NDIMA YA 24
A Huna Tshine Tsha Nga “Ri Fhandakanya Na Lufuno Lwa Mudzimu”
1. Ndi maḓipfele afhio o khakheaho ane vhathu vhanzhi vha vha nao, u katela na vhaṅwe Vhakriste vha ngoho?
NAA Yehova Mudzimu u a ni funa? Vhaṅwe vha tenda uri Mudzimu u funa vhathu vhoṱhe nga u tou angaredza, samusi na Yohane 3:16 i tshi amba nga u ralo. Fhedzi kha ḽiṅwe sia vha nga ḓipfa nga heyi nḓila: ‘Mudzimu a nga si fune nṋe nga ho livhaho.’ Na Vhakriste vha ngoho nga zwiṅwe zwifhinga vha nga timatima zwenezwo. Muṅwe munna o kuleaho nungo o ri: “Ndi wana zwi tshi nkonḓela u tenda uri Mudzimu u a nṱhogomela.” Naa ni a ḓipfa nga u ralo nga zwiṅwe zwifhinga?
2, 3. Ndi nnyi ane a ṱoḓa uri ri tende uri a ri tshithu kana uri a ri vha ndeme phanḓa ha Yehova, nahone ri nga lwisana hani na eneo maḓipfele?
2 Sathane u ṱoḓa ri tshi tenda uri Yehova Mudzimu ha ri funi nahone ha ri dzhieli nṱha. Ndi ngoho uri kanzhi Sathane u fhura vhathu nga u ita uri vha ḓidzhiele nṱha nga ṅwambo wa zwine vha vha nazwo nahone vha ḓikukumuse. (2 Vha-Korinta 11:3) Fhedzi u dovha a takalela u ita uri vha vhuimo ha fhasi vha ḓipfe vha si na tshirunzi. (Yohane 7:47-49; 8:13, 44) Hezwi zwo ralo zwihuluhulu kha ano ‘maḓuvha a vhufhelo’ a konḓaho. Vhanzhi ṋamusi vha aluwa miṱani ine hu sa vhe na “lufuno.” Vhaṅwe vha anzela u sedzana na vhathu vha re na vhuhali, tseḓa, na tshipimbi. (2 Timotheo 3:1-5) U shengedzwa, u khethululwa, u vhengwa, kana u farwa luvhi miṅwaha minzhi, zwi nga vha zwo ita uri vhenevho vhathu vha vhone u nga a vha tshithu kana a vha funwi.
3 Arali ni na eneo maḓipfele o khakheaho, ni songo fulufhuwa. Vhunzhi hashu ri a ḓivhona mulandu nga tshiṅwe tshifhinga. Fhedzi humbulani uri Ipfi ḽa Mudzimu ḽo ṅwalelwa u “vhuyedzedza nḓilani” na u “thutha mitsheṱo ya maswina.” (2 Timotheo 3:16; 2 Vha-Korinta 10:4) Bivhili i ri: “Asizwi zwiné ra ḓo ḓivha ngazwo’ zwauri ri bva kha mafhungo-ngoho, ra rudza dzimbilu dzashu phanḓa ha Ene ngazwo’: Ri nga ri: Mbilu i tshi ri hwelela ya ri laṱa ra ri: Tendá Mudzimu a tshi fhira mbilu yashu, a tshi ḓivha zwoṱhe.” (1 Yohane 3:19, 20) Kha ri ṱhogomele nḓila nṋa dzine Maṅwalo a ri thusa u “rudza dzimbilu dzashu” nga lufuno lwa Yehova.
Yehova U A Ni Dzhiela Nṱha
4, 5. Tshifanyiso tsha Yesu tsha ṱhongola tshi sumbedza hani uri ri vha ndeme phanḓa ha Yehova?
4 Tsha u thoma, Bivhili i ri funza nga ho livhaho uri Mudzimu u dzhia mushumeli wawe muṅwe na muṅwe e wa ndeme. Sa tsumbo, Yesu o ri: “Naa ṱhongola mbili a dzi rengwi nga peni nthihi naa? Na nthihi yadzo i nga si wele fhasi arali khotsi-aṋu á sa zwi funi. Inwi zwino, huufha na mavhudzi a ṱhohoni dzaṋu ó vhalwa oṱhe! Ndi zwiné nda ri: Ni songo ofha; inwi ni fhira ṱhongola nzhi.” (Mateo 10:29-31) Ṱhogomelani zwe eneo maipfi a vha a tshi amba zwone kha vhathetshelesi vha Yesu vha ḓana ḽa u thoma ḽa miṅwaha.
Yehova u dzhiela nṱha u konḓelela hashu musi ro sedzana na milingo
5 Ri nga ḓivhudzisa uri ndi ngani muthu a tshi vhuya a ḓidina a renga ṱhongola. Ndi ngauri misini ya Yesu ṱhongola yo vha i tshiṋoni tsha mutengo wa fhasi vhukuma kha zwiṋoni zwoṱhe zwine zwa ḽiwa. Ṱhogomelani uri nga peni nthihi i si na ndeme, murengi o vha a tshi wana ṱhongola mbili. Fhedzi nga murahu Yesu o amba uri arali muthu o ḓilugisela u shumisa peni mbili, o vha a sa wani ṱhongola nṋa fhedzi, fhedzi o vha a tshi wana ṱhanu. Tshiṅwe tshiṋoni tsho vha tshi basela samusi tsho vha tshi si na ndeme na luthihi. Khamusi zwenezwo zwiṋoni zwo vha zwi si na ndeme kha vhathu, fhedzi Musiki o vha a tshi zwi dzhia hani? Yesu o ri: “A huna na nthihi yadzo [na ya basela] yo hangwiwaho nga Mudzimu.” (Luka 12:6, 7) Zwino ri a pfesesa mbuno ya Yesu. Arali Yehova a tshi dzhiela nṱha ṱhongola nthihi, muthu ndi wa ndeme lungafhani khae! Samusi Yesu o zwi ṱalutshedza, Yehova u ḓivha zwidodombedzwa zwoṱhe nga ha riṋe. Ee, mavhudzi oṱhe a re ṱhohoni dzashu o vhaliwa!
6. Ndi ngani ri tshi nga vha na vhungoho ha uri Yesu o vha a sa khou kaludza zwithu musi a tshi amba uri mavhudzi a re ṱhohoni dzashu o vhaliwa?
6 Naa mavhudzi ashu o vhaliwa? Vhaṅwe vha nga humbula uri Yesu o vha a tshi khou kaludza zwithu. Naho zwo ralo, edzani u humbula nga ha fulufhelo ḽa mvuwo. Yehova u a ri ḓivha zwavhuḓi lune a nga dovha a ri sika! U ri dzhiela nṱha vhukuma lune u humbula tshidodombedzwa tshiṅwe na tshiṅwe, u katela na mutevhe wa gene dzashu na zwine ra zwi humbula na zwe ra zwi ita miṅwahani yashu yoṱhe. a U vhala mavhudzi ashu—a ṱoḓaho u vha 100 000 ṱhohoni—i ḓo vha nyito i leluwaho i tshi vhambedzwa na zwenezwo.
Ndi Mini Zwine Yehova A Zwi Vhona Kha Riṋe?
7, 8. (a) Ndi dzifhio dziṅwe pfaneleo dzine Yehova a takalela u dzi vhona musi a tshi lavhelesa mbilu dza vhathu? (b) Ndi ifhio miṅwe mishumo ine ra i ita ine Yehova a i dzhiela nṱha?
7 Tsha vhuvhili, Bivhili i ri funza zwine Yehova a takalela u zwi vhona kha vhashumeli vhawe. Nga u tou livha, u takalela pfaneleo dzashu dzavhuḓi na vhuḓidini vhune ra vhu ita. Khosi Davida o vhudza murwa wawe Salomo a ri: “Yehova u lavhelesa mbilu dzoṱhe, u ḓivha na zwiphiri zwine muthu a elekanya.” (1 Koronika 28:9) Musi Mudzimu a tshi lavhelesa mbilu dza vhathu vha zwigidi zwa dzimilioni kha ḽino shango ḽa vhuvemu, ḽo ḓalaho vengo, u fanela u vha a tshi takala lungafhani musi a tshi wana mbilu i funaho mulalo, mafhungo-ngoho, na u luga! Mudzimu u ita mini musi a tshi wana mbilu ine ya mu funesa, ine ya ṱoḓa u guda nga hae na u vhudza vhaṅwe yeneyo nḓivho? Yehova u ri vhudza uri u a ṱhogomela vhane vha vhudza vhaṅwe nga hae. Nahone u na “bugu ya u mu eletshedza” vhoṱhe “vha ofhaho Yehova, na vha sa hangwi dzina ḽawe.” (Maleaxi 3:16) Dzenedzo pfaneleo ndi dza ndeme khae.
8 Ndi ifhio miṅwe mishumo yavhuḓi ine Yehova a i dzhiela nṱha? Vhukuma ndi vhuḓidini hashu ha u edzisa Murwa wawe, Yesu Kristo. (1 Petro 2:21) Muṅwe mushumo wa ndeme une Yehova a u dzhiela nṱha ndi wa u phaḓaladza mafhungo maḓifha a Muvhuso wawe. Kha Vha-Roma 10:15, ri a vhala: “I tamisa hani milenzhe ya vhahuweleli vha mafhungo-maḓifha a mulalo, ya vhaambi vha mavhuya!” Nga ho ḓoweleaho ri nga si dzhie milenzhe yashu sa i ‘tamisaho,’ kana sa yo nakaho. Fhedzi hafha i imela vhuḓidini vhune vhashumeli vha Yehova vha vhu ita kha u huwelela mafhungo maḓifha. Vhuḓidini hoṱhe ho raloho ndi havhuḓi nahone ndi ha ndeme phanḓa hawe.—Mateo 24:14; 28:19, 20.
9, 10. (a) Ndi ngani ri tshi nga tenda uri Yehova u dzhiela nṱha u konḓelela hashu milingo yo fhamba-fhambanaho? (b) Ndi afhio mavhonele o khakheaho ane Yehova a si vhuye a vha nao nga ha vhashumeli vhawe vha fulufhedzeaho?
9 Yehova u dovha a dzhiela nṱha u konḓelela hashu. (Mateo 24:13) Humbulani uri Sathane u ṱoḓa uri ni ṱutshele Yehova. Ḓuvha ḽiṅwe na ḽiṅwe ḽine ḽa kovhela no fulufhedzea kha Yehova ni vha no thusa u fhindula u nyadza ha Sathane. (Mirero 27:11) Nga zwiṅwe zwifhinga zwi a konḓa u konḓelela. Vhuleme ha mutakalo, mbilaelo dza zwa dzitshelede, mutsiko wa maḓipfele, na zwiṅwe zwithivheli zwi nga ita uri u kovhedza ḓuvha ḽiṅwe na ḽiṅwe zwi vhe mulingo. U lengiswa ha zwithu zwe ra zwi lindela na zwone zwi nga ri nyabwisa. (Mirero 13:12) U konḓelela yeneyo milingo ndi zwa ndeme vhukuma kha Yehova. Ndi ngazwo Khosi Davida o humbela Yehova uri a vhulunge miṱodzi yawe kha “mudzio” wawe, a engedza e na fulufhelo a ri: “Naa a iho buguni yau?” (Psalme ya 56:8, vhambedzani NW.) Ee, Yehova u a dzhiela nṱha na u humbula miṱodzi yashu yoṱhe na u shengela hune ra hu konḓelela musi ri tshi fulufhedzea khae. Ndi ya ndeme vhukuma khae.
Jehovah values our endurance in the face of trials
10 Fhedzi mbilu ine ya ḓivhona mulandu i nga hanedza vhuṱanzi ho raloho ha uri ri vha ndeme phanḓa ha Mudzimu. I nga ḓi hevhedza lunzhi-lunzhi ya ri: ‘Fhedzi hu na vhanzhi vha re tsumbo dzavhuḓi vhukuma u mphira. Yehova u fanela u vha a tshi nyabwa lungafhani musi a tshi mmbambedza navho!’ Yehova ha vhambedzi vhathu; kana u konḓisa kana u vha na vhuhali kha mahumbulele awe. (Vha-Galata 6:4) U pfesesa nga ho dzikaho zwi re mbiluni dzashu, u vhona zwi re zwavhuḓi, naho zwenezwo zwithu zwi zwiṱuku.
Yehova U Khethekanya Zwo Lugaho Na Zwivhi
11. Ri nga guda mini nga ha nḓila ye Yehova a dzudzanya ngayo mafhungo a Abia?
11 Tsha vhuraru, musi Yehova a tshi ri ṱolisisa, u khethekanya nga vhuronwane zwo lugaho kha riṋe. Sa tsumbo, musi Yehova a tshi laedza uri hu vhulahwe muṱa woṱhe wa vhavhusi vha vhagunei wa Khosi Yerobeamu, O laedza uri Abia, muṅwe wa vharwa vha khosi, a vhulungwe zwavhuḓi. Ndi ngani? “Khae’ h[o] vhonala zwine Yehova Mudzimu wa Isiraele a wana zwi zwivhuya.” (1 Dzikhosi 14:1, 10-13) Zwi re zwone ndi uri Yehova o lavhelesa mbilu ya onoyo muṱhannga nahone a wana “zwivhuya” khayo. Hu sa londwi uri zwenezwo zwivhuya zwe zwa vha zwi khayo zwo vha zwi zwiṱuku kana zwi si zwa ndeme, Yehova o vhona zwo fanela uri zwi ṅwalwe Ipfini ḽawe. O ita na u zwi lambedza, a sumbedza tshilidzi tsho teaho kha onoyo muraḓo muthihi wa muṱa wa vhagunei.
12, 13. (a) Mafhungo a Khosi Yosafati a sumbedza hani uri Yehova u sedza zwithu zwavhuḓi kha riṋe naho ri tshi ita tshivhi? (b) Malugana na mishumo na pfaneleo dzashu dzavhuḓi, Yehova u fana hani na Mubebi a re na lufuno?
12 Iṅwe tsumbo i swayeaho vhukuma ndi ya Khosi yavhuḓi Yosafati. Musi yeneyi khosi yo ita nyito dza vhutsilu, muporofita wa Yehova o i vhudza a ri: “Ndi zwone zwe wa sinyuisa Yehova ngazwo’.” Ndi mafhungo a ṱungufhadzaho lungafhani! Fhedzi mulaedza wa Yehova a wo ngo guma henefho. Wo bvela phanḓa u tshi ri: “Hone, hu kha ḓi vha na zwivhuya zwe zwa wanala kha iwe.” (2 Koronika 19:1-3) Ngauralo u sinyuwa ha Yehova a ho ngo ita uri a si vhone zwivhuya kha Yosafati. O fhambana lungafhani na vhathu vha songo fhelelaho! Musi vhaṅwe vha tshi ri sinyusa, ri nga kha ḓi sa vhona zwivhuya zwine vha vha nazwo. Nahone musi ri tshi ita tshivhi, u nyabwa, ṱhoni, na u ḓivhona mulandu zwine ra zwi pfa zwi nga ita uri ri sa vhone zwivhuya kha riṋe vhaṋe. Naho zwo ralo, humbulani uri arali ra rembuluwa zwivhini zwashu nahone ra lwa nga nungo dzoṱhe uri ri sa tsha zwi dovholola, Yehova u ḓo ri hangwela.
13 Musi Yehova a tshi ni ṱolisisa, u bvisa zwenezwo zwivhi, u fana na musefi ane a khou ṱoḓa musuku a tshi bvisa thombwana dzi sa thusi tshithu. Hu pfi mini nga pfaneleo na mishumo yaṋu yavhuḓi? Ee, zwenezwi zwithu ndi “ndalama” dzine a dzi vhulunga! Naa no no vhuya na ṱhogomela nḓila ine vhabebi vha re na lufuno vha dzhiela ngayo nṱha zwifanyiso zwo oliwaho nga vhana vhavho kana miṅwe mishumo ya tshikoloni, na musi ho no fhela tshifhinga tshilapfu vhana vho no hangwa zwenezwo zwithu? Yehova ndi mubebi a re na lufuno luhulwane u fhira vhoṱhe. Arali ra dzula ri tshi fulufhedzea khae, a nga si vhuye a hangwa mishumo na pfaneleo dzashu dzavhuḓi. Zwi re zwone ndi uri u ḓo zwi dzhia zwi si u fulufhedzea arali a hangwa, nahone u dzula a tshi fulufhedzea. (Vha-Heberu 6:10) U dovha a ri ṱolisisa nga iṅwe nḓila.
14, 15. (a) Ndi ngani u sa fhelela hashu hu sa vhuyi ha ita uri Yehova a sa vhone zwivhuya kha riṋe? Fanyisani. (b) Yehova u ḓo ita mini nga pfaneleo dzavhuḓi dzine a dzi wana kha riṋe, nahone u dzhia hani vhathu vhawe vha fulufhedzeaho?
14 Yehova ha sedzi u sa fhelela hashu na zwine ra sa kone u zwi ita fhedzi. Ri tshi tou fanyisa: Vhathu vhane vha funa mishumo ya zwanḓa, vha ita vhuḓidini vhuhulwane u itela u vusulusa tshifanyiso tsho tshinyalaho vhukuma kana miṅwe mishumo. Sa tsumbo, musi muṅwe muthu a tshi thuntsha tshifanyiso tsho oliwaho tsha Leonardo da Vinci tshi ḓuraho rannda dza milioni dza zwigidi zwa 340, tshe tsha vha tshi National Gallery ngei London, England, a hu na we a amba uri samusi tshenetsho tshifanyiso tsho no pwashea, tshi fanela u laṱiwa. Mushumo wa u vusulusa tshenetsho tshifanyiso tsha vhutsila tshi re na miṅwaha i ṱoḓaho u vha 500 wo mbo ḓi thomiwa na zwenezwo. Ndi ngani? Nga ṅwambo wa uri tsho vha tshi tsha ndeme kha vhafuni vha mishumo yo itwaho nga zwanḓa. Naa a ni wa ndeme u fhira tshifanyiso tsho olwaho nga tshoko na penisela? Ni wa ndeme vhukuma phanḓa ha Yehova—naho ni tshi nga vha no tshinyiwa nga u sa fhelela he na hu mamela. (Psalme ya 72:12-14) Yehova Mudzimu, Musiki wa vhathu a re na vhutsila, u ḓo ita zwine zwa ṱoḓea u itela uri vhoṱhe vhane vha ṱanganedza ṱhogomelo yawe ya lufuno vha fhelele.—Mishumo 3:21; Vha-Roma 8:20-22.
15 Ee, Yehova u a vhona zwivhuya kha riṋe zwine riṋe vhane ra sa zwi vhone. Nahone musi ri tshi mu shumela, u ḓo ita uri zwivhuya zwi vhe zwinzhi u swika mafheleloni ri tshi fhelela. Hu sa londwi nḓila ine shango ḽa Sathane ḽa ri fara ngayo, Yehova u a dzhiela nṱha vhashumeli vhawe vha fulufhedzeaho, u vha dzhia sa madzanga.—Hagai 2:7.
Yehova U Sumbedza Lufuno Lwawe
16. Ndi vhufhio vhuṱanzi vhuhulwanesa ha uri Yehova u a ri funa, nahone ri zwi ḓivha hani uri tshenetshi tshifhiwa tsho itelwa riṋe nga ho livhaho?
16 Tsha vhuṋa, Yehova o ita zwithu zwinzhi u sumbedza uri u a ri funa. Vhukuma, tshiṱhavhelo tshi rengululaho tsha Kristo ndi phindulo ya maanḓa vhukuma kha mazwifhi a Sathane a uri a ri vha ndeme nahone a ri funiwi. Ri songo vhuya ra hangwa uri nḓila i vhavhaho ye Yesu a fa na u shengela ngayo kha danda ḽa tshengedzo na vhuṱungu vhuhulwane he Yehova a vhu konḓelela musi o sedza Murwa wawe ane a mu funa a tshi fa, ndi vhuṱanzi ha uri u a ri funa. Zwi ṱungufhadzaho ndi uri vhathu vhanzhi vha wana zwi tshi konḓa u tenda uri tshenetshi tshifhiwa tsho ṋewa vhone nga ho livhaho. Vha ḓipfa vha si vha ndeme. Naho zwo ralo, humbulani uri u thomani muapostola Paulo o vha e mutovholi wa vhatevheli vha Kristo. Fhedzi o ṅwala a ri: ‘Murwa wa Mudzimu o mpfuna a ḓi-ṋekedza a tshi itela nṋe.’—Vha-Galata 1:13; 2:20, maḽeḓeretsendama ndi ashu.
17. Yehova u shumisa mini u itela u ri kokodzela khae na kha Murwa wawe?
17 Yehova u sumbedza uri u a ri funa nga u ri thusa nga muthihi nga muthihi uri ri vhuyelwe nga zwivhuya zwa tshiṱhavhelo tsha Kristo. Yesu o ri: “Haho’ a konaho u ḓa ha nṋe, arali Khotsi o nthumaho á sa mu kokodzi; huno ndi nṋe ane nda ḓo mu vusa nga ḓuvha ḽa vhufhelo.” (Yohane 6:44) Ee, Yehova u ri kokodzela kha Murwa wawe na kha fulufhelo ḽa vhutshilo vhu sa fheli. Hani? Nga mushumo wa u huwelela muvhuso, une wa kwama muthu muṅwe na muṅwe, na nga muya wawe mukhethwa, une Yehova a u shumisa u itela uri ri pfesese na u shumisa mafhungo-ngoho a muya hu sa londwi vhushayanungo na u sa fhelela hashu. Nga zwenezwo, Yehova a nga ri vhudza zwe a zwi vhudza Vhaisiraele vha kale: “Ndo U funa nga lufuno lwa lini na lini; ndi zwone zwe nda itela zwone ndi tshi fareledza tshilidzi tshanga kha iwe.”—Yeremia 31:3.
18, 19. (a) Ndi ifhio nḓila khulwanesa ine Yehova a sumbedza ngayo uri u a ri funa, nahone ndi mini zwine zwa sumbedza uri u a ri ṱhogomela nga muthihi nga muthihi? (b) Ipfi ḽa Mudzimu ḽi sumbedza hani uri Yehova ndi muthetshelesi a pfelaho vhuṱungu?
18 Khamusi thabelo ndi iṅwe nḓila ine ra kona u vhona ngayo uri Yehova u a ri funa. Bivhili i ri ramba uri ri “so ngo litshedza u rabela” Mudzimu. (1 Vha-Thesalonika 5:17) U a thetshelesa. U vhidzwa: “Mupfi wa dzithabelo.” (Psalme ya 65:2) Honovhu vhuimo ho ngo vhu ṋea muṅwe muthu, naho hu Murwa wawe. Edzani u humbula: Musiki wa fhethu hoṱhe u ri ṱuṱuwedza uri ri ambe nae nga thabelo, ro vhofholowa. Ndi muthetshelesi wa mufuda-ḓe? A si na maḓipfele, a sa pfeli vhuṱungu, na a sa londi? A zwo ngo ralo na kathihi.
19 Yehova u a pfela vhuṱungu. U pfela vhuṱungu zwi amba mini? Muṅwe mukegulu a fulufhedzeaho wa Mukriste o ri: “U pfela vhuṱungu ndi u pfa vhuṱungu haṋu mbiluni yanga.” Naa vhukuma Yehova u a pfa vhuṱungu hashu? Ri vhala zwi tevhelaho nga ha u shengela ha vhathu vhawe vha Isiraele: “Hoṱhe he vha vhaisala, o pfa a tshi vhaisala-vho.” (Yesaya 63:9) Yehova ho ngo sokou vhona maṱungu avho; o vha pfela vhuṱungu. Nḓila khulwane ine Yehova a ḓipfa ngayo yo fanyiswa nga maipfi awe e a a vhudza vhashumeli vhawe: ‘A vhaisaho vho-inwi u a nkombodza.’ b (Sakaria 2:12) Zwenezwo zwi a vhavha vhukuma! Ee, u a ri pfela vhuṱungu. Musi ri tshi pfa u vhavha, na ene u a vhaisala.
20. Ndi afhio mahumbulele o khakheaho ane ra fanela u a iledza arali ri tshi ṱoḓa u thetshelesa nyeletshedzo i wanalaho kha Vha-Roma 12:3?
20 A hu na Mukriste a linganyiselaho ane a nga shumisa honoho vhuṱanzi ha uri Yehova u funa vhashumeli vhawe nahone u a vha londa, u itela u ḓikukumusa kana u ḓidzhia e wa vhuimo ha nṱha. Muapostola Paulo o ṅwala: “Zwino ndi a ni laya, vhunga ndó ṋewa nga tshilidzi tsha Mudzimu uri ndí ralo, ndi ri: Hu songo vha na muthihi kha inwi ané a kalula u ḓi-fhima. U ḓi-fhima muthu nga a ite u pima, a tshi tevhedza muelo we Mudzimu a mu elela ngawo’ lutendo.” (Vha-Roma 12:3) Iṅwe ṱhalutshedzelo i ri: “Ndi vhudza muṅwe na muṅwe wa vhoiwe uri a songo ḓivhea vhuimoni vhune a si vhe khao, fhedzi kha a ḓivhee vhuimoni ho fanelaho.” (A Translation in the Language of the People, nga Charles B. Williams) Nga zwenezwo naho ri tshi khou ḓiphina nga lufuno lwa Khotsi ashu wa ṱaḓulu, kha ri vhe na mihumbulo yo tshaho nahone ri humbule uri a ro ngo tewa nga lufuno lwa Mudzimu.
21. Ndi afhio mazwifhi a Sathane ane ra fanela u bvela phanḓa ri tshi a hanedza, nahone ndi afhio mafhungo-ngoho ane ra nga bvela phanḓa ri tshi khwaṱhisa ngao mbilu dzashu?
21 Roṱhe kha ri ite zwi re maanḓani ashu u itela u hanedza mazwifhi oṱhe a Sathane, u katela na mazwifhi a u ri a ri vha ndeme kana a ri funiwi. Arali zwithu zwe na ṱangana nazwo vhutshiloni zwo ni ita uri ni ḓivhone ni na vhuleme vhuhulwane lune na vhona ni sa fanelwi nga lufuno luhulwane lwa Mudzimu, kana na vhona mishumo yaṋu yavhuḓi i si tshithu lune ya nga vhonwa nga maṱo awe ane a vhona zwoṱhe, kana zwivhi zwaṋu zwi zwinzhi lune zwa sa kone u hangwelwa nga lufu lwa Murwa wawe o khetheaho, no funzwa mazwifhi madala-dala. Hanedzani eneo mazwifhi nga mbilu yaṋu yoṱhe! Kha ri bvele phanḓa ri tshi khwaṱhisa mbilu dzashu nga mafhungo-ngoho o ṅwalwaho kha mafhungo a Paulo o hevhedzwaho: “Ngauri ndo fulufhela zwauri: lufu na vhutshilo, vharuṅwa na mivhuso, zwa zwino na zwi ḓaho, na maanḓa, Na vhulapfu, na vhudzivha, na tshiṅwe tshivhumbwa-vho, zwi nga si kone u ri fhandakanya na lufuno lwa Mudzimu, lu re kha Kristo Yesu, Murena washu.”—Vha-Roma 8:38, 39.
a Bivhili i ṱumanya lunzhi-lunzhi fulufhelo ḽa mvuwo na vhukoni ha Yehova ha u humbula. Yobo munna a fulufhedzeaho o amba na Yehova uri: “Ngavhe wa tou . . . mbetshela ḓuvha ḽine wa ḓo nkhumbula ngaḽo.” (Yobo 14:13, maḽeḓeretsendama ndi ashu.) Yesu o amba nga mvuwo ya “vhoṱhe vha re zwaloni [“zwa khumbudzo,” NW].” Zwo vha zwo tea zwenezwi nga ṅwambo wa uri Yehova u humbula zwavhuḓi vhafu vhane a ṱoḓa u vha vusa.—Yohane 5:28, 29.
b Dziṅwe ṱhalutshedzelo hafha dzi sokou ri ane a kwama vhathu vha Mudzimu u khou kombodza iṱo ḽawe kana u khou kombodza iṱo ḽa Vhaisiraele, hu si ḽa Mudzimu. Honovhu vhukhakhi ho itwa nga vhamaṅwalo vhe vha vhona uri enea mafhungo ha pfali nahone vha a shandula. Vhuḓidini havho ho khakheaho ho ita uri vha sa kone u vhona nḓila khulwane ine Yehova a pfela ngayo vhuṱungu.
