NGUDO 15
Ndi Ngani Ni Tshi Fanela U Bvela Phanḓa Ni Tshi Guda?
1. Ni ḓo vhuyelwa hani nga u bvela phanḓa ni tshi guda Bivhili?
A zwi timatimisi uri zwe na zwi guda Bivhilini zwo ita uri ni fune Yehova nga ho engedzeaho. Ni fanela u bvela phanḓa ni tshi ita zwoṱhe zwine na nga kona uri ni dzule ni tshi mu funa. (1 Petro 2:2) Uri ni kone u wana vhutshilo vhu sa fheli, ni fanela u bvela phanḓa ni tshi sendela tsini na Mudzimu nga u guda Ipfi ḽawe.—Vhalani Yohane 17:3; Yuda 21.
Musi ni tshi guda zwo engedzeaho nga ha Mudzimu, ni ḓo vha na lutendo lwo khwaṱhaho. Lutendo lu ḓo ni thusa uri ni takadze Mudzimu. (Vhahevheru 11:1, 6) Lu ḓo ni thusa uri ni rembuluwe na u ita tshanduko vhutshiloni haṋu.—Vhalani Mishumo 3:19.
2. U ḓivha haṋu Mudzimu zwi nga vhuyedza hani vhaṅwe?
Ni ḓo sendela tsini-tsini na Yehova
Samusi roṱhe ri tshi takalela u vhudza vhaṅwe mafhungo maḓifha, zwi tou vha khagala uri ni ḓo ṱoḓa u vhudza vhaṅwe zwe na zwi guda. Musi ni tshi bvela phanḓa na u guda Bivhili, ni ḓo guda nḓila ine na nga shumisa ngayo Bivhili u itela u vhudza vhaṅwe mafhungo maḓifha na u vha ṱalutshedza uri ndi ngani ni na lutendo kha Yehova.—Vhalani Vharoma 10:13-15.
Vhathu vhanzhi vha thoma nga u vhudza khonani dzavho kana mashaka avho mafhungo maḓifha. Zwi iteni nga vhuṱali. Nṱhani ha u vha vhudza uri vhurereli havho a si ha ngoho, vha vhudzeni nga ha zwe Mudzimu a zwi fhulufhedzisa. Ni songo hangwa uri kanzhi vhathu vha kungwa nga nḓila ine na ḓifara ngayo, hu si nga zwine na zwi amba.—Vhalani 2 Timotheo 2:24, 25.
3. Ni ḓo vhuyelwa nga mini nga u vha na vhushaka na Mudzimu?
U guda Ipfi ḽa Mudzimu zwi ḓo ni thusa uri ni vhe na vhushaka havhuḓi nae. Nga u ya ha tshifhinga, ni ḓo sendela tsini-tsini nae. Ni nga ḓiṋekedzela kha Yehova nga thabelo na vha mushumeli wawe a funwaho. Zwi takadzaho vhukuma ndi uri ni ḓo vha ṅwana wawe.—Vhalani 2 Vhakorinta 6:18.
4. Ni nga ita hani mvelaphanḓa nṱhani ha u ima fhethu huthihi?
Musi ni tshi bvela phanḓa na u guda Bivhili, ni ḓo guda nḓila ine na nga shumisa ngayo vhulivhisi vhu re khayo. (Vhahevheru 5:13, 14) Humbelani muṅwe wa Ṱhanzi dza Yehova uri a gude na inwi Bivhili a tshi shumisa bugu Bivhili I Nga Ri Funza Mini? Musi ni tshi guda zwo engedzeaho Ipfini ḽa Mudzimu, zwi ḓo ni tshimbilela zwavhuḓi.—Vhalani Phisalema 1:1-3; 73:27, 28.
Mafhungo maḓifha a bva ha Yehova, Mudzimu o takalaho. Ni nga sendela tsini nae nga u ḓikonanya na vhathu vhawe. (Vhahevheru 10:24, 25) Arali na bvela phanḓa ni tshi ita zwoṱhe zwine na nga kona uri ni takadze Yehova, ni ḓo wana vhutshilo vhu sa fheli. U sendela tsini na Mudzimu ndi zwa ndeme u fhira zwithu zwoṱhe.—Vhalani 1 Timotheo 1:11; 6:19.
You May Also Like
NGA HA RIṊE
Ndi Ngani ni Tshi Fanela u Guda Bivhili?
Bivhili i khou thusa vhathu vha dzimilioni shangoni ḽoṱhe uri vha wane phindulo dza mbudziso dza ndeme vhutshiloni. Naa ni nga takalela u vha muṅwe wavho?
