TSHIPIḒA 2
Vho Xelelwa Nga Ndugelo Ya U Tshila Paradisoni
Muruṅwa wa ḽishandukwa o ṱuṱuwedza munna na musadzi vha u thoma, Adamu na Eva uri vha landule vhuvhusahoṱhe ha Mudzimu. Nga zwenezwo, tshivhi na lufu zwa dzhena shangoni
NGA phanḓa ha uri a vhumbe vhathu, Mudzimu o vhumba zwivhumbiwa zwinzhi zwa muya zwi sa vhonali—vharuṅwa. Ngei Edeni, muruṅwa wa ḽishandukwa, ane a pfi Sathane Diabolo, nga vhufhura o linga Eva uri a ḽe muri we wa dzivhiswa nga Mudzimu.
A tshi shumisa ṋowa uri a ambe nae, Sathane o amba uri Mudzimu o vha a tshi khou dzivhisa musadzi na munna wawe tshiṅwe tshithu tshi tamisaho. Onoyo muruṅwa o vhudza Eva na munna wawe uri vha nga si fe arali vha ḽa muri wo dzivhiswaho. Sathane o vha a tshi khou pomoka Mudzimu uri o zwifhela vhana Vhawe. Sathane o ita uri u sa thetshelesa Mudzimu zwi vhonale zwi zwithu zwavhuḓi zwine zwa ḓo vha ṋea nḓivho na mbofholowo. Fhedzi zwenezwi zwo vha zwi mazwifhi—zwi re zwone ndi uri o vha e mazwifhi a u thoma e a vhuya a ambiwa kha ḽifhasi. Khani khulwane ye ya vha i hone yo vha i tshi katela vhuvhusahoṱhe ha Mudzimu, kana vhuvhusi vhuhulwane—arali Mudzimu o vha o tea u vhusa nahone a tshi vhusa nga nḓila yavhuḓi a tshi itela vhathu vhawe.
Eva o tenda mazwifhi a Sathane. O mbo ḓi tama wonoyo mutshelo, nahone a u ḽa. Nga murahu a u ṋea munna wawe, na ene a ḽa. Nga zwenezwo vho mbo ḓi vha vhaitazwivhi. Yeneyo nyito yo vha i tshi sumbedza vhushandukwa. Nga u khetha u sa thetshelesa mulayo wa Mudzimu nga khole, Adamu na Eva vho landula vhuvhusi ha Musiki we a vha ṋea tshiṅwe na tshiṅwe, u katela na vhutshilo ho fhelelaho.
Mbeu “i ḓo U pwasha ṱhóho, iwe wa ḓo i luma tshirethe.”—Genesi 3:15
Mudzimu o mbo ḓi haṱula eneo mashandukwa. O dzula o amba nga ha Mbeu yo fulufhedziswaho, kana Muvhofhololi, ane a ḓo fhelisa Sathane. Mudzimu ho ngo fhelisa Adamu na Eva nga u ṱavhanya, nga yeneyo nḓila o vha a tshi sumbedza u pfela vhuṱungu vhana vhavho vha sa athu bebiwaho. Vhenevho vhana vho vha vha tshi ḓo vha na fulufhelo nga ṅwambo wa uri Muthu we Mudzimu a vha a tshi ḓo mu ruma kha ḽifhasi u ḓo fhelisa mvelelo dzi vhavhaho dze dza vha hone nga vhushandukwa ha ngei Edeni. Nḓila ine yeneyi ndivho ya Mudzimu ya malugana na Mutshidzi ane a khou ḓa ya ḓo ḓadzea ngayo—na uri onoyo Muthu ndi nnyi—yo vha i tshi ḓo dzumbululwa nga zwiṱuku nga zwiṱuku musi hu tshi khou ṅwalwa Bivhili.
Mudzimu o pandela Adamu na Eva Paradisoni. Vho vha vha tshi fanela u shuma vhukuma u itela uri vha ḓiṱhogomele nga u lima nnḓa ha tsimu ya Edeni. Eva o mbo ḓi vhifha muvhilini nahone a beba Kaini, ane a vha ṅwana wa u thoma wa Adamu na Eva. Vhenevho vhavhingani vho mbo ḓi vha na vhaṅwe vharwa na vhananyana, u katela na Abele na Sethe, ane a vha makhulukuku wa Noaxe.
—Enea mafhungo a wanala kha Genesi dzindima 3 na 5; Ndzumbululo 12:9.
