Easter yo ṱaluswa kha Encyclopædia Britannica sa “vhuṱambo vhuhulwane ha kereke ya Vhukriste vhune ha pembelela u Vuswa ha Yesu Kristo.” Naho zwo ralo, naa ndi vhuṱambo ha Vhakriste?

U itela u wana vhungoho ha zwithu zwa kale, ndi zwa ndeme uri ri zwi ṱolisise nga vhuronwane. Nga hu fanaho, u itela uri ri vhone arali Easter i vhuṱambo ha Vhakriste, ndi zwa ndeme uri ri ṱhogomele mafhungo ane a tshimbidzana na Easter.

Tsha u thoma, Yesu o vhudza vhatevheli vhawe uri vha humbule lufu lwawe, hu si u vuswa hawe. Muapostola Paulo o vhidza tshenetsho tshiitea “tshilalelo tsha Murena.”—1 Vhakorinta 11:20; Luka 22:19, 20.

Zwiṅwe hafhu, Britannica yo amba uri vhunzhi ha sialala ḽa Easter “a ḽi ambi na luthihi” nga ha u vuswa ha Yesu, “fhedzi ḽi bva kha mikhuvha ya vhathu.” Sa tsumbo, malugana na zwiga zwo ḓoweleaho zwa kumba na muvhuḓa zwa Easter, The Encyclopedia of Religion i ri: “Kumba ḽi fanyisela vhutshilo vhuswa vhune ha bva kha makanda a kumba ane a imela u fa.” Yo dovha ya ri: “Muvhuḓa wo vha u tshi ḓivhiwa sa tshivhumbiwa tshine tsha beba vhukuma, nahone tshi dovha tsha imela u ḓa ha tshilimo.”

Muphurofesa wa maṅwalwa a kale ane a pfi Philippe Walter, o ṱalutshedza nḓila ye yeneyo mikhuvha ya vha tshipiḓa tsha vhuṱambo ha Easter. O ṅwala uri “musi hu tshi ṱanganyiswa vhurereli ha Vhukriste na mikhuvha ya vhuhedeni,” zwo vha zwi tshi leluwa u ṱanganyisa vhuṱambo ha vhahedeni na u vuswa ha Yesu, yeneyi mikhuvha yo vha i ya u pembelela “u fhela ha vhuriha vhune ha imela u fa nga murahu ha dzhena tshilimo tshine tsha imela vhutshilo.” Walter o dovha a ri, ho vha hu vhukando ha ndeme ha u dzhenisa “vhuṱambo ha Vhakriste” kha khalenda ya vhuhedeni, zwe zwa lelutshela vhathu uri vha vhu pembelele.

Honoho u ṱanganyiswa ha “mikhuvha ya vhuhedeni na Vhukriste,” a ho ngo vha hone musi vhaapostola vha tshi kha ḓi tshila, ngauri vho vha vha tshi “thivhela” vhuhedeni. (2 Vhathesalonika 2:7) Muapostola Paulo o sevha uri musi a “si tsheeho,” vhanna vha ḓo “shanda ngoho u itela u kunga vhafunziwa uri vha vha tevhele.” (Mishumo 20:29, 30) Mafheleloni a ḓanani ḽa u thoma ḽa miṅwaha, muapostola Yohane o ṅwala uri vhaṅwe vhanna vho vha vho no thoma u xedza Vhakriste. (1 Yohane 2:18, 26) Zwenezwi zwo ita uri hu itwe mikhuvha ya vhuhedeni.

Naho zwo ralo, vhaṅwe vha nga vhona u nga u tendela miṅwe mikhuvha ya Easter zwo vha zwi songo khakhea—zwo vha zwi tshi nga ita uri “vhahedeni” vha pfesese khwine zwine u vuswa ha Yesu zwa amba zwone. Naho zwo ralo, Paulo o vha a sa ḓo vhuya a tendelana nazwo. Naho o vhona mikhuvha minzhi ya vhahedeni musi a tshi khou tshimbila Muvhusoni wa Roma, ho ngo shumisa na muthihi u itela uri vhathu vha pfesese khwine nga ha Yesu. Nga hu fanaho, o sevha Vhakriste a ri: “Ni songo ḓikungela dzhogo na vha sa tendiho. Ngauri u luga na vhutshinyi zwi na vhushaka-ḓe? Kana tshedza na swiswi zwi ṱangana’fhi? Yehova u ri: ‘Ibvani vhukati havho, ni ḓifhambanye navho, ni songo fara naho tshi tshini tshi songo kunaho, ndi ḓo ni ṱanganedza.’”—2 Vhakorinta 6:14, 17.

Ndi ifhio mbuyelo ya u ṱolisisa zwidodombedzwa zwi si gathi nga ha Easter? Zwo bviselwa khagala uri Easter a si vhuṱambo ha Vhakriste.