Yeneyo ndi nḓila ye muṅwe ṅwananyana a re na miṅwaha ya 13 a ḓipfa ngayo musi a tshi ṋewa tshibwanana sa tshifhiwa. Muṅwe mufumakadzi ane a vha ramabindu o bvelelaho o amba uri khomphyutha ye a ṋewa nga khotsi awe musi a tshi kha ḓi vha tshikoloni, yo vha i tshifhiwa tshe tsha shandula vhutshilo hawe. Nahone munna ane a kha ḓi tou bva u vhinga o amba uri garaṱa ya u pembelela ṅwaha wavho wa u thoma vhe mbinganoni ye ya itwa nga mufumakadzi wawe, yo vha i tshifhiwa tshavhuḓisa tshe a vhuya a ṋewa.

Ṅwaha muṅwe na muṅwe, vhathu vhanzhi vha fhedza tshifhinga na nungo dzavho vha tshi khou ṱoḓa tshifhiwa tshavhuḓisa tshine vha nga tshi ṋea khonani kana shaka musi hu na tshiitea tsho khetheaho. Nahone vhanzhi vha nga takalela u pfa phindulo i fanaho na yo bulwaho mathomoni. Hu pfi mini nga inwi? Naa ni nga takalela u ṋea kana u ṋewa zwifhiwa zwine zwa dzhielwa nṱha vhukuma?

Zwenezwo zwi nga vha zwi tshi takadza vhukuma, hu si fhedzi nga nṱhani ha nḓila ine tshifhiwa tsha kwama ngayo muthu ane a khou ṋewa tshone, fhedzi na nga nḓila ine tsha kwama ngayo muṋei watsho. Bivhili i ri: “U ṋea zwi ḓisa dakalo ḽihulu u fhira u ṋewa.” (Mishumo 20:35) Vhukuma, dakalo ḽine ḽa ḓiswa nga u ṋea ḽi nga engedzea arali muthu ane a khou ṱanganedza tshifhiwa a tshi tshi dzhia tshi tsha ndeme.

Nga zwenezwo, ni nga ita hani uri u ṋea haṋu tshifhiwa zwi ḓisele dakalo inwi na muthu ane na khou mu ṋea tshone? Nahone arali zwi sa konadzei u ṋea tshifhiwa tshavhuḓisa, ni nga ita mini uri tshifhiwa tshaṋu tshi vhe tsha ndeme?