Ekisoda 34:1-35
34 Yehova a amba na Mushe a ri: “Ḓivhaḓele mbaba mbili dza matombo dzi fanaho na dza u thoma,+ ndi ḓo ṅwala kha dzenedzo mbaba mafhungo e a vha e kha dza u thoma,+ dze wa dzi kwasha.+
2 Ḓilugiselele u itela matshelo nga matsheloni, samusi u tshi ḓo gonya Thavhani ya Sinai wa ima phanḓa hanga henefho ṱhodzini ya thavha.+
3 Fhedzi u songo gonya na muthu, a ho ngo fanela u vhonala muthu henefho thavhani. Nngu kana kholomo a dzo ngo fanela u fula tsini na yeneyo thavha.”+
4 Nga zwenezwo, Mushe a ita mbaba mbili dza matombo dzi fanaho na dza u thoma, a vuwa nga matsheloni-tsheloni a gonya Thavhani ya Sinai, samusi Yehova o vha o mu laedza, a ṱuwa o fara mbaba mbili dza matombo.
5 Yehova a tsa+ e kha gole, a ima nae henefho a ḓivhadza dzina ḽa Yehova.+
6 Yehova a fhira phanḓa hawe, a vhidzelela a ri: “Yehova, Yehova, Mudzimu wa u khathutshela+ na u pfela vhuṱungu,*+ a sa ṱavhanyi u sinyuwa+ na a re na lufuno luhulu lu sa shanduki,+ u dzulela u amba ngoho,*+
7 ane a sumbedza lufuno lu sa shanduki kha vha zwigidi,+ ane a hangwela vhukhakhi na vhutshinyi na tshivhi,+ fhedzi ane a si litshe a re na mulandu a songo pfiswa vhuṱungu,+ ane a pfisa vhana na vhaḓuhulu vhuṱungu nga nṱhani ha vhukhakhi ha vhokhotsi avho, u swika kha murafho wa vhuraru na wa vhuṋa.”+
8 Mushe a ṱavhanya a khotha.
9 A ri: “Iwe Yehova, arali zwino u tshi ntakalela, ndi a u humbela iwe Yehova uri u ṱuwe na riṋe u vhukati hashu,+ naho ri vhathu vha re na tshikhuna,*+ u ri hangwele vhutshinyi na zwivhi zwashu,+ u ri ṱanganedze sa vhathu vhau.”
10 Mudzimu a ri: “Mulanga une nda u vhofha ndi hoyu: Phanḓa ha vhathu vhau vhoṱhe ndi ḓo ita zwithu zwi mangadzaho zwine a zwi athu u vhuya zwa itwa* ḽifhasini ḽoṱhe kana vhukati ha tshaka dzoṱhe,+ vhathu vhoṱhe vhane vha vha henefho hune wa dzula hone vha ḓo vhona mishumo ya Yehova, ngauri ndi zwithu zwi ofhisaho zwine nda khou zwi ita nga inwi.+
11 “U thetshelese zwine nda khou u laya ṋamusi.+ Ndi ḓo pandela Vhaamori, Vhakanana, Vhahethe, Vhapheresi, Vhahevi na Vhayebusi.+
12 U ṱhogomele uri u si vhofhe mulanga na vhathu vha ḽeneḽo shango ḽine wa khou ya khaḽo,+ ngauri zwi nga vha tshikwekwe vhukati haṋu.+
13 Fhedzi u thuthe aḽeṱare dzavho, phuphu dzavho khethwa u dzi phusukanye na thanda dzavho khethwa* u dzi remekanye.+
14 A wo ngo tea u gwadamela muṅwe mudzimu,+ ngauri Yehova u ḓivhelwa* u ṱoḓa vhathu vha tshi ḓikumedza tshoṱhe khae.* Ndi Mudzimu ane a ṱoḓa u tshi ḓikumedza tshoṱhe khae.+
15 U ṱhogomele uri u si vhofhe mulanga na vhathu vha ḽeneḽo shango, ngauri musi vha tshi ita vhupombwe na midzimu yavho na u itela midzimu yavho tshiṱhavhelo,+ muṅwe muthu u ḓo u ramba wa vho ḽa zwa tshiṱhavhelo tshawe.+
16 Wa vho ḓo vhingela vharwa vhau vhaṅwe vha vhananyana vhavho,+ vhananyana vhavho vha vho ita vhupombwe na midzimu yavho, wa ita uri vharwa vhau vha ite vhupombwe na midzimu yavho.+
17 “U songo ḓiitela midzimu ya zwifanyiso u itela u i rabela.+
18 “U pembelele Vhuṱambo ha Vhurotho vhu si na Mbiliso.+ U ḽe vhurotho vhu si na mbiliso, sa zwe nda u laya; u ite zwenezwi lwa maḓuvha a sumbe nga tshifhinga tsho vhewaho nga ṅwedzi wa Abibi,*+ ngauri wo bva Egipita nga ṅwedzi wa Abibi.
19 “Tanzhe ḽiṅwe na ḽiṅwe ḽa tshiduna ndi ḽanga,+ u katela na a zwifuwo zwoṱhe, hu sa londwi uri ndi tanzhe ḽa tshiduna ḽa kholomo kana ḽa nngu.+
20 Tanzhe ḽiṅwe na ḽiṅwe ḽa donngi u ḽi rengulule nga nngu. Fhedzi arali wa sa ḽi rengulula, u ḽi vunḓe mutsinga. Tanzhe ḽiṅwe na ḽiṅwe ḽa vharwa vhau u ḽi rengulule.+ Hu songo vha na ane a ḓa phanḓa hanga a songo fara tshithu.
21 “U shume maḓuvha a rathi, fhedzi nga ḓuvha ḽa vhusumbe u awele.*+ U awele na nga tshifhinga tsha u lima na tsha u kaṋa.
22 “U pembelele Vhuṱambo hau ha Dzivhege nga zwiranzhe zwa khaṋo ya goroi na mafheloni a ṅwaha hu vhe na Vhuṱambo ha u Kuvhanganya* zwe wa kaṋa.+
23 “Vhanna vhoṱhe vha fanela u ḓa phanḓa ha Murena wa ngoho Yehova Mudzimu wa Isiraele luraru nga ṅwaha.+
24 Ngauri ndi ḓo pandela dzitshaka phanḓa hau,+ nda engedza shango ḽau, a hu na muthu ane a ḓo lingedza u dzhia shango ḽau musi u tshi ya phanḓa ha Yehova Mudzimu wau luraru nga ṅwaha.
25 “A wo ngo tea u ṋekedza malofha a tshiṱhavhelo kana tshithu tshi re na mbiliso.+ Tshiṱhavhelo tsha vhuṱambo ha Paseka a tsho ngo fanela u sielwa matshelo.+
26 “Zwiranzhe zwa khwine zwi bvaho mavuni au u fanela u zwi ḓisa nḓuni ya Yehova Mudzimu wau.+
“U songo vholomisa ṋama ya tshibudzana nga mafhi a mme atsho.”+
27 Yehova a bvela phanḓa a tshi amba na Mushe a ri: “U ṅwale maipfi aya,+ ngauri ndi vhofha mulanga na iwe na Vhaisiraele u tendelana na enea maipfi.”+
28 A dzula henefho na Yehova maḓuvha a 40 na vhusiku ha 40. Ho ngo ḽa vhurotho na u nwa maḓi.+ A ṅwala kha mbaba dza matombo maipfi a mulanga, Milayo ya Fumi.*+
29 Mushe a tsa Thavhani ya Sinai o fara+ mbaba mbili dza matombo dza Vhuṱanzi. Musi Mushe a tshi tsa thavhani, o vha a sa zwi ḓivhi uri tshifhaṱuwo tshawe tsho vha tshi tshi khou penya, ngauri o vha a tshi khou amba na Mudzimu.
30 Musi Aroni na Vhaisiraele vhoṱhe vha tshi vhona Mushe, vha ṱhogomela uri tshifhaṱuwo tshawe tsho vha tshi tshi khou penya, vha ofha u sendela tsini nae.+
31 Fhedzi Mushe a vha vhidza, Aroni na vharangaphanḓa vhoṱhe vha tshitshavha vha ḓa khae, Mushe a amba navho.
32 Nga murahu ha zwenezwo, Vhaisiraele vhoṱhe vha sendela tsini nae, a vha ṋea ndaela dzoṱhe dze Yehova a mu ṋea dzone Thavhani ya Sinai.+
33 Musi Mushe a tshi fhedza u amba navho, o vha a tshi fukedza tshifhaṱuwo tshawe nga labi.+
34 Fhedzi musi Mushe a tshi ya phanḓa ha Yehova u itela u amba nae, o vha a tshi fukula labi u swika a tshi ṱuwa.+ A ṱuwa a ya a vhudza Vhaisiraele milayo ye a laiwa.+
35 Vhaisiraele vha ḓi vhona tshifhaṱuwo tsha Mushe tshi tshi khou penya; ngauralo Mushe a fukedza tshifhaṱuwo tshawe nga labi u swika a tshi ya u amba na Mudzimu.+
Ṱhaluso dzi re magumoni a siaṱari
^ Kana “na wa vhuthu.”
^ Kana “u fhulufhedzea.”
^ Thevhedz., “vha omisaho mitsinga.”
^ Kana “sikwa.”
^ Sedzani Mutevhe Wa Ṱhalutshedzo Ya Maipfi.
^ Kana “u sa konḓelela u sa fhulufhedzea.”
^ Thevhedz., “Yehova ndi dzina ḽawe.”
^ Sedzani Ṱhume. B15.
^ Kana “u tevhedze savhatha.”
^ Vhu dovha ha ḓivhiwa sa Vhuṱambo ha Mishasha (Madennde Makhethwa).
^ Thevhedz., “Maipfi a Fumi.”
