Bivhili i ri: “Tshifhiwa tshiṅwe na tshiṅwe tshavhuḓi na tsho fhelelaho tshi bva ṱaḓulu, tshi tsa tshi tshi bva ha Khotsi wa tshedza tsha ṱaḓulu.” (Yakobo 1:17) Vhukuma, lwonolu luṅwalo lu sumbedza uri Khotsi ashu wa ṱaḓulu ane a vha Yehova Mudzimu u na mafunda. Fhedzi kha zwifhiwa zwinzhi zwe Mudzimu a zwi ṋea vhathu, hu na tshifhiwa tshihulwanesa u fhira zwoṱhe. Ndi tshifhio? Maipfi a Yesu a ḓivheaho vhukuma o ṅwalwaho kha Yohane 3:16, a ri: “Mudzimu o funa shango zwihuluhulu a vhuya a kumedza Murwa wawe mubebwa e eṱhe, uri muṅwe na muṅwe ane a vha na lutendo khae a si fheliswe, fhedzi a wane vhutshilo vhu sa fheli.”

Mudzimu o ri ṋea tshifhiwa tshine tsha vha Murwa wawe mubebwa e eṱhe—tshenetsho ndi tshifhiwa tshihulwanesa tshe ra tshi wana ngauri tshi ita uri ri vhofhololwe kha tshivhi, vhulala na u fa. (Psalme ya 51:5; Yohane 8:34) Naho ra nga ita zwoṱhe zwine ra nga kona, ri nga si kone u ḓivhofholola kha honoho vhupuli nga riṋe vhaṋe. Naho zwo ralo, nga nṱhani ha uri Mudzimu u a ri funa, o ita uri ri kone u vhofhololwa. Yehova Mudzimu o ṋekedza Murwa wawe mubebwa e eṱhe ane a vha Yesu Kristo sa tshirengululi u itela uri vhathu vhane vha mu thetshelesa vha vhe na tshilavhelelwa tsha u tshila tshoṱhe. Fhedzi tshenetsho tshirengululi ndi mini? Ndi ngani tshi tshi ṱoḓea? Nahone ri nga vhuyelwa hani ngatsho?

Tshirengululi ndi tshithu tshine tsha rengulula tshithu tsho xelaho kana u tshi vhofholola vhupulini. Bivhili i ri vhudza uri vhabebi vhashu vha u thoma Adamu na Eva vho sikwa vhe si na tshivhi, vhe na tshilavhelelwa tsha u tshila tshoṱhe paradisoni i re kha ḽifhasi na vhana vhe vha vha vha tshi ḓo vha navho. (Genesi 1:26-28) Zwi ṱungufhadzaho ndi uri vho xelelwa nga zwithu zwoṱhe ngauri a vho ngo thetshelesa Mudzimu nahone vho vha vhaitazwivhi. Ho vha na mvelelo dzifhio? Bivhili i ri: “Tshivhi tsho dzhena shangoni nga muthu muthihi nahone tshivhi tsha ḓisa lufu, lufu lwa ṱanganya vhathu vhoṱhe, ngauri vhoṱhe vho tshinya.” (Vharoma 5:12) Nṱhani ha uri Adamu a ṋee vhana vhawe ifa ḽa vhutshilo vhu sa fheli, o ita uri vha mamele tshivhi nahone masiandoitwa atsho ndi u fa.

U ya nga tshirengululi, zwe zwa lifhiwa zwi fanela u lingana na zwe zwa xela. Musi Adamu o khetha u sa thetshelesa Mudzimu nga khole, o ita tshivhi nahone masiandoitwa atsho ho vha u xelelwa nga vhutshilo vhu sa fheli. Bivhili i amba uri zwenezwo zwithu zwo ita uri vhana vha Adamu vha vhe na tshivhi nahone vha fe. Zwenezwo zwo ita uri hu ṱoḓee vhutshilo ha muthu o fhelelaho—vhutshilo ha Yesu—uri vhu ṋekedzwe sa tshiṱhavhelo u itela u ri vhofholola kha honoho vhupuli. (Vharoma 5:19; Vhaefesa 1:7) Zwenezwi zwi a konadzea ngauri Mudzimu o rengulula vhathu uri vha vhe na tshilavhelelwa tsha u tshila tshoṱhe paradisoni kha ḽifhasi, zwe Adamu na Eva vha xelelwa ngazwo.—Nzumbululo 21:3-5.

Kha zwe tshenetsho tshirengululi tsha zwi khunyeledza, a zwi timatimisi uri tshifhiwa tsha tshirengululi tshine tsha ita uri zwi konadzee u wana vhutshilo vhu sa fheli, ndi tshifhiwa tshihulwanesa tshi fhiraho zwoṱhe. U itela u dzhiela nṱha nḓila ine tshifhiwa tsha vha tsha ndeme ngayo, kha ri vhone nḓila dzine dza ḓo ri thusa u ita uri tshifhiwa tshine ra tshi ṋea tshi vhe tsha ndeme samusi zwo haseledzwa kha thero yo fhiraho.

U fusha lutamo lwashu. Nga lwa nzulele, vhathu vho sikwa vhe na lutamo lwa u tshila tshoṱhe. (Muhuweleli 3: 11) Naho ri nga si kone u fusha lwonolwo lutamo nga riṋe vhaṋe, fhedzi tshirengululi tsho ita uri zwi konadzee u ita nga u ralo. Bivhili i ri: “Ngauri malamba a tshivhi ndi lufu, fhedzi tshifhiwa tshine ra ṋewa nga Mudzimu ndi u tshila tshoṱhe nga Kristo Yesu Murena washu.”—Vharoma 6:23.

U wana zwine ra zwi shaya. Vhathu a vho ngo kona u ḓirengulula. Bivhili i ri: “A huna tshipfumelelo tsho eḓanaho u rengulula muya wawe; ndi zwiné a zwi litsha tshoṱhe.” (Psalme ya 49:8) Nga zwenezwo, ro vha ri tshi ṱoḓa thuso ya Mudzimu nga maṱo matswuku uri ri kone u vhofhololwa kha tshivhi na u fa. Fhedzi Mudzimu o ri ṋea zwe zwa vha zwi tshi ṱoḓea nga u ri “[vhofholola] nga tshirengululi tsho lifhiwaho nga Kristo Yesu.”—Vharoma 3:23, 24.

Tshifhinga tsho teaho. Bivhili i ri: “Musi ri tshi kha ḓi vha vhaitazwivhi, Kristo o ri fela.” (Vharoma 5:8) Nga nṱhani ha uri tsho ṋekedzwa “ri tshi kha ḓi vha vhaitazwivhi,” tshirengululi tshi ri khwaṱhisedza uri Mudzimu u a ri funa hu sa londwi uri ri na tshivhi. Nahone tshi ita uri ri lavhelele zwithu zwinzhi naho ri tshi fanela u konḓelela masiandoitwa a tshivhi.

Zwiṱuṱuwedzi. Bivhili i sumbedza zwithu zwe zwa ṱuṱuwedza Mudzimu uri a ṋekedze Murwa wawe sa tshirengululi: “Ro dzumbululelwa lufuno lwa Mudzimu nga yeneyi nḓila, ngauri Mudzimu o ruma Murwa wawe mubebwa e eṱhe shangoni uri ri kone u wana vhutshilo ngae. Lufuno lu nga heyi nḓila, a si riṋe vhe ra funa Mudzimu, fhedzi ndi ene we a ri funa.”—1 Yohane 4:9, 10.

Ni nga sumbedza hani uri ni livhuwa tshifhiwa tshihulwanesa tshi fhiraho zwoṱhe? Humbulani uri maipfi a Yesu a re kha Yohane 3:16 a sumbedza uri vhane vha vha na “lutendo khae” vha ḓo tshidzwa. Bivhili i amba uri lutendo ndi “u lavhelela nga ho khwaṱhaho zwe zwa fulufhelwa.” (Vhaheberu 11:1) Ndi zwa ndeme uri ri vhe na nḓivho yo teaho u itela uri ri vhe na yeneyo khwaṱhisedzo. Nga nṱhani ha zwenezwo, ri ni ṱuṱuwedza uri ni ḓiṋee tshifhinga tsha u guda nga ha Yehova Mudzimu ane a vha Muṋei wa tshenetshi tshifhiwa tsho fhelelaho, na u ḓivha zwine na fanela u zwi ita u itela uri ni wane vhutshilo vhu sa fheli, samusi tshirengululi tsha Yesu tsho ita uri zwi konadzee.

Ni nga guda nga ha zwenezwi zwithu zwoṱhe nga u vhala mafhungo o engedzeaho a re Bivhilini a wanalaho kha www.pr2711.com/ve. Ṱhanzi dza Yehova vha ḓo takalela u ni thusa. Ri na vhungoho ha uri musi ni tshi khou guda na u vhuyelwa nga tshenetshi tshifhiwa tshihulwanesa, ni ḓo ṱuṱuwedzea u amba uri: “Ndi livhuha Mudzimu nge a shumisa Yesu Kristo Murena washu!”—Vharoma 7:25.