ṄWAHA wa Vhahevheru vhe vha vha vha tshi dzula Shangoni ḽo Fhulufhedziswaho, wo vha u tshi thoma musi vha tshi lima na u ṱavha mbeu, zwe vha vha vha tshi zwi ita nga ṅwedzi une ṋamusi wa vha wa September kana October.

Vhathu vho vha vha tshi vhalela maḓuvha a ṅwedzi vha tshi shumisa tshifhinga tshine ṅwedzi wa tshi fhedza u tshi khou mona ḽifhasi, zwine zwa vha maḓuvha a 29 kana a 30. Vho dovha vha shumisa na ḓuvha uri vha kone u vhona uri ṅwaha u na miṅwedzi mingana. Fhedzi ṅwaha une wa vhalelwa hu tshi shumiswa ṅwedzi wo vha u tshi vha u mupfufhi kha ṅwaha une wa vhalelwa hu tshi shumiswa ḓuvha. Vho vha vha tshi tea u wana nḓila ya u ita uri dzenedzi nḓila mbili dza u vhalela ṅwaha dzi tshimbidzane. Vho zwi ita nga u engedza maḓuvha kha miṅwedzi kana nga u engedza ṅwedzi woṱhe, khamusi ṅwaha u tevhelaho u sa athu u thoma. Zwenezwi zwo vha zwi tshi ita uri khaḽenda i kone u tshimbidzana na tshifhinga tsha u lima na tsha u kaṋa.

Fhedzi tshifhingani tsha Mushe, Mudzimu o vhudza vhathu vhawe uri ṅwaha wo vha u tshi tea u thoma nga ṅwedzi wa Abibi kana Nisani, une ṋamusi wa vha ṅwedzi wa March kana wa April. (Ek. 12:2; 13:4) Nga wonoyo ṅwedzi ho vha hu tshi itwa vhuṱambo nahone kha honoho vhuṱambo vho vha vha tshi tea u ṋekedza zwiranzhe zwa baḽi kha Yehova.—Ek. 23:15, 16.

Muṅwe mugudi o amba uri: “Zwo vha zwo leluwa u ḓivha uri ndi lini hune ha tea u engedzwa ṅwedzi kha khaḽenda.” O dovha a ri: “Paseka yo vha i tshi tea u pembelelwa nga 14 Nisani musi ṅwedzi wo ḓala nahone yo vha i tshi tea u itwa nga luṱavula nga murahu ha ḓuvha ḽine masiari na vhusiku zwa vha zwi tshi khou lingana . . . Arali Vhayuda vha zwi ṱhogomela ṅwaha u tshi vho ya u fhela uri Paseka i ḓo swika ḽeneḽo ḓuvha ḽa luṱavula ḽi sa athu u swika, vho vha vha tshi engedza ṅwedzi musi ṅwedzi wa Nisani u sa athu u swika.”

Ṱhanzi dza Yehova vha vhalela nga yeneyi nḓila musi vha tshi ṱoḓou ḓivha ḓuvha ḽine Tshilalelo tsha Murena tsha tea u vha ngaḽo. Ḽeneḽo ḓuvha ḽi tea u vha nga luṱavula nahone ḽi tea u tshimbidzana na 14 Nisani kha khaḽenda ya Vhayuda. Musi ḽeneḽo ḓuvha ḽo no ḓivhiwa, ḽi vhudziwa zwivhidzo zwoṱhe shangoni ḽoṱhe hu kha ḓi vha na tshifhinga. *

Fhedzi Vhahevheru vho vha vha tshi zwi ḓivha hani uri ṅwedzi u ḓo fhela lini na uri muṅwe ṅwedzi u ḓo thoma lini? Ṋamusi zwo leluwa ngauri ni nga zwi sedza kha khaḽenda i re kha tshishumiswa tshaṋu tsha elekitironiki kana kha khaḽenda yo tou phirinthiwaho. Fhedzi zwifhingani zwa Bivhili zwo vha zwi songo leluwa nga u tou ralo.

Tshifhingani tsha Maḓi Mahulu, ṅwedzi wo vha u tshi vha u na maḓuvha a 30. (Gen. 7:11, 24; 8:3, 4) Nga murahu, kha khaḽenda ya Vhayuda, miṅwe miṅwedzi yo vha i si tsha vha na maḓuvha a 30. Vhahevheru vho vha vha tshi zwi dzhia uri ṅwedzi u thoma musi hu tshi tou thoma u vhonala ṅwedzi muswa. Ho vha hu tshi vha hu nga murahu ha maḓuvha a 29 kana a 30 a ṅwedzi wo fhiraho.

Nga tshiṅwe tshifhinga, Davida na Yonathani vho ri: “Matshelo ndi vhuṱambo ha ṅwedzi muswa,” zwe zwa vha zwi tshi khou ambela kha u thoma ha ṅwedzi muswa. (1 Sam. 20:5, 18) Zwi vhonala u nga nga tshifhinga tshavho, miṅwedzi yo vha i tshi dzula yo vhalelwa uri i ḓo thoma lini. Fhedzi Muisiraele o vha a tshi zwi ḓivha hani uri ṅwedzi muswa u ḓo thoma lini? Bugu ya Mishnah yo ṅwalwaho milayo na masialala a Tshiyuda i nga ri ṱalutshedza. I sumbedza uri musi Vhayuda vho no vhuya vhuthubwani ngei Babele, Sanihedrini (ine ya vha khothe khulwane ya Vhayuda) yo vha i yone ine ya amba uri ṅwedzi muswa u thoma lini. Kha miṅwedzi ya sumbe ye ha vha hu na vhuṱambo, vhenevho vhanna vha Sanihedrini vho vha vha tshi vha na muṱangano nga ḓuvha ḽa vhu 30 ḽa ṅwedzi. Vhenevho vhanna vho vha vhe na vhuḓifhinduleli ha u amba uri ṅwedzi u tevhelaho u ḓo thoma lini. Vho vha vha tshi zwi ḓivhisa hani?

Ho vha hu na vhanna vhe vha vha vha tshi ima kha zwikwara zwa Yerusalema vhusiku uri vha kone u vhona musi ṅwedzi muswa u tshi bvelela. Musi vha tshi u vhona, vho vha vha tshi ṱavhanya vha vhudza Sanihedrini. Musi vhanna vha Sanihedrini vha tshi vhona hu na vhuṱanzi vhu fushaho ha uri ṅwedzi muswa wo vhoniwa, vho vha vha tshi ḓivhadza uri hu khou thoma ṅwedzi muswa. Fhedzi ho vha hu tshi itea mini arali  hu na makole kana khuli, zwine zwa thivhela vhenevho vhanna uri vha si kone u vhona ṅwedzi muswa? Ṅwedzi we vha vha vhe khawo wo vha u tshi vha na maḓuvha a 30, nga murahu ha zwenezwo ha kona u thoma ṅwedzi muswa.

Hu na vhathu vhe vha vha vha tshi vhasa mulilo nṱha ha Thavha ya Miṱwari i re tsini na Yerusalema u itela u ḓivhadza vhathu uri hu khou thoma ṅwedzi muswa. Ho vha hu tshi dovha ha vhasiwa mililo nṱha ha zwikwara henefho kha ḽa Isiraele ḽoṱhe uri vhathu vha zwi ḓivhe. Nga murahunyana, ho vha hu tshi tou rumelwa vhathu uri vha ambe uri hu khou thoma ṅwedzi muswa. Vhayuda vhoṱhe vha re Yerusalema na huṅwe fhethu, vho vha vha tshi kona u ḓivha uri ṅwedzi muswa wo thoma. Zwo ita uri vhathu vhoṱhe vha pembelele vhuṱambo nga tshifhinga tshithihi.

Tshati i re kha ino thero i nga ni thusa u pfesesa miṅwedzi, vhuṱambo na khalaṅwaha zwi re kha khaḽenda ya Vhayuda.