Mishumo Ya Vhaapostola 17:1-34
17 Paulo na Silasi vha fhira nga Amfipoli na Apolonia vha swika Thesalonika,+ he ha vha hu na sinagogo ya Vhayuda.
2 Paulo a ya khavho sa nga misi,+ a amba navho nga Maṅwalo+ nga savhatha tharu dzi tshi khou tevhekana,
3 a vha ṱalutshedza na u vha sumbedza Maṅwaloni uri zwo vha zwo tea uri Yesu Kristo a tambule+ na u vuswa vhafuni,+ a ri: “Ndi onoyo Kristo Yesu, ane nda khou ni ḓivhadza ene.”
4 Zwenezwo zwa ita uri vhaṅwe vhavho vha tende, vha tshimbila na Paulo na Silasi+ u katela na Vhagerika vhanzhi vha gwadamelaho Mudzimu na vhafumakadzi vhanzhi vha re na vhuimo ha nṱha.
5 Fhedzi Vhayuda vha vha na vivho+ vha kuvhanganya vhaṅwe vhanna vhavhi vhane vha sokou tendeleka makete uri vha vuse bonyongo muḓini woṱhe. Vha dzhena nḓuni ya Yasoni vho halifha vha tshi khou ṱoḓa uri Paulo na Silasi vha bviselwe nnḓa vhathuni.
6 Musi vha songo vha wana, vha kokodza Yasoni na vhaṅwe vhafunziwa vha vha isa kha vhavhusi vha muḓi, vha ṱavha mukosi vha ri: “Vhaḽa vhanna vhe vha fhiriṱanya ḽifhasi vho swika na fhano,+
7 ndi vhaeni vha Yasoni. Vhenevha vhathu vhoṱhe vha khou hanedza mulayo wa Kesare, vha amba uri hu na iṅwe khosi ine ya pfi Yesu.”+
8 Musi vha tshi pfa zwenezwo, vhavhusi vha muḓi na vhathu vha sinyuwa;
9 vha vha litsha vha ṱuwa musi Yasoni na vhaṅwe vho no badela tshelede ya uri vha vhofhololwe.
10 Nga u ṱavhanya musi ho no vha vhusiku, vhahashu vha ruma Paulo na Silasi ngei Berea. Musi vha tshi swika, vha ya sinagogoni ya Vhayuda.
11 Vhaberea vho vha vhe khwine kha Vhathesalonika, ngauri vho ṱanganedza ipfi ḽa Mudzimu nga mbilu yoṱhe, vha ṱolisisa Maṅwalo ḓuvha ḽiṅwe na ḽiṅwe u itela u vhona arali zwe vha zwi pfa zwi ngoho.
12 Vhanzhi vha tenda, khathihi na vhanna na vhafumakadzi vha Vhagerika vhanzhi vha re na vhuimo ha nṱha.
13 Musi Vhayuda vha Thesalonika vha tshi pfa uri ipfi ḽa Mudzimu ḽi khou ḓivhadzwa na ngei Berea nga Paulo, vha ya henefho u itela u vusa bonyongo na u fhiriṱanya vhathu.+
14 Nga u ṱavhanya vhahashu vha fhelekedza Paulo lwanzheni,+ fhedzi Silasi na Timotheo vha sala.
15 Vhe vha fhelekedza Paulo vha mu swikisa Athene, vha ṱuwa musi Paulo a tshi vha vhudza uri Silasi na Timotheo+ vha ḓe khae nga u ṱavhanya.
16 Musi Paulo a tshee o vha lindela Athene, a dinalea musi a tshi vhona uri wonoyo muḓi wo ḓala nga midzimu ya zwifanyiso.
17 A funza Vhayuda ngei sinagogoni na vhathu vha gwadamelaho Mudzimu, a tshi amba na vhathu vhane a ṱangana navho ngei makete ḓuvha ḽiṅwe na ḽiṅwe.
18 Vhaṅwe vha Vhaepikure na Vhastoiki vhane vha vha vhaḓivhi vha pfunzo dza vhaṱali vha hanedzana na Paulo, vha ri: “Naa uyu munna u khou fhafhaḓa a tshi ri mini?” Vhaṅwe vha ri: “Zwi tou nga u khou amba nga ha midzimu ine ri si i ḓivhe.” Vho amba zwenezwo ngauri o vha a tshi khou ḓivhadza mafhungo maḓifha nga ha Yesu na nga u vuswa ha vhafu.+
19 Vha mu dzhia vha mu isa Areopago,* vha ri: “Naa u nga ri vhudza izwo zwithu zwiswa zwine wa khou amba nga hazwo?
20 Ngauri u khou amba zwithu zwine ri si zwi ḓivhe. Ri ṱoḓa u ḓivha zwine zwenezwi zwithu zwa amba zwone.”
21 Vhaathene vhoṱhe na vhatsinda vho dalaho henefho vho vha vha tshi fhedza tshifhinga tshavho vho sokou dzula, vha tshi khou amba kana u thetshelesa mafhungo maswa.
22 Paulo a takuwa a ima vhukati ha Areopago*+ a ri:
“Inwi vhanna vha Athene, ndo zwi vhona uri ni vhathu vha ofhesaho midzimu u fhira vhaṅwe vhathu.+
23 Musi ndi tshi khou pfuka, ndi tshi lavhelesa zwine na zwi rabela, ndo vhona hu na aḽeṱare yo ṅwaliwaho uri, ‘Ndi Ya Mudzimu A Sa Ḓivhiwi.’ Ndi khou ni ḓivhadza onoyo mudzimu ane ni si mu ḓivhe.
24 Mudzimu we a sika shango na zwoṱhe zwi re khaḽo, samusi e ene Murena wa ḽiṱaḓulu na ḽifhasi,+ ha dzuli thembeleni dzo fhaṱwaho nga zwanḓa;+
25 ha ṱoḓi u thuswa nga muthu,+ ngauri ndi ene ane a ṋea vhathu vhoṱhe vhutshilo, muya wa u fema+ na zwithu zwoṱhe.
26 Ndi ene o itaho uri kha muthu muthihi+ hu bve tshaka dzoṱhe, uri vha dzule ḽifhasini ḽoṱhe,+ a vhea zwifhinga na mikano hune vhathu vha dzula hone,+
27 uri vha kone u ṱoḓa Mudzimu, na uri vha ite vhuḓidini ha uri vha mu wane,+ ngauri u tsini na muṅwe na muṅwe washu.
28 Ngauri ri tshila, u tshimbila na u vha hone ngae, samusi vhaṅwe vharendi vhaṋu vho amba vha ri, ‘Na riṋe ri vhana vhawe.’
29 “Samusi ri vhana vha Mudzimu,+ a ro ngo fanela u humbula uri Mudzimu u nga tshifanyiso tsha musuku, tsha siḽiva kana tsha tombo tsho humbuliwaho nga muthu a tshi vhaḓa.+
30 Ndi ngoho uri vhathu vho ita zwenezwo zwithu vha sa ḓivhi, fhedzi Mudzimu a vha litsha;+ zwino u khou vhudza vhathu vhoṱhe fhethu hoṱhe uri vha fanela u rembuluwa.
31 Ngauri Mudzimu o vhea ḓuvha ḽine a ḓo haṱula+ ḽifhasi ḽoṱhe a sa ṱaluli, a tshi shumisa muthu we a mu nanga, vhathu vhoṱhe vha nga fhulufhela uri ḽeneḽo ḓuvha ḽi ḓo ḓa, ngauri o vusa onoyo muthu vhafuni.”+
32 Musi vha tshi pfa a tshi amba nga ha u vuswa ha vhafu, vhaṅwe vha mu goḓa,+ vhaṅwe vha ri: “Ri ḓo u thetshelesa ḽiṅwe ḓuvha.”
33 Paulo a ṱuwa a vha sia,
34 fhedzi vhaṅwe vha ima nae vha vha vhatendi. Kha vhenevho ho vha hu na Dionisio, muhaṱuli wa khothe ya Areopago* na muṅwe mufumakadzi ane a pfi Damarisa na vhaṅwe.
Ṱhaluso dzi re magumoni a siaṱari
^ Sedzani Mutevhe Wa Ṱhalutshedzo Ya Maipfi.
^ Sedzani Mutevhe Wa Ṱhalutshedzo Ya Maipfi.
^ Sedzani Mutevhe Wa Ṱhalutshedzo Ya Maipfi.
