Vhathu vha dzimilioni shangoni ḽoṱhe vha tenda uri sialala ḽa Khirisimusi ndi u pembelela u bebwa ha Yesu Kristo. Naho zwo ralo, naa no no vhuya na ḓivhudzisa arali Vhakriste vha ḓanani ḽa u thoma ḽa miṅwaha, vhe vha vha vhe na vhushaka na Yesu vho vha vha tshi pembelela Khirisimusi? Naa ni a ḓivha zwine Bivhili ya amba zwone nga ha ḓuvha ḽa mabebo? U wana phindulo dza dzenedzi mbudziso zwi nga ri thusa u ḓivha arali Khirisimusi i ya Vhakriste.

Tsha u thoma, Bivhili a i ambi nga ha u pembelelwa ha mabebo a Yesu kana a vhaṅwe vhagwadameli vha Mudzimu vha fulufhedzeaho. Fhedzi i amba nga ha vhathu vhavhili vhe vha pembelela maḓuvha avho a mabebo. Vhuvhili havho vho vha vhe si vhagwadameli vha Yehova Mudzimu nahone musi vha tshi khou pembelela ḓuvha ḽavho ḽa mabebo hu na zwithu zwivhi zwe zwa itea. (Genesi 40:20; Marko 6:21) U ya nga bugu Encyclopædia Britannica, Vhakriste vha u thoma vho vha vha tshi hanedzana na “mukhuvha wa vhuhedeni wa u pembelela ḓuvha ḽa mabebo.”

Bivhili a i ambi nga ho livhaho ḓuvha ḽe Yesu a bebwa ngaḽo. Bugu McClintock and Strong’s Cyclopedia i ri: “Ḓuvha ḽe Kristo a bebwa ngaḽo a ḽi ho kha Thestamennde ntswa kana kha dziṅwe bugu.” Ngoho ndi ya uri, arali Yesu o vha a tshi ṱoḓa vhatevheli vhawe vha tshi pembelela ḓuvha ḽawe ḽa mabebo, o vha a tshi ḓo ita vhungoho ha uri u a vha vhudza ḓuvha ḽe a bebwa ngaḽo.

Tsha vhuvhili, Bivhili a yo ngo ṅwala uri Yesu kana muṅwe wa vhafunziwa vhawe vho vha vha tshi pembelela Khirisimusi. New Catholic Encyclopedia i amba uri u pembelela Khirisimusi zwo thoma u ambiwa nga Philocalus we a vha e Chronograph, kha bugu yawe ya ngei Roma ye ya vha i tshi bva ṅwaha muṅwe na muṅwe yo ṅwalwaho datumu ya 336 [C.E.]. Zwenezwo zwithu zwo bva musi Bivhili yo no fhela na musi ho no fhela miṅwaha ya maḓana Yesu a si tsha tshila kha ḽifhasi. Nga zwenezwo, bugu McClintock and Strong yo amba uri “u pembelela Khirisimusi a si zwithu zwine zwa bva kha Mudzimu nahone a zwi ho kha Thestamennde Ntswa ya mathomoni.” *

Yesu sa Mufunzi Muhulwane, o ri ṋea ndaela i pfalaho ya zwine a ṱoḓa vhatevheli vhawe vha tshi zwi ita nahone zwenezwo zwithu zwo ṅwalwa Bivhilini. Naho zwo ralo, u pembelela Khirisimusi a si tshipiḓa tshazwo. Samusi mudededzi wa tshikolo a sa ṱoḓi vhagudiswa vhawe vha tshi pfuka mukano wa zwe a vha funza zwone, na Yesu ha ṱoḓi vhafunziwa vhawe vha tshi “pfuka mukano wa zwithu zwo ṅwalwaho” Bivhilini.—1 Vhakorinta 4:6.

Kha ḽiṅwe sia, hu na tshiṅwe tshiitea tsha ndeme tshe Vhakriste vha u thoma vha vha vho ḓowela u tshi ita—Tshihumbudzo tsha lufu lwa Yesu. Yesu o vhudza vhafunziwa vhawe uri vha humbule tshenetshi tshiitea nahone o vha sumbedza nḓila ya u tshi ita. Yeneyi ndaela yo livhaho na ḓuvha ḽine vha fanela u zwi ita ngaḽo, zwo ṅwalwa Bivhilini.—Luka 22:19; 1 Vhakorinta 11:25.

Samusi ro zwi vhona, Khirisimusi ndi u pembelela ḓuvha ḽa mabebo nahone Vhakriste vha u thoma a vho ngo tevhelela yeneyo mikhuvha ya vhuhedeni. Zwiṅwe hafhu, Bivhili a i ambi uri Yesu kana muṅwe muthu o vha a tshi pembelela Khirisimusi. Vhakriste vha dzimilioni shangoni ḽoṱhe vho phetha nga ḽa uri a vha nga pembeleli Khirisimusi.