Kha Tito 1:1-16
1 Nṋe Paulo, mulanda wa Mudzimu na muapostola wa Yesu Kristo, ane a vha na lutendo lu fanaho na lwa vho nangwaho nga Mudzimu na a re na nḓivho yo teaho ya ngoho, ine ya tshimbidzana na u ḓikumedzela kha Mudzimu.
2 Zwenezwi zwo thewa kha fhulufhelo ḽa u tshila tshoṱhe.+ Mudzimu a sa zwifhi+ o fhulufhedzisa zwenezwi u bva kale;
3 fhedzi nga tshifhinga tshawe, o ita uri ipfi ḽawe ḽi ḓivhiwe nga mushumo wa u huwelela we nda ṋewa wone,+ u ya nga zwe nda vhudzwa nga Mudzimu, Mutshidzi washu;
4 ndi ṅwalela iwe Tito mutendi nga nṋe ane a nga ṅwananga, ndi ri:
Ngavhe Mudzimu Khotsi ashu na Kristo Yesu Mutshidzi washu vha tshi u sumbedza vhuthu vhuhulu na u ita uri u vhe na mulalo.
5 Ndo u sia ngei Kereta uri u khakhulule zwo khakheaho na u vhea vhahulwane miḓini yoṱhe, u ya nga zwe nda u vhudza:
6 Muhulwane u fanela u vha munna a sa solei, a re na mufumakadzi muthihi na vhana vha re vhatendi vha sa ḓivhelwi u ḓifara nga nḓila i songo kunaho* kana u vha mashandukwa.+
7 Ngauri mulavhelesi u fanela u vha a sa solei vhunga e mulanda wa Mudzimu, a songo vha e na swili,+ a tshi ṱavhanya u sinyuwa,+ e tshidakwa, a tshi ita zwa khakhathi, a tshi funa tshelede na u ṱoḓa u ḓivhuyedza,
8 fhedzi a ṱanganedze vhaeni,+ a fune zwivhuya, a vhe o tshaho muhumbuloni,+ a vhe o lugaho, a fhulufhedzee,+ a ḓifare,+
9 a farelele nga ho khwaṱhaho ipfi ḽa Mudzimu ḽi fhulufhedzeaho musi a tshi funza nga vhutsila,+ uri a kone u ṱuṱuwedza vhaṅwe nga pfunzo ya ngoho*+ na u kaidza+ vhane vha i hanedza.
10 Ngauri hu na mashandukwa, vhafhafhaḓi na vhafhuri vhanzhi, zwihuluhulu vha tevhedzaho zwa u fumba.+
11 Vha tea u valiwa milomo, ngauri vha ita uri miṱa yoṱhe i si tsha vha na lutendo nga u funza zwithu zwi songo teaho, vha tshi itela u ḓivhuyedza.
12 Muṅwe wa vhaporofita vhavho, o ri: “Vhakereta vha dzula vha tshi zwifha, ndi zwivhanda zwi re na khombo, vha a bvafha na u ḽesa.”
13 Zwenezwi ndi ngoho. Ndi ngazwo u tshi tea u dzula u tshi vha kaidza nga maanḓa, uri vha vhe na lutendo lwo khwaṱhaho,
14 uri vha si thetshelese ngano dza Vhayuda na milayo ya vhathu vhane vha hana ngoho.
15 Zwoṱhe zwo kuna kha vhathu vho kunaho;+ fhedzi kha vhathu vha re na tshika na vha si na lutendo a hu na tshithu tsho kunaho, ngauri mihumbulo yavho na mvalo dzavho zwi na tshika.+
16 Vha amba phanḓa ha vhathu uri vha ḓivha Mudzimu, fhedzi vha a mu landula nga mishumo yavho,+ ngauri vha a nengisa, a vha thetshelesi, a vha fanelei u ita mushumo wavhuḓi.
