Vhuporofita 1. Midzinginyo

“Hu ḓo vha na midzinginyo mihulu.”—LUKA 21:11.

● Winnie a re na miṅwedzi ya 16 o bviswa nga fhasi ha zwifhaṱo zwe zwa wa ngei Haiti. Vha mbekanyamushumo ya thelevishini vhe vha hasha muvhigo wa khombo yeneyi vho mu pfa a tshi khou lilela fhasi nga kuipfi ku sa pfali zwavhuḓi. O ponyoka kha mudzinginyo wonoyo fhedzi vhabebi vhawe a vho ngo tshila.

MBUNO DZI SUMBEDZA MINI? Nga January 2010 musi hu tshi vha na mudzinginyo ngei Haiti we tshikalo tsha maanḓa awo tsha swika kha 7.0, ho fa vhathu vha ṱoḓaho u vha 300 000. Vhaṅwe vhathu vha milioni dza 1,3 vho sala vha si tshe na mahaya. Naho mudzinginyo wa ngei Haiti wo vha u muhulwane, a si wone u woṱhe we wa vhuya wa vha hone. Ho vha na miṅwe midzinginyo mihulwane i ṱoḓaho u vha 18 shangoni ḽoṱhe vhukatini ha April 2009 na April 2010.

VHATHU VHA ANZELA U RI MINI? A si uri zwino ho no tou vha na midzinginyo minzhi, fhedzi thekinolodzhi ya musalauno ndi yone ine ya khou ri thusa u kona u vhona minzhi yayo u fhira vhathu vha tshifhingani tsho fhiraho vhe vha vha vha sa koni u i vhona nga nṱhani ha u sa vha na thekinolodzhi.

NAA ZWENEZWO NDI NGOHO? Ṱhogomelani mbuno i tevhelaho: Bivhili a yo ngo amba tshivhalo tsha midzinginyo ine ya ḓo vha hone maḓuvhani a vhufhelo. Naho zwo ralo, yo amba uri hu ḓo vha na “midzinginyo mihulu,” ine ya ḓo itea “afho na afho,” nahone midzinginyo yeneyi ndi tshiṅwe tsha zwiga zwi swayeaho zwine zwa sumbedza uri ri khou tshila tshifhingani tsha ndeme vhukuma kha ḓivhazwakale ya vhathu.—Marko 13:8; Luka 21:11.

NI HUMBULA MINI? Naa ri khou vhona midzinginyo mihulu, sa zwe Bivhili ya dzula yo amba?

Midzinginyo i yoṱhe i nga si ri ṋee vhuṱanzi ho ḓalaho ha uri ri khou tshila maḓuvhani a vhufhelo. Naho zwo ralo, i tou vha fhedzi vhuṅwe ha vhuporofita vhune ha khou ḓadzea zwino. Zwino ri ḓo haseledza nga vhuporofita ha vhuvhili.

[Maipfi o ṱumbulwaho kha siaṱari 4]

“Riṋe [vhaḓivhi vha saintsi ya zwa mupo] ri ri ndi mudzinginyo muhulwane. Fhedzi vhathu nga ho ḓoweleaho vha ri ndi khombo khulwane.”—KEN HUDNUT, US GEOLOGICAL SURVEY.

[Ṱhaluso ya Vhubvo ha Tshifanyiso kha siaṱari 4]

© William Daniels/Panos Pictures