LUZIA U TSHIMBILA NGAU ṰUDZA. Musi a tshee muṱuku, o farwa nga vhulwadze ha poliomyelitis, vhune ha kwama zwiṅwe zwipiḓa zwa muvhili (nervous system) nahone vhu a fhirela. Musi e na miṅwaha ya 16, mutholi wawe o mu vhudza uri, “Mudzimu u khou ni ṱarafa nga nṱhani ha uri no vha ni sa thetshelesi nahone ni tshi remisa mme aṋu ṱhoho.” Naho ho no fhela miṅwaha minzhi, Luzia u kha ḓi humbula nḓila ye a vha o tsikeledzea ngayo.

MUSI DAMARIS A TSHI WANULUSA URI U NA KHENTSARA YA VHULUVHI, khotsi awe vho mu vhudzisa uri: “No ita mini uri zwenezwo zwithu zwi itea kha inwi? Hu fanela u vha hu na vhukhakhi vhuhulwane he na vhu ita. Ndi ngazwo Mudzimu a tshi khou ni ṱarafa.” Zwenezwo zwo ita uri Damaris a tsikeledzee.

Lwa miṅwaha minzhi, vhathu vho vha vha tshi tenda uri musi muthu a tshi lwala, u vha a tshi khou ṱarafiwa nga Mudzimu. Bugu ine ya ri Manners and Customs of Bible Lands i amba uri vhathu vhanzhi vha tshifhingani tsha Yesu vho vha vha tshi tenda uri “muthu o vha a tshi lwala nga nṱhani ha tshivhi tshe ene muṋe a ita kana tsha mashaka awe nahone u lwala hawe ho vha hu nḓila ine a vha a tshi khou ṱarafelwa tshivhi.” Bugu ya Medieval Medicine and the Plague yo amba uri kale-kale, “vhaṅwe vhathu vho vha vha tshi tenda uri Mudzimu ndi ene we a ita uri hu vhe na maṱhupho u itela u ṱarafa vhathu kha zwivhi zwe vha zwi ita.” Musi vhathu vhanzhi vha tshi lovha ngei Yuropa ḓanani ḽa vhu-14 ḽa miṅwaha, naa Mudzimu o vha a tshi khou haṱula vhathu vhavhi? Kana naa eneo maṱhupho o vha a tshi khou vhangwa nga tshitzhili, samusi vhaṱoḓisisi vha zwa ngalafho vho zwi amba? Vhaṅwe vha nga kha ḓi ḓivhudzisa uri, naa Mudzimu u shumisa vhulwadze u itela u ṱarafa vhathu nga nṱhani ha zwivhi zwavho? *

ṰHOGOMELANI HEZWI: Ndi ngani Yesu o fhodza vhathu vha si na mutakalo wavhuḓi na vhe vha vha vha tshi khou shengela arali zwenezwo zwithu ho vha hu nḓila ine Mudzimu a khou vha ṱarafa ngayo? Naa zwenezwo ho vha hu sa ḓovha hu u nyadza nḓila ine Mudzimu a haṱula ngayo? (Mateo 4:23, 24) Yesu o vha a nga si vhuye a lwisana na zwine Mudzimu a zwi ita. O ri: “Ndi dzula ndi tshi ita zwi mu takadzaho” nahone “ndi khou ita zwe Khotsi a nndaedza uri ndi zwi ite.”—Yohane 8:29; 14:31.

Bivhili a i dzumbi mafhungo. Bivhili i amba uri Yehova Mudzimu “dzinḓila dzawe dzoṱhe dzo luga.” (Doiteronomio 32:4) Sa tsumbo, Mudzimu a nga si ite uri hu vhe na khombo ya bufho ine ya ḓo vhulaya vhathu vhanzhi vha si na mulandu nga nṱhani ha uri a tshi khou ṱoḓa u ṱarafa muthu muthihi henefho! Abrahamu we a vha e mushumeli wa Mudzimu a fulufhedzeaho o amba uri Mudzimu o luga nahone a nga si “[lozwe] vhavhuya huthihi na vhavhi.” O amba uri zwenezwo zwithu “zwi kule na [ye].” (Genesi 18:23, 25) Bivhili i dovha ya ri “Mudzimu ha tshinyi” nahone “ha khakhi.”—Yobo 34:10-12.

A ri shengeli nga nṱhani ha uri Mudzimu u khou ri ṱarafela zwivhi zwashu. Yesu o zwi sumbedza zwenezwo musi ene na vhafunziwa vhawe vha tshi vhona munna we a bebwa e bofu. Bivhili i ri: “Vhafunziwa vhawe vha mu vhudzisa vha ri: ‘Rabi, uyu munna a tshi bebwa o pofula ho tshinya nnyi, ndi ene kana ndi vhabebi vhawe?’ Yesu a fhindula a ri:  ‘A si hoyu munna o tshinyaho kana vhabebi vhawe, fhedzi zwo vha nga u ralo uri hu vhonale mishumo ya Mudzimu kha ene.’”—Yohane 9:1-3.

Nga nṱhani ha ku humbulele ko khakheaho kwe vhafunziwa vha Yesu vha vha vhe na kwo, vha nga vha vho vha vho mangala musi Yesu a tshi vha vhudza uri makhaulambilu e onoyo munna a vha a khou sedzana nao o vha a sa khou vhangiwa nga tshivhi tshe a tshi ita kana tshe tsha itwa nga vhabebi vhawe. Yesu ho ngo sokou fhodza onoyo munna fhedzi, fhedzi u mu fhodza hawe zwo vha zwi tshi khou sumbedza uri musi vhathu vha tshi shengela a vha vhi vha tshi khou ṱarafiwa nga Mudzimu. (Yohane 9:6, 7) Vhathu vhane vha vha na thaidzo dza mutakalo ṋamusi vha nga khuthadzea nga u ḓivha uri a si Mudzimu ane a vhanga zwenezwo zwithu.

Bivhili i ri khwaṱhisedza uri

• “Ngauri Mudzimu ha lingwi nga vhuvhi na ene muṋe ha lingi muthu.” (YAKOBO 1:13) Ndi ngoho uri “vhuvhi” vhune ndi kale vhu tshi khou dina vhathu lwa miṅwaha minzhi, vhu katela malwadze, vhuṱungu na lufu nahone hu si kale zwi ḓo fheliswa.

• Yesu Kristo o “fhodza vhoṱhe vha lwalaho.” (MATEO 8:16) Musi Yesu a tshi fhodza vhathu vhe vha vha tshi ḓa khae, o vha a tshi khou sumbedza zwine Muvhuso wa Mudzimu wa ḓo zwi ita shangoni ḽoṱhe.

• “[Mudzimu] u ḓo phumula miṱodzi yoṱhe maṱoni avho, lufu a lu tsha ḓo vha hone, na u ṱungufhala na u lila na vhuṱungu a zwi tsha ḓo vha hone. Zwithu zwa kale zwo fhira.”—NZUMBULULO 21:3-5.

Ndi ngani hu na vhuṱungu na tshengelo? Vhathu vhanzhi vho no ḓivhudzisa mbudziso yo raloho lwa miṅwaha minzhi. Arali ri songo fanela u vhona Mudzimu mulandu, ndi nnyi ane ra fanela u mu vhona mulandu? Phindulo dza dzenedzi mbudziso dzi ḓo haseledzwa kha thero i tevhelaho.