Evangeli Ya Yohane 1:1-51
1 U bva mathomoni Ipfi+ o vha e hone, huno Ipfi o vha e na Mudzimu,+ Ipfi o vha e mudzimu.+
2 Ndi ene we a vha e na Mudzimu u bva mathomoni.
3 Zwithu zwoṱhe zwo vha hone ngae,+ a hu na tshithu na tshithihi tshe tsha vha hone arali hu si nga ene.
Vhutshilo ho vha hone
4 ngae, vhutshilo ho vha tshedza tsha vhathu.+
5 Tshedza tshi vhonetshela swiswi,+ fhedzi swiswi a ḽi tibi tshedza.
6 Ho vha hu na muṅwe munna we a vha o rumiwa uri a vhe muimeleli wa Mudzimu; o vha a tshi pfi Yohane.+
7 Onoyu munna o vha o ḓela u ṱanziela nga ha tshedza,+ uri vhathu vhoṱhe vha tende musi vho pfa zwe a zwi amba.
8 Ho vha hu si ene tshedza,+ fhedzi o vha o ḓa u ṱanziela nga ha tshenetsho tshedza.
9 Tshedza tsha vhukuma tshine tsha vhonetshela vhathu vhoṱhe tsho vha tshi tsini na u ḓa shangoni.+
10 O vha e shangoni,+ hone shango ḽo vha hone nga ene,+ fhedzi shango a ḽo ngo mu ḓivha.
11 O ḓa shangoni ḽa hawe, fhedzi vhathu vha hawe a vho ngo mu ṱanganedza.
12 Vhoṱhe vhe vha mu ṱanganedza, o vha ṋea maanḓa uri vha vhe vhana vha Mudzimu,+ ngauri vho vha na lutendo dzinani ḽawe.+
13 A vho ngo bebwa nga malofha kana nga u funa ha ṋama kana nga u funa ha muthu, fhedzi nga u funa ha Mudzimu.+
14 Ipfi o vha muthu+ a dzula na riṋe, ra vhona vhugala hawe, vhugala vhune khotsi a vhu ṋea murwa wawe muthihi fhedzi;*+ o vha a tshi takalelwa vhukuma nga Mudzimu, a tshi amba ngoho.
15 (Yohane o ṱanziela nga hae. O huwelela a ri: “Hoyu ndi ene we nda amba nga hae nda ri, ‘A ḓaho murahu hanga o nthanga phanḓa, ngauri o tshila ndi sa athu u vha hone.’”)+
16 Ngauri o vha e na vhuthu vhuhulu, ro bvela phanḓa ri tshi ṱanganedza vhuthu vhuhulu.
17 Ngauri Mulayo wo ṋewa Mushe,+ vhuthu vhuhulu+ na ngoho zwo vha hone nga Yesu Kristo.+
18 A hu na muthu we a vhuya a vhona Mudzimu;+ ndi murwa muthihi fhedzi ane a fana na Mudzimu+ a re tsini na Khotsi+ we a ri ṱalutshedza nga Hae.+
19 Hezwi ndi zwe Yohane a zwi ṱanziela musi Vhayuda vha tshi ruma vhotshifhe na Vhalevi vha bvaho Yerusalema uri vha mu vhudzise uri: “Ndi iwe nnyi?”+
20 Ho ngo hana u fhindula mbudziso yavho, fhedzi o amba ngoho yo fhelelaho a ri: “A si nṋe Kristo.”
21 Vha mu vhudzisa vha ri: “Zwino ri ḓo ri ndi iwe nnyi? U Elia?”+ Yohane a ri: “A si nṋe Elia.” “Naa u Muporofita?”+ A fhindula a ri: “Hai!”
22 Vhone vha ri: “Ndi iwe nnyi? Ri vhudze uri ri kone u fhindula vhe vha ri ruma. Iwe u nnyi?”
23 A ri: “Samusi muporofita Yesaya o amba,+ ndi nṋe ane a khou vhidzelela e sogani ndi tshi ri, ‘Kunakisani nḓila ya Yehova.’”*+
24 Vhenevho vho vha vho rumiwa nga Vhafarisei.
25 Vha mu vhudzisa vha ri: “Ndi ngani u tshi lovhedza arali u si Kristo kana Elia kana Muporofita?”
26 Yohane a ri: “Nṋe ndi lovhedza nga maḓi. Vhukati haṋu ho ima ane ni si mu ḓivhe,
27 ndi ene ane a khou ḓa murahu hanga, a thi fanelei u vhofholola thambo dza thovho* dzawe.”+
28 Zwenezwi zwithu zwo itea Bethania seli ha Mulambo wa Yorodane, he Yohane a vha a tshi khou lovhedza hone.+
29 Nga ḓuvha ḽi tevhelaho Yohane a vhona Yesu a tshi khou ḓa khae, a ri: “Vhonani Ngwana+ ya Mudzimu ine ya fhelisa zwivhi+ zwa shango!+
30 Onoyu ndi ene we nda amba nga hae nda ri: ‘A ḓaho murahu hanga o nthanga phanḓa, ngauri o tshila nṋe ndi sa athu u vha hone.’+
31 Naho ndo vha ndi sa mu ḓivhi, zwo itaho uri ndi lovhedze nga maḓi ndi uri a ḓivhiwe Isiraele.”+
32 Yohane o dovha a ṱanziela a ri: “Ndo vhona muya mukhethwa u tshi tsa sa ḽiivha u tshi bva ṱaḓulu, wa dzula khae.+
33 Na nṋe ndo vha ndi sa mu ḓivhi, fhedzi O nthumaho uri ndi lovhedze maḓini o mmbudza uri: ‘Ane na ḓo vhona muya mukhethwa u tshi tsa wa dzula khae,+ ndi ene ane a ḓo lovhedza nga muya mukhethwa.’+
34 Ndo zwi vhona, nda ṱanziela uri ndi ene Murwa wa Mudzimu.”+
35 Nga ḓuvha ḽi tevhelaho, musi Yohane o ima na vhafunziwa vhawe,
36 a vhona Yesu a tshi khou fhira, a ri: “Vhonani Ngwana+ ya Mudzimu!”
37 Vhafunziwa vhavhili vha tshi pfa zwenezwo, vha tevhela Yesu.
38 Yesu a tshi rembuluwa a vhona vha tshi khou mu tevhela, a ri: “Ni khou ṱoḓa mini?” Vhone vha ri: “Rabi, u dzula ngafhi?” (Rabi zwi amba Mufunzi.)
39 Ene a ri: “Iḓani, ni ḓo hu vhona.” Vha ṱuwa nae vha ya u vhona he a vha a tshi dzula hone, vha dzula nae ḽeneḽo ḓuvha; ho vha hu awara i ṱoḓaho u vha ya vhufumi.*
40 Andrea+ murathu wa Simoni Petro o vha e muṅwe wa vhenevho vhavhili vhe vha pfa zwe Yohane a zwi amba, vha tevhela Yesu.
41 A thoma nga u wana mukomana wawe Simoni, a amba nae a ri: “Ro wana Messia”+ (zwine zwa amba uri “Kristo”).
42 A ṱuwa nae kha Yesu. Musi Yesu a tshi mu lavhelesa a ri: “Simoni+ murwa wa Yohane, u ḓo pfi Kefa” (zwine zwa amba uri “Petro”).+
43 Nga ḓuvha ḽi tevhelaho Yesu o vha a tshi ṱoḓa u ya Galilea. A wana Filipo+ a amba nae a ri: “Ntevhele.”
44 Filipo o vha a tshi bva Betsaida, muḓini wa Andrea na Petro.
45 Filipo a wana Nathanaele+ a amba nae a ri: “Ro wana Yesu murwa wa Yosefa+ a bvaho Nazaretha, we Mushe a ṅwala nga hae Mulayoni, na we Vhaporofita vha ṅwala nga hae.”
46 Fhedzi Nathanaele a ri: “Naa Nazaretha hu nga bva tshithu tshavhuḓi?” Filipo a ri: “Iḓa u vhone.”
47 Yesu a vhona Nathanaele a tshi khou ḓa khae, a amba nae a ri: “Vhonani Muisiraele ane a si vhe na vhufhura.”+
48 Nathanaele a ri: “U nḓivhela ngafhi?” Yesu a ri: “Musi Filipo a sa athu u u vhidza, ndo u vhona u fhasi ha muhuyu.”
49 Nathanaele a ri: “Rabi, u Murwa wa Mudzimu, u Khosi ya Isiraele.”+
50 Yesu a ri: “Naa u vho tenda nge nda amba uri ndo u vhona u fhasi ha muhuyu? U ḓo vhona zwithu zwihulu u fhira hezwi.”
51 A dovha a ri: “Ngoho ndi a ni vhudza ndi ri, ni ḓo vhona ḽiṱaḓulu ḽi tshi vulea na vharuṅwa vha Mudzimu vha tshi gonya na u tsela kha Murwa muthu.”+
Ṱhaluso dzi re magumoni a siaṱari
^ Thevhedz., “murwa mubebwa e eṱhe.”
^ Kana “phashane, navhula.”
^ Hu ṱoḓaho u vha nga 4 nga masiari.
