Mudzimu o fhulufhedzisa muporofita Abrahamu uri muṅwe wa vhana vhawe u ḓo ita uri ‘tshaka dzoṱhe dza shangoni dzi fhaṱutshedzwe.’ (Genesi 22:18) Onoyo ṅwana o vha a tshi ḓo vha nnyi?

Miṅwahani i ṱoḓaho u vha 2 000 yo fhiraho, Mudzimu o ṋea Yesu ṅwana wa Abrahamu maanḓa a u ita vhuṱolo. Honoho vhuṱolo ho sumbedza uri Yesu o vha e ene ṅwana we ha vha ho dzula ho ambiwa nga hae.—Vhagalata 3:14.

Vhuṱolo he Yesu a vhu ita ho thusa vhathu uri vha kone u vhona uri Yesu ndi ene we Mudzimu a mu ruma uri a ḓe a tshidze vhathu. Ho dovha ha sumbedza nḓila ine Mudzimu a ḓo shumisa ngayo Yesu u itela u fhaṱutshedza vhathu u ya nga hu sa fheli. Kha ri ambe nga ha uri Yesu o vha e muthu wa hani, zwenezwo ri ḓo zwi vhona kha vhuṱolo he a vhu ita.

Lufuno—Yesu o fhodza vha lwalaho.

Muṅwe munna we a vha e na mapele o humbela Yesu uri a mu fhodze. Yesu o mu fara a ri: “Ndi a funa.” Eneo mapele o mbo ḓi fhola nga u ṱavhanya.—Marko 1:40-42.

Mafunda—Yesu o fha vhathu vhe vha vha vhe na nḓala zwiḽiwa.

Yesu o vha a sa ṱoḓi vhathu vha tshi vha na nḓala. O ita vhuṱolo a ṅwatekanya vhurotho na khovhe dzi si gathi a fha vhathu vha zwigidi zwiḽiwa. Zwenezwo ho ngo zwi ita luthihi fhedzi. (Mateo 14:17-21; 15:32-38) Vhathu vhoṱhe vho ḽa vha fura ha dovha ha sala na matshakatshaka.

U pfela vhuṱungu—Yesu o vusa vhafu.

Yesu o vusa ṅwana muthihi fhedzi wa tshilikadzi vhafuni ngauri o vha a tshi khou mu “pfela vhuṱungu.” Yeneyi tshilikadzi yo vha i si na muṅwe ane a nga i ṱhogomela.—Luka 7:12-15.