Yehova o vhumba Adamu na Eva e na tshilavhelelwa tsha u ri vha tshile nga hu sa fheli Paradisoni.Sathane o remba dzina ḽa Mudzimu na u vutshela vhuvhusi Hawe. Adamu na Eva vho ṱanganela na Sathane kha honoho vhushandukwa, zwenezwo zwo mbo ḓi ita uri vha fe khathihi na vhana vhavho

Yehova o haṱula eneo mashandukwa nahone a fulufhedzisa uri Muvhofhololi, kana Mbeu, u ḓo fhelisa Sathane, na mvelelo dza honoho vhushandukwa na tshivhi

Yehova o fulufhedzisa Abrahamu na Davida uri vha ḓo vha vhomakhulukuku vha Mbeu, kana Messia, ane a ḓo vhusa sa Khosi u ya nga hu sa fheli

Yehova o hevhedza vhaporofita uri vha ambe hu tshee nga phanḓa uri Messia u ḓo fhelisa tshivhi na lufu. E na vhane a ḓo vhusa navho, u ḓo vhusa sa Khosi ya Muvhuso wa Mudzimu, wonoyo muvhuso u ḓo fhelisa dzinndwa, malwadze, naho hu lufu

Yehova o rumela Murwa wawe kha ḽifhasi nahone a ṱalula Yesu sa Messia. Yesu o huwelela nga ha Muvhuso wa Mudzimu nahone a kumedzela vhutshilo hawe sa tshiṱhavhelo. Nga zwenezwo, Yehova a mu vusa sa tshivhumbiwa tsha muya

Yehova o vhea Murwa wawe kha khuluṋoni sa Khosi ya ṱaḓulu, u itela uri vhathu vha vhone u thoma ha maḓuvha a vhufhelo a ano maitele a zwithu. Yesu u livhisa vhatevheli vhawe vha kha ḽifhasi musi vha tshi khou huwelela nga ha Muvhuso wa Mudzimu shangoni ḽoṱhe

Yehova u livhisa Murwa wawe u itela uri a ḓise Muvhuso kha ḽifhasi. Wonoyo Muvhuso u ḓo pwashekanya mivhuso yoṱhe mivhi, wa ḓisa Paradiso, na u ita uri vhathu vha fulufhedzeaho vha vhe vho fhelelaho. Zwenezwo zwi ḓo imelela vhuvhusi ha Yehova, nahone dzina ḽawe ḽi ḓo khethwa u ya nga hu sa fheli