni; dza ḽa zwimela zwoṱhe na mitshelo yoṱhe ye ya siiwa nga tshifhango; a hu na na tshithu tshidala kha miri tshe tsha sala kana zwimela masimuni shangoni ḽoṱhe ḽa Egipita.
16 Farao a vhidza Mushe na Aroni nga u ṱavhanya, a amba navho a ri: “Ndo khakhela Yehova Mudzimu waṋu na inwi.
17 Zwino ndi khou humbela uri ni nkhangwele vhutshinyi hanga lwonolwu luthihi fhedzi, ni nkhumbelele kha Yehova Mudzimu waṋu uri a fhelise honovhu vhuṱungu vhu vhulayaho.”
18 Mushe a ṱuwa phanḓa ha Farao a ya a mu humbelela kha Yehova.+
19 Yehova a ḓisa muya muhulu u bvaho vhukovhela, wa vhudzulela dzinzie Lwanzheni Lutswuku. A hu na na nzie na nthihi ye ya sala kha ḽoṱhe ḽa Egipita.
20 Naho zwo ralo, Yehova a tendela mbilu ya Farao i tshi rindila,+ a si litshe Vhaisiraele vha tshi ṱuwa.
21 Yehova a amba na Mushe a ri: “Imisela tshanḓa tshau ṱaḓulu, uri hu vhe na swiswi shangoni ḽa Egipita, ḽo vha ḽi swiswi ḽihulu.”
22 Nga u ṱavhanya Mushe a imisela tshanḓa tshawe ṱaḓulu, ha fhela maḓuvha mararu hu na swiswi ḽihulu shangoni ḽoṱhe ḽa Egipita.+
23 Vho vha vha si tsha kona u vhonana, a hu na na muthihi we a bva he a vha e hone maḓuvha mararu; fhedzi mahayani a Vhaisiraele vhoṱhe ho vha hu na tshedza.+
24 Farao a vhidza Mushe a ri: “Ṱuwani ni ye u shumela Yehova.+ Hu ḓo sala fhedzi nngu dzaṋu na kholomo dzaṋu. Ni nga ṱuwa na vhana vhaṋu.”
25 Fhedzi Mushe a ri: “Iwe u fanela u ri ṋea* zwifuwo zwa u ita tshiṱhavhelo, ri ḓo zwi ṋekedza Yehova Mudzimu washu.+
26 Zwifuwo zwashu ri ḓo ṱuwa nazwo. A hu na na tshifuwo* na tshithihi tshine tsha ḓo sala, ngauri zwiṅwe zwazwo ri ḓo zwi shumisa u itela u gwadamela Yehova Mudzimu washu, a ri ḓivhi zwine ra ḓo zwi ṋekedza Yehova, ri ḓo zwi ḓivha ri tshi swika henengei.”
27 Yehova a tendela mbilu ya Farao i tshi rindila, a si litshe vhathu vha tshi ṱuwa.+
28 Farao a amba nae a ri: “Ṱuwa phanḓa hanga! U songo tsha dovha wa ḓa phanḓa hanga, ngauri ḓuvha ḽine wa ḓo ḓa phanḓa hanga u ḓo fa.”
29 Mushe a ri: “Zwo luga, a thi tsha ḓo dovha nda ḓa phanḓa hau.”
Ṱhaluso dzi re magumoni a siaṱari
^ Thevhedz., “u vha tshikwekwe?”
^ Kana “u ri tendela u vha na.”
^ Thevhedz., “khwanḓa.”
