NGUDO 10
Ni Nga Ḓivha Hani Vhurabeli Ha Ngoho?
1. Naa hu na vhurereli vhuthihi fhedzi ha ngoho?
“Thanyelani vhaporofita vha u zwifha.”—MATEO 7:15.
Yesu o funza vhatevheli vhawe nga ha vhurereli vhuthihi fhedzi ha ngoho. Vhu fana na nḓila i yaho vhutshiloni vhu sa fheli. Musi Yesu a tshi amba nga yeneyo nḓila o ri: “Vha i wanaho a si vhanzhi.” (Mateo 7:14) Mudzimu u ṱanganedza fhedzi vhurabeli vhune ha tevhedza zwi re Ipfini ḽawe ḽine ḽa vha Bivhili. Vhagwadameli vhoṱhe vha ngoho vha tenda kha zwithu zwithihi.—Vhalani Yohane 4:23, 24; 14:6; Vhaefesa 4:4, 5.
Ṱalelani vidio ine ya ri, Naa Mudzimu U Ṱanganedza Mifuda Yoṱhe Ya Vhurabeli?
2. Yesu o ri mini nga ha Vhakriste vha mazwifhi?
“Vha amba phanḓa ha vhathu uri vha ḓivha Mudzimu, fhedzi vha a mu landula nga mishumo yavho.”—TITO 1:16.
Yesu o vhudza Vhakriste uri hu ḓo vha na vhaporofita vha mazwifhi vhane vha ḓo funza vhathu mazwifhi. Vha ḓiita u nga ndi vhagwadameli vha ngoho. Vha ḓivhidza Vhakriste. Fhedzi ni nga vhona zwine vhenevho vhathu vha vha zwone zwa vhukuma. Ni nga zwi vhona hani? Ndi vhurabeli ha ngoho fhedzi vhune ha vha na Vhakriste vha vhukuma, vhane vha ḓifara nga nḓila yavhuḓi ine ya kona u vhoniwa nga vhathu vhoṱhe.—Vhalani Mateo 7:13-23.
3. Ni nga ḓivha hani vhagwadameli vha ngoho?
Ṱhogomelani zwithu zwiṱanu zwi tevhelaho zwine na nga vha ḓivha ngazwo:
-
Vhagwadameli vha ngoho vha ṱhonifha Bivhili ngauri ndi Ipfi ḽa Mudzimu. Vha lwela u tshila u tendelana na zwine ya zwi amba. Vhurereli ha ngoho ho fhambana na vhurereli ha mazwifhi ngauri a vhu ḓitiki nga mihumbulo ya vhathu. (Mateo 15:7-9) Vhagwadameli vha ngoho vha tshila u tendelana na zwine vha zwi funza.—Vhalani Yohane 17:17; 2 Timotheo 3:16, 17.
-
Vhatevheli vha ngoho vha Yesu vha hulisa dzina ḽa Mudzimu, ḽine ḽa vha Yehova. Yesu o hulisa dzina ḽa Mudzimu nga u ḽi ḓivhadza. O thusa vhathu uri vha ḓivhe Mudzimu na u vha funza uri vha rabele uri dzina ḽa Mudzimu ḽi khethwe. (Mateo 6:9) Hune na dzula hone, ndi vhufhio vhurereli vhune ha ḓivhadza dzina ḽa Mudzimu?—Vhalani Yohane 17:26; Vharoma 10:13, 14.
-
Vhakriste vha ngoho vha huwelela nga ha Muvhuso wa Mudzimu. Mudzimu o rumela Yesu uri a huwelele mafhungo maḓifha a Muvhuso. Muvhuso wa Mudzimu ndi wone fhedzi une wa nga thusa vhathu. Yesu o bvela phanḓa a tshi amba nga hawo u swikela a tshi fa. (Luka 4:43; 8:1; 23:42, 43) O amba uri vhatevheli vhawe vha ḓo huwelela nga hawo. Arali ha ḓa muthu a amba na inwi nga ha Muvhuso wa Mudzimu, kanzhi a nga vha e wa vhurereli vhufhio?—Vhalani Mateo 24:14.
-
Vhatevheli vha Yesu a vha tshipiḓa tsha ḽino shango ḽivhi. Ni nga kona u vha vhona ngauri a vha sheli mulenzhe kha zwa politiki nahone a vha lwi na vhathu vhane vha dzula navho. (Yohane 17:16; 18:36) Zwiṅwe hafhu, a vha edzisi zwithu zwi si zwavhuḓi na zwi re na khombo zwine zwa itwa nga vhathu vha ḽino shango.—Vhalani Yakobo 4:4.
-
Vhakriste vha ngoho vha funana nga mbilu yoṱhe. Ipfi ḽa Mudzimu ḽo vha gudisa uri vha ṱhonifhe vhathu vha tshaka dzoṱhe. Naho kanzhi vhurereli ha mazwifhi vhu tshi tikedza nndwa dza dzitshaka, vhagwadameli vha ngoho a vha zwi tikedzi. (Mika 4:1-3) Nṱhani hazwo, Vhakriste vha ngoho vha shumisa tshifhinga tshavho na thundu dzavho u itela u thusa vhaṅwe na u vha ṱuṱuwedza.—Vhalani Yohane 13:34, 35; 1 Yohane 4:20.
4. Zwino ni nga kona u ḓivha vhurereli ha ngoho?
Ndi vhufhio vhurereli vhune ha ita zwithu u tendelana na zwine zwa funzwa nga Bivhili? Ndi vhurereli vhufhio vhune ha hulisa dzina ḽa Mudzimu na u ḓivhadza uri Muvhuso wa Mudzimu ndi wone fhedzi une wa ḓo thusa vhathu? Ndi vhufhio vhurereli vhune vhathu vha hone vha funana na u sa tikedza dzinndwa? Ni nga ri mini?—Vhalani 1 Yohane 3:10-12.
