Sakaria 3:1-10
3 Nda sumbedzwa tshifhe muhulu Yoshua+ we a vha o ima phanḓa ha muruṅwa wa Yehova, Saṱhane+ o vha o ima kha thungo ya tshanḓa tsha u ḽa tsha Yoshua u itela u lwa nae.
2 Muruṅwa wa Yehova a amba na Saṱhane a ri: “Iwe Saṱhane,+ ngavhe Yehova a tshi u kaidza, ngavhe Yehova we a nanga Yerusalema+ a tshi u kaidza! Naa Yoshua a si ene danda ḽo bviswaho muliloni?”
3 Yoshua o vha o ambara zwiambaro zwa mashika, o ima phanḓa ha muruṅwa.
4 Onoyo muruṅwa a amba na vho imaho tsini nae a ri, “Mu bvuleni zwiambaro zwawe zwa mashika.” Ndi hone muruṅwa a tshi amba na Yoshua a ri, “Ndo phumula vhukhakhi* hau, zwino u ḓo ambadzwa zwiambaro zwavhuḓi.”+
5 Nda ri: “Kha ambadzwe dugu i si na mashika ṱhohoni yawe.”+ Vha mu ambadza zwiambaro na dugu i si na mashika; muruṅwa wa Yehova o vha o ima nga tsini.
6 Muruṅwa wa Yehova a amba na Yoshua a ri:
7 “Yehova wa mavhuthu u ri, ‘Arali wa tshimbila nḓilani dzanga na u ita mishumo phanḓa hanga ye wa ṋewa yone, ndi hone u tshi ḓo ṱhogomela* miṱa yanga na u vha muhaṱuli nḓuni yanga;+ ndi ḓo u tendela u tshi ḓa phanḓa hanga u fana na havha vho imaho hafha.’
8 “‘Iwe Tshifhe Muhulu Yoshua na vhane wa shuma navho vhane vha dzula phanḓa hau, ipfani hezwi, ngauri inwi ni tshiga; ndi khou ḓisa mushumeli wanga+ ane a pfi Lutavhi!+
9 Vhonani tombo ḽe nda ḽi vhea phanḓa ha Yoshua! Ḽeneḽo tombo ḽi na maṱo a sumbe;* ndi khou ṅwala khaḽo,’ u ralo Yehova wa mavhuthu, ‘ndi ḓo phumula mulandu wa ḽeneḽo shango nga ḓuvha ḽithihi.’+
10 “Yehova wa mavhuthu u ri, ‘Nga ḽeneḽo ḓuvha, muṅwe na muṅwe waṋu u ḓo ramba muhura wawe uri a ḓe a dzule nae fhasi ha munḓirivhe wawe na muhuyu wawe.’”+
Ṱhaluso dzi re magumoni a siaṱari
^ Kana “mulandu.”
^ Kana “linda.”
^ Khamusi zwi amba uri ḽo lavheleswa nga maṱo a sumbe.
