“Iwe Mupfi wa thabelo, vhathu vha mifuda yoṱhe vha ḓo ḓa kha iwe.”—Phisalema 65:2.

Vhaṅwe vhathu vha ri u rabela zwi ita uri vha pfe vhe khwine, naho vha tshi ri a hu na muthu o thetshelesaho. Fhedzi u rabela a zwi sokou vha tshithu tshine ra tshi ita uri ri pfe ri khwine u itela uri ri kone u sedzana na thaidzo dzashu. Bivhili i ri: “Yehova * u tsini na vhoṱhe vhane vha mu vhidzelela, vhoṱhe vhane vha mu vhidza nga ngoho. . . . U pfa tshililo tshavho tsha u ṱoḓa thuso, a vha tshidza.”—Phisalema 145:18, 19.

Nga zwenezwo, ri nga vha na vhuṱanzi ha uri Yehova u a thetshelesa thabelo dza vhane vha mu gwadamela. Nga nṱhani ha uri Mudzimu u a ri funa, u ri: “Ndi hone ni tshi ḓo mmbidzelela na ḓa na nthabela, ndi ḓo ni thetshelesa.”—Yeremia 29:12.

“Ni dzule ni tshi rabela.”—Vharoma 12:12.

Bivhili i ri ṱuṱuwedza uri ri ‘bvele phanḓa ri tshi rabela’ na uri ‘ri dzule ri tshi rabela tshifhinga tshoṱhe.’ Zwi tou pfala uri Yehova Mudzimu u ṱoḓa ri tshi amba nae nga thabelo.—Mateo 26:41; Vhaefesa 6:18.

Ndi ngani Mudzimu a tshi ṱoḓa ri tshi amba nae nga thabelo? Khotsi u a takala musi ṅwana wawe a tshi mu humbela thuso. Zwi nga itea uri onoyo khotsi u vha a tshi vho ḓivha zwine ṅwana wawe a zwi ṱoḓa kana nḓila ine a ḓipfa ngayo. Fhedzi musi a tshi pfa onoyo ṅwana a tshi mu humbela thuso, u a zwi vhona uri u a mu fhulufhela na uri u na vhushaka havhuḓi nae. Nga nḓila i fanaho, musi ri tshi rabela Yehova Mudzimu, ri vha ri tshi khou sumbedza uri ri a mu fhulufhela nahone ri ṱoḓa u sendela tsini nae.—Mirero 15:8; Yakobo 4:8.

“Ni mu kumedzele mbilaelo dzaṋu dzoṱhe, ngauri u na ndavha na inwi.”—1 Petro 5:7.

Mudzimu u ṱoḓa ri tshi amba nae nga thabelo ngauri u a ri funa nahone u na ndavha na riṋe. U a ḓivha thaidzo dzashu na zwine zwa ri vhilaedzisa nahone u ṱoḓa u ri thusa.

Vhutshiloni hawe hoṱhe, Khosi Davida o vha a tshi amba na Yehova Mudzimu nga thabelo. O vha a tshi mu humbela thuso, a tshi mu vhudza zwine a zwi humbula na nḓila ine a ḓipfa ngayo. (Phisalema 23:1-6) Zwenezwo zwo ita uri Mudzimu a ḓipfe hani nga Davida? Mudzimu o vha a tshi funa Davida nahone o thetshelesa thabelo dzawe. (Mishumo 13:22) Na riṋe Mudzimu u a thetshelesa thabelo dzashu ngauri u na ndavha na riṋe.

Muṅwe muṅwali wa iṅwe phisalema i re Bivhilini o ri: “Ndi funa Yehova ngauri u pfa ipfi ḽanga.” O vha a tshi zwi ḓivha uri Mudzimu u a pfa thabelo dzawe nahone zwenezwo zwo mu thusa. O pfa e tsini na Mudzimu nahone a wana nungo dza u sedzana na thaidzo na maṱungu awe.—Phisalema 116:1-9.

Musi ri na vhungoho ha uri Mudzimu u a pfa thabelo dzashu, ri ḓo bvela phanḓa ri tshi mu rabela. Kha ri ambe nga ha zwe zwa itea kha Pedro ane a dzula devhula ha Spain. O lovhelwa nga ṅwana wawe wa muṱhannga wa miṅwaha ya 19 kha khombo ya goloi. Musi Pedro o ṱungufhala nga u ralo, o vhudza Mudzimu nḓila ine a ḓipfa ngayo nahone a rabela lunzhi-lunzhi uri a mu khuthadze na u mu tikedza. Ha itea mini? Pedro u ri: “Yehova o fhindula thabelo dzanga a tshi shumisa Vhakriste nga riṋe vhe vha tikedza nṋe na mufumakadzi wanga na u ri khuthadza.”

Naho ṅwana wa Pedro a songo vuwa vhafuni, u rabela zwo mu thusa na muṱa wawe. Mufumakadzi wawe María Carmen u ri: “U rabela zwo nthusa u konḓelela. Ndo vha ndi tshi zwi ḓivha uri Yehova Mudzimu u a mpfesesa ngauri musi ndi tshi amba nae nga thabelo ndo vha ndi tshi pfa ndi na mulalo nahone ndo dzika.”

Zwine Bivhili ya amba na zwe zwa itea kha vhaṅwe vhathu zwi sumbedza uri Mudzimu u a pfa dzithabelo. Naho zwo ralo, zwi khagala uri Mudzimu ha fhinduli thabelo dzoṱhe-dzoṱhe. Ndi ngani Mudzimu a tshi fhindula dziṅwe thabelo ngeno dziṅwe a sa dzi fhinduli?