Phetho
“Ni edzise vhe nga lutendo na u konḓelela vha ḽa ifa ḽe vha fulufhedziswa.”—VHAHEBERU 6:12.
1, 2. Ndi ngani zwi zwa ndeme uri ri vhe na lutendo zwino? Fanyisani.
LUTENDO. Ndi ipfi ḽavhuḓi, ḽine ḽa imela pfaneleo yavhuḓi vhukuma. Naho zwo ralo, musi ri tshi vhona ḽeneḽo ipfi, ndi zwavhuḓi uri ri humbule nga ha ḽiṅwe ipfi, ḽine ḽa vha: “Ṱavhanyiswa!” Arali ri si na lutendo, ri tea u vha nalwo nga u ṱavhanya. Arali ri na lutendo, ri tea u lu tsireledza na u lu ṱhogomela nga u ṱavhanya. Ndi ngani?
2 Kha ri ri ni khou buḓa sogani ḽihulwane. Ni khou ṱoḓa maḓi nga maṱo matswuku. Musi ni tshi a wana, ni tea u a tsireledzea uri a sa ḓimulwe nga ḓuvha. Nga zwenezwo, ni tea u a ḓadzisa u itela uri ni vhe na o eḓanaho u swika hune na khou ya hone. Ṋamusi ri khou tshila sogani ḽa lwa muya, shango ḽine lutendo lwa vhukuma—lune ra nga lu fanyisa na maḓi—lwa sa wanale nga hu leluwaho nahone lwa ḓimuwa nga u ṱavhanya arali ra sa lu tsireledza na u lu ṱhogomela. Yeneyi ṱhoḓea yo ṱavhanyiswa; samusi ri nga si kone tshila arali ri si na maḓi, ri nga si kone u tshila nga lwa muya arali ri si na lutendo.—Vharoma 1:17.
3. Yehova o ri ṋea mini u itela u ri thusa uri ri fhaṱe lutendo nahone ndi zwifhio zwithu zwivhili zwine ra tea u dzula ri tshi humbula u zwi ita?
3 Yehova u a ḓivha nḓila ye zwa ṱavhanyiswa ngayo uri ri vhe na lutendo, nahone u ḓivha nḓila ine zwa konḓa ngayo fhaṱa na u vhulunga lutendo ṋamusi. Ndi ngazwo o ri ṋea tsumbo dzine ra tea u dzi edzisa. Yehova o hevhedza muapostola Paulo uri a ṅwale uri: “Ni edzise vhe nga lutendo na u konḓelela vha ḽa ifa ḽe vha fulufhedziswa.” (Vhaheb. 6:12) Ndi ngazwo ndangulo ya Yehova yo ri ṱuṱuwedza uri ri ḓidine vhukuma u itela uri ri edzise tsumbo dza vhanna na vhafumakadzi vha fulufhedzeaho, vha ngaho vhe ra vha haseledza kha yeneyi bugu. Zwino ri tea u ita mini? Kha ri humbule zwithu zwivhili: (1) Ri tea u dzula ri tshi khwaṱhisa lutendo lwashu; (2) ri fanela u dzula ri tshi humbula nga ha fulufhelo ḽashu.
4. Sathane o sumbedza hani uri ndi swina ḽa lutendo, fhedzi ndi ngani ri songo tea u fulufhuwa?
4 Dzulani ni tshi khwaṱhisa lutendo lwaṋu. Sathane ndi swina ḽihulwane ḽa lutendo. Muvhusi wa ḽino shango o shandula ano maitele a zwithu uri a vhe soga lune zwi a konḓa uri ri dzule ri na lutendo. Maanḓa awe ndi mahulwane vhukuma kha ashu. Naa ri tea u fulufhuwa uri ri nga si kone u ṱahulela lutendo na u lu khwaṱhisa? Na khathihi! Yehova ndi Khonani khulwane ya vhoṱhe vhane vha ṱoḓa lutendo lwa vhukuma. U ri khwaṱhisedza uri a nga ri thusa uri ri lwe na Diabolo nahone ra ita uri a ri shavhe! (Yak. 4:7) Ri lwa nae nga u ḓiṋea tshifhinga ḓuvha ḽiṅwe na ḽiṅwe u itela u khwaṱhisa lutendo lwashu na u lu fhaṱa. Nga nḓila-ḓe?
5. Vhanna na vhafumakadzi vha fulufhedzeaho vho bulwaho Bivhilini vho wana hani lutendo? Ṱalutshedzani.
5 Samusi ro zwi vhona, vhanna na vhafumakadzi vha lutendo vho bulwaho Bivhilini a vho ngo bebwa vha tshi fulufhedzea. Vho sumbedza nga nḓila ye vha tshila ngayo uri muthu u vha na lutendo nga thuso ya muya mukhethwa wa Yehova. (Vhagal. 5:22, 23) Vho rabelela thuso nahone Yehova a bvela phanḓa a tshi khwaṱhisa lutendo lwavho. Kha ri edzise tsumbo yavho, ri songo vhuya ra hangwa uri Yehova u ṋea muya wawe nga mafunda vhane vha u humbela na vhane vha ita zwithu u tendelana na thabelo dzavho. (Luka 11:13) Naa hu na zwiṅwe zwine ra nga zwi ita?
6. Ri nga vhuyelwa hani nga vhuḓalo nga u guda mafhungo a Bivhili?
6 Kha yeneyi bugu, ro haseledza tsumbo dzi si gathi fhedzi dza vhathu vhe vha sumbedza lutendo lu swayeaho. Hu na vhanzhi vhukuma! (Vhalani Vhaheberu 11:32.) Ri nga guda zwithu zwinzhi zwa ndeme kha muṅwe na muṅwe wavho. Arali ra sokou vhala nga nṱha mafhungo a Bivhili ane a amba nga ha vhathu vha re na lutendo, a ri nga ḓo khwaṱhisa lutendo lwashu. U itela uri ri vhuyelwe nga vhuḓalo musi ri tshi vhala, ri tea u ḓiṋea tshifhinga tsha u vhala zwi re ngomu Bivhilini na vhubvo ha mafhungo ayo. Arali tshifhinga tshoṱhe ra humbula uri vhenevho vhanna na vhafumakadzi vha songo fhelelaho vho vha vhe na “maḓipfele a fanaho na ashu,” tsumbo dzavho dzi ḓo vha dza vhukuma kha riṋe. (Yak. 5:17) Arali ra ḓivhea vhuimoni havho, ri nga kona u pfesesa nḓila ye vha ḓipfa ngayo musi vho sedzana na khaedu na thaidzo dzi fanaho na dzashu.
7-9. (a) Vhaṅwe vhanna na vhafumakadzi vha lutendo vha zwifhingani zwa Bivhili vho vha vha tshi nga ḓipfa hani nga u gwadamela Yehova nga nḓila ine ra mu gwadamela ngayo ṋamusi? (b) Ndi ngani ri tshi tea u khwaṱhisa lutendo lwashu nga mishumo?
7 Ri nga dovha ra khwaṱhisa lutendo lwashu nga zwithu zwine ra zwi ita. Hafhu “lutendo lu si na mishumo lwo fa.” (Yak. 2:26) Edzani u humbula nḓila ine vhanna na vhafumakadzi vhe ra vha haseledza vha nga takala ngayo arali vha avhelwa u ita mushumo we Yehova a ri humbela uri ri u ite ṋamusi!
8 Sa tsumbo, ni vhona u nga Abrahamu o vha a tshi nga ḓipfa hani arali a vhudzwa uri nṱhani ha uri a gwadamele Yehova kha aletare dza tshifhinganyana dzo fhaṱwaho sogani, a nga mu gwadamela vhukati ha zwigwada zwo dzudzanywaho zwa vhatendi ngae Holoni dzavhuḓi dza Muvhuso na mabuthanoni mahulwane, hune mafulufhedziso e a a vhona “a tshee kule” a haseledzwa na u ṱalutshedzwa nga vhuḓalo? (Vhalani Vhaheberu 11:13.) Elia ene o vha a tshi ḓo ḓipfa hani arali a vhudzwa uri mushumo wawe u katela u dalela vhathu u itela u vha vhudza nga ha mulaedza u khuthadzaho na wa fulufhelo, nṱhani ha u vhulaha vhaporofita vhavhi vha Baali ngeno a tshi khou lingedza u shumela Yehova nga fhasi ha khosi mmbi ya mugunei? A zwi timatimisi uri vhenevho vhanna na vhafumakadzi vha lutendo vho bulwaho Bivhilini vho vha vha tshi ḓo u ṱanganedza nga u ṱavhanya mushumo wa u gwadamela Yehova nga nḓila ine ra mu gwadamela ngayo ṋamusi.
9 Nga zwenezwo, kha ri bvele phanḓa ri tshi khwaṱhisa lutendo lwashu nga mishumo. Arali ra ita nga u ralo, ri ḓo vha ri tshi khou shumisa tsumbo dza vhanna na vhafumakadzi vha lutendo vho bulwaho Ipfini ḽa Mudzimu ḽo hevhedzwaho. Samusi zwo bulwa kha Marangaphanḓa, ri ḓo ḓipfa ri na vhushaka ha tsini-tsini navho u fana na khonani dzashu. Naho zwo ralo, vhukonani ho raloho vhu nga vha ha vhukuma hu si kale.
10. Ri ḓo takalela mini Paradisoni?
10 Dzulani ni tshi humbula nga fulufhelo ḽaṋu. Vhanna na vhafumakadzi vha fulufhedzeaho vho dzula vha tshi khwaṱhiswa nga fulufhelo ḽe Mudzimu a vha ṋea ḽone. Naa zwo ralo na kha inwi? Sa tsumbo, edzani u humbula nḓila ine na ḓo takala ngayo musi ni tshi ṱangana na vhashumeli vha Mudzimu vha fulufhedzeaho musi vha tshi vuswa tshifhingani tsha “mvuwo ya vho lugaho na vha songo lugaho.” (Vhalani Mishumo 24:15.) Ndi mini zwine na ṱoḓa u vha vhudzisa zwone?
11, 12. Shangoni ḽiswa, ndi mbudziso dzifhio dzine na nga dzi vhudzisa (a) Abele? (b) Noaxe? (c) Abrahamu? (d) Ruthe? (e) Abigaili? (f) Esitere?
11 Musi ni tshi ṱangana na Abele, naa ni ḓo mu vhudzisa uri vhabebi vhawe vho vha vhe vhathu-ḓe? Kana ni nga mu vhudzisa uri: “Naa no vhuya na amba na vhakerube vhe vha vha ho linda nḓila i yaho Edeni? Vho vhuya vha ni fhindula?” Hu pfi mini nga Noaxe? Ni nga kha ḓi mu vhudzisa uri: “Naa no vha ni tshi ofha Vhanefilimi? No ṱhogomela hani zwipuka zwoṱhe ṅwahani woṱhe we na u fhedza ni gungwani?” Arali na ṱangana na Abrahamu, ni nga kha ḓi mu vhudzisa uri: “Naa no vhuya na ṱangana na Semu? Ndi nnyi we a ni gudisa nga ha Yehova? Naa zwo ni konḓela u pfuluwa Uri?”
12 Nga hu fanaho, ṱhogomelani dziṅwe mbudziso dzine na nga kha ḓi ṱoḓa u dzi vhudzisa vhafumakadzi vha fulufhedzeaho vhane vha ḓo vha vho vuswa vhafuni. “Ruthe, ndi mini zwe zwa ni sudzulusela uri ni vhe mugwadameli wa Yehova?” “Abigaili, naa no ofha u vhudza Nabali nga ha nḓila ye na thusa ngayo Davida?” “Esitere, ho itea mini kha inwi na Maradokai musi mafhungo a re Bivhilini o no fhela?”
13. (a) Ndi mbudziso dzifhio dzine vho vuswaho vha nga ni vhudzisa dzone? (b) Ni ḓipfa hani nga ha tshilavhelelwa tsha u ṱangana na vhanna na vhafumakadzi vha fulufhedzeaho vha zwifhingani zwa kale?
13 Ndi ngoho uri vhenevho vhanna na vhafumakadzi vha fulufhedzeaho vha ḓo vha vhe na mbudziso nnzhi dzine vha ṱoḓa u ni vhudzisa dzone-vho. Zwi ḓo takadza lungafhani u vha vhudza nga ha maḓuvha a vhufhelo na nḓila ye Yehova a fhaṱutshedza ngayo vhathu vhawe zwifhingani zwi konḓaho! A zwi timatimisi uri vha ḓo kwamea vhukuma musi vha tshi pfa nga ha nḓila ye Yehova a khunyeledza ngayo mafulufhedziso awe oṱhe. Misini yeneyo, a zwi nga ḓo vhuya zwa ṱoḓea uri ri vhone nga maṱo a muhumbulo vhashumeli vha fulufhedzeaho vha Mudzimu vho bulwaho Bivhilini. Ri ḓo vha ri navho Paradisoni! Nga zwenezwo, bvelani phanḓa ni tshi ita zwi re maanḓani aṋu u itela uri vhenevho vhathu vha vhe vha vhukuma kha inwi zwino. Bvelani phanḓa ni tshi edzisa lutendo lwavho. U nga ri ni nga ḓiphina nga u shumela Yehova khathihi navho vhe khonani dzaṋu dzi funwaho nga hu sa fheli!
