Mishumo Ya Vhaapostola 2:1-47
2 Nga ḓuvha ḽa Vhuṱambo ha Pentekoste+ vhoṱhe vho vha vho kuvhangana fhethu huthihi.
2 Nga u ṱavhanya ha pfala mubvumo u bvaho ṱaḓulu u tshi nga wa ḓumbu, wa ḓa wa ḓadza nnḓu yoṱhe ye vha vha vhe khayo.+
3 Vha vhona khavhu dza mulilo dzi ngaho lulimi dzi tshi fhandekana, dza kavha kha muṅwe na muṅwe wavho,
4 vhoṱhe vha ḓadzwa nga muya mukhethwa,+ vha thoma u amba nga nyambo* dzo fhambanaho vha tshi koniswa nga muya mukhethwa.+
5 Nga tshenetsho tshifhinga, ho vha hu na Vhayuda vha ofhaho Mudzimu vha bvaho mashangoni oṱhe vha dzulaho Yerusalema.+
6 Musi hu tshi pfala wonoyo mubvumo, vhathu vha kuvhangana, vha mangala ngauri muṅwe na muṅwe o vha a tshi khou pfa hu tshi ambiwa luambo lwawe.
7 Vha mangala zwihulu vha ri: “Vhonani, naa avha vhathu vhoṱhe a si Vhagalilea?+
8 Zwi ḓa hani uri muṅwe na muṅwe washu a pfe hu tshi khou ambiwa nga luambo lwawe lwa ḓamuni?
9 Vhukati hashu hu na Vhaparita, Vhameda,+ Vhaelamu,+ na vhadzulapo vha Mesopotamia, Yudea, Kapadokia, Ponto, tshiṱirikini tsha Asia,+
10 Firigia, Pamfilia, Egipita, madzinguni a Libia, hune ha vha thungo dza Kirene na vhaeni vha bvaho Roma, Vhayuda na vhathu vho rembulutshelaho kha vhurereli ha Tshiyuda,+
11 Vhakereta na Vhaarabu, fhedzi vha khou ri vhudza nga ha mishumo ya maanḓa ya Mudzimu nga nyambo dzashu.”
12 Vhoṱhe vho vha vho mangala, vho ḓaḓa, vha tshi khou amba nga tshavho vha tshi ri: “Zwenezwi zwithu zwi amba mini?”
13 Naho zwo ralo, vhaṅwe vha vha goḓa vha ri: “Vho kambiwa.”
14 Fhedzi Petro a takuwa na vhaapostola vha 11,+ a vhidzelela a ri: “Vhathu vha Yudea na inwi vhadzulapo vhoṱhe vha Yerusalema, thetshelesani zwine nda khou zwi amba.
15 Havha vhathu a vho ngo kambiwa, sa zwine na khou zwi amba, ngauri hu tshee matsheloni.*
16 Nṱhani hazwo, hu khou itea zwe zwa ambiwa nga muporofita Yoele, a tshi ri:
17 ‘Mudzimu u ri, “Maḓuvhani a vhufhelo, ndi ḓo shululela muya wanga kha vhathu vhoṱhe, vharwa vhaṋu na vhananyana vhaṋu vha ḓo porofita, vhaṱhannga vhaṋu vha ḓo vhona mabono, vhakalaha vhaṋu vha ḓo ḽora;+
18 nga tshenetsho tshifhinga ndi ḓo shululela muya wanga na kha vhalanda vhanga vha vhanna na vha vhafumakadzi, vha ḓo porofita.+
19 Ndi ḓo ita zwithu zwi mangadzaho ṱaḓulu na vhuṱolo kha ḽifhasi, hu ḓo vha na malofha, mulilo na vhutsi vhuhulu.
20 Musi hu sa athu u ḓa ḓuvha ḽihulu, ḽo khetheaho ḽa Yehova,* ḓuvha ḽi ḓo swifhala, ṅwedzi wa tswuka sa malofha.
21 Vhoṱhe vha vhidzelelaho dzina ḽa Yehova* vha ḓo tshidzwa.”’+
22 “Vhathu vha Isiraele, thetshelesani hezwi: Samusi ni tshi zwi ḓivha, Yesu wa Nazaretha o vha o rumiwa nga Mudzimu. O shumiswa nga Mudzimu u ita mishumo ya maanḓa, zwithu zwi mangadzaho na vhuṱolo vhukati haṋu,+ uri vhathu vhoṱhe vha ḓivhe Yesu.
23 Onoyu munna no mu fara na mu isa kha vhanna vhavhi uri vha mu ombele kha danda, vha mu vhulaye. Mudzimu o vha a tshi zwi ḓivha+ uri zwenezwi zwi ḓo itea kha Yesu, a tendela zwi tshi itea.+
24 Fhedzi Mudzimu o mu vusa+ nga u mu vhofholola kha thambo dza lufu, ngauri lufu lwo vha lu sa koni u dzula lwo mu vhofha.+
25 Davida o amba nga hae a ri: ‘Yehova* u dzula e phanḓa hanga; ndi nga si vhuye nda dzinginyea ngauri u kha tshanḓa tshanga tsha u ḽa.
26 Nga nṱhani ha zwenezwo, mbilu yanga yo takala, nda amba nga dakalo ḽihulu. Ndi ḓo dzula ndi na fhulufhelo;
27 ngauri u nga si nnditshe ndi Vhiḓani,* u nga si tende muvhuya wau a tshi sina.+
28 Wo ntsumbedza nḓila i yaho vhutshiloni, u ḓo ita uri ndi dzule ndo takala phanḓa hau.’+
29 “Vhahashu, zwo tea uri ndi ambe ndo vhofholowa nga ha makhulukuku washu Davida, uri o fa a vhulungwa,+ na vhiḓa ḽawe ḽi kha ḓi vha hone na ṋamusi.
30 Ngauri o vha e muporofita a tshi ḓivha uri Mudzimu o mu fhulufhedzisa nga u mu anela uri muṅwe wa vhana vhawe u ḓo dzula kha khuluṋoni yawe,+
31 o ḓivha nga ha u vuswa ha Kristo zwi sa athu u itea, a amba nga hazwo, uri ha nga ḓo litshwa Vhiḓani,* na ṋama yawe a i nga sini.+
32 Roṱhe ri ṱhanzi dza uri Mudzimu o vusa Yesu.+
33 Ngauri Yesu o ya ṱaḓulu, a dzula kha tshanḓa tsha u ḽa tsha Mudzimu,+ a ṋewa muya mukhethwa we a fhulufhedziswa wone nga Khotsi,+ a ri ṋea* zwine na khou zwi vhona na u zwi pfa.
34 Davida ho ngo ya ṱaḓulu, fhedzi o ri, ‘Yehova* o amba na Murena wanga a ri: “Dzula thungo ya tshanḓa tshanga tsha u ḽa,
35 u swika ndi tshi ita uri u kande maswina au.”’*+
36 Vhudzani vhathu vhoṱhe vha Isiraele uri vha vhe na vhungoho ha uri onoyo Yesu we na mu ombela kha danda,+ Mudzimu o mu ita Murena+ na Kristo.”
37 Vha tshi pfa zwenezwi zwithu, zwa vha ṱhavha mbilu, vha amba na Petro na vhaapostola vhoṱhe vha ri: “Vhahashu, ri ite mini?”
38 Petro a ri: “Rembuluwani,+ ni lovhedzwe+ dzinani ḽa Yesu Kristo uri ni hangwelwe zwivhi zwaṋu,+ ndi hone ni tshi ḓo wana tshifhiwa tsha muya mukhethwa.
39 Zwenezwi ndi zwe Yehova* Mudzimu washu a fhulufhedzisa+ vhoṱhe vhe a vha vhidza: inwi, vhana vhaṋu na vhoṱhe vha re kule.”+
40 A vha vhudza maṅwe mafhungo manzhi nga u vha ṱalutshedza nga vhuḓalo na u vha ṱuṱuwedza, a ri: “Ni songo ḓibaḓekanya na hoyu murafho muvhi uri ni si fheliswe.”+
41 Vhe vha takalela zwe a amba vha lovhedzwa,+ nga ḽeneḽo ḓuvha vhathu vha ṱoḓaho u vha 3 000 vha vha vhafunziwa.+
42 Vha bvela phanḓa vha tshi guda kha vhaapostola, vha tshi kovhelana zwithu, vha tshi ḽa+ na u rabela vhoṱhe.+
43 Vhathu vha tshuwa nge vhaapostola vha vha vha tshi khou ita zwithu zwi mangadzaho na vhuṱolo vhunzhi.+
44 Vhoṱhe vho vhaho vhatendi vho kuvhangana vha kovhelana zwine vha vha nazwo,
45 vha rengisa thundu+ dzavho na ndaka yavho vha tshi kovhela vhoṱhe u ya nga zwine vha zwi shaya.+
46 Vho vha vha tshi kuvhangana vhoṱhe thembeleni ḓuvha ḽiṅwe na ḽiṅwe, vha tshi dalelana, vha tshi ḽa zwiḽiwa vho takala, zwoṱhe zwe vha zwi ita zwi tshi bva mbiluni
47 vha tshi renda Mudzimu, vha tshi takalelwa nga vhathu vhoṱhe. Ḓuvha ḽiṅwe na ḽiṅwe Yehova* o vha a tshi khou tshidza vhathu na u ita uri vha vhe vhafunziwa.+
Ṱhaluso dzi re magumoni a siaṱari
^ Kana “ndimi.”
^ Thevhedz., “ndi awara ya vhuraru.” Hu ṱoḓaho u vha nga 9 nga matsheloni.
^ Kana “Hades.” Sedzani Mutevhe Wa Ṱhalutshedzo Ya Maipfi.
^ Kana “Hades.” Sedzani Mutevhe Wa Ṱhalutshedzo Ya Maipfi.
^ Thevhedz., “a ri shululela.”
^ Thevhedz., “ita maswina au vhukando ha milenzhe yau.”
