Lufu lwa Yesu ndi tshiitea tsha ndeme vhukuma kha ḓivhazwakale—o fa u itela u vusulusa vhutshilo ha vhathu uri vhu vhe nga nḓila ine ha fanela u vha ngayo. Muthu o vha a songo sikwa e na nḓowelo ya u ita zwivhi, u lwala kana u fa. (Genesi 1:31) Fhedzi tshivhi tsho dzhena shangoni nga munna wa u thoma, Adamu. Yesu o ṋekedza vhutshilo hawe uri a ri tshidze kha tshivhi na lufu.—Vhalani Mateo 20:28; Vharoma 6:23.

Mudzimu o sumbedza lufuno luhulwane nga u rumela Murwa wawe kha ḽifhasi uri a ri fele. (1 Yohane 4:9, 10) Yesu o vhudza vhatevheli vhawe uri vha humbule lufu lwawe nga u ita vhuṱambo ho leluwaho vhu katelaho tshinkwa na waini. U ita zwenezwo ṅwaha muṅwe na muṅwe zwi sumbedza u livhuha hashu lufuno lwe Mudzimu a lu sumbedza a tshi shumisa Yesu.—Vhalani Luka 22:19, 20.

Musi Yesu a tshi thoma u vhudza vhafunziwa vhawe uri vha humbule lufu lwawe, o amba nga ha mulanga kana thendelano. (Mateo 26:26-28) Zwo vha vulela tshilavhelelwa na tshivhalo tsho linganyiselwaho uri vha vhe dzikhosi na vhotshifhe nae ngei ṱaḓulu. Naho vhathu vhanzhi vha tshi humbula lufu lwa Yesu, vhane vha vha kha wonoyo mulanga ndi vhone fhedzi vhane vha ḽa tshinkwa na waini.—Vhalani Nzumbululo 5:10.

Lwa miṅwaha i ṱoḓaho u vha 2 000, Yehova u kha ḓi ṋanga vhane vha ḓo vha dzikhosi. (Luka 12:32) Ndi tshivhalo tshi si gathi musi tshi tshi vhambedzwa na vhane vha ḓo tshila kha ḽifhasi.—Vhalani Nzumbululo 7:4, 9, 17.