MUSI ni tshi vhala yeneyo mibulo mivhili, ndi ufhio une wa ṱalusa mavhonele aṋu? Vhathu vhanzhi vha pfa maipfi a Saulo wa ngei Tariso, ane a dovha a ḓivhiwa sa muapostola Paulo, a tshi khuthadza na u takadza. (Mishumo 17:26, 27) Nahone Bivhili i na vhuṅwe vhuṱanzi vhu fanaho na honovho. Sa tsumbo, thabelo ya Yesu i katela vhuṱanzi ha uri vhatevheli vhawe vha nga ḓivha Mudzimu na u wana phaṱhutshedzo dzawe.—Yohane 17:3.

Naho zwo ralo, vhaḓivhi vha pfunzo dza maṱali vha ngaho Philo vho vha vha sa zwi tendi. Vho amba uri ri nga si vhuye ra ḓivha Mudzimu ngauri ha pfesesei na luthihi. Ngoho ndi ifhio?

Bivhili i amba uri hu na zwithu zwine zwa nga konḓela vhathu u zwi pfesesa nga ha Mudzimu. Sa tsumbo, ri nga si kone u kala kana u eḓanyisa uri Musiki u na tshifhinga tshingafhani e hone, nḓila ine a humbula ngayo na vhuṱali hawe vhuhulwane. Zwi fhira nḓila ine muthu a nga kona u zwi pfesesa ngayo. Naho zwo ralo, eneo masia a u vha hone ha Mudzimu, ha ri thivheli u mu ḓivha. Zwi re zwone ndi uri u elekanya nga ha zwenezwo zwithu zwi nga ri thusa u ‘sendela tsini ha Mudzimu.’ (Yakobo 4:8) Kha ri ṱolisise tsumbo dzi si gathi dza zwenezwo zwithu zwi sa pfesesei. Nga murahu, ri ḓo ṱolisisa masia a Mudzimu a zwithu zwine ra nga kona u zwi pfesesa.

U VHA HONE HA MUDZIMU LINI NA LINI: Bivhili i funza uri Mudzimu u hone “tsha kale na kale na lini na lini.” (Psalme ya 90:2) Nga maṅwe maipfi, Mudzimu ha na mathomo nahone a nga si vhe na magumo. U ya nga kupfesesele kwa vhathu, “vhunzhi ha miṅwaha yawe ndi vhu sá ḓivhei.”—Yobo 36:26.

Nḓila ine na vhuyelwa ngayo: Mudzimu u ni fulufhedzisa uri ni ḓo wana vhutshilo vhu sa fheli arali na mu ḓivha. (Yohane 17:3) Ḽeneḽo fulufhedziso ḽo vha ḽi tshi nga vha hani ḽa ngoho arali Mudzimu a sa tshili lwa tshoṱhe? Ndi “Khosi ya lini na lini” fhedzi ine ya nga ḓadzisa ḽeneḽo fulufhedziso.—1 Timotheo 1:17.

MUHUMBULO WA MUDZIMU: Bivhili i funza uri Mudzimu u na “ṱhalukanyo i sá swikelwi” ngauri ngelekanyo dzawe dzi kule na dzashu. (Yesaya 40:28; 55:9) Nga zwenezwo, Bivhili i vhudzisa mbudziso i sa ṱoḓi phindulo ine ya ri: “Ndi nnyi ane a ḓivha muhumbulo wa Yehova, uri a kone u mu funza?”—1 Vhakorinta 2:16.

Nḓila ine na vhuyelwa ngayo: Mudzimu u a kona u thetshelesa thabelo dza vhathu vhanzhi nga tshifhinga tshithihi. (Psalme ya 65:2) U dovha a ṱhogomela zwiṋoni zwiṱuku zwine zwa wela fhasi. Naa muhumbulo wa Mudzimu u ḓo vhuya wa ḓala, zwa ita uri a si tsha kona u ni ṱhogomela na u thetshelesa thabelo dzaṋu? Na khathihi, ngauri muhumbulo wawe a u ḓali. Zwiṅwe hafhu, khae “ni vha ndeme vhukuma u fhira zwiṋoni zwiṱuku zwinzhi.”—Mateo 10:29, 31.

NḒILA DZA MUDZIMU: Bivhili i funza uri vhathu vha nga si vhuye vha “ṱalukanya mishumo ye Mudzimu a i shuma, u ranga hayo na u vulea hayo.” (Muhuweleli 3:11) Nga zwenezwo, ri nga si vhuye ra ḓivha zwithu zwoṱhe nga ha Mudzimu. “A ri koni u pfesesa” nḓila dza Mudzimu dza vhuṱali. (Vharoma 11:33) Naho zwo ralo, Mudzimu o ḓiimisela u dzumbululela nḓila dzawe vhane vha ṱoḓa u mu thetshelesa.—Amosi 3:7.

Nḓila ine na vhuyelwa ngayo: Arali na vhala na u guda Bivhili, ni nga si vhuye na litsha u guda zwithu zwiswa nga ha Mudzimu na nḓila dzawe. Zwenezwi zwi amba uri ri nga kona u sendela tsini-tsini na Khotsi ashu wa ṱaḓulu lini na lini.

U sa kona hashu u pfesesa maṅwe masia a Mudzimu a zwi ambi uri ri nga si kone u mu ḓivha na luthihi. Bivhili i na mafhungo manzhi ane a ri thusa u ḓivha Mudzimu khwine. Ṱhogomelani dziṅwe tsumbo:

DZINA ḼA MUDZIMU: Bivhili i ri funza uri Mudzimu o ḓiira dzina. O ri: “Ndi Nṋe Yehova, ndi ḽone dzina ḽanga.” Dzina ḽa Mudzimu ḽi wanala Bivhilini lu ṱoḓaho u vha 7 000 u fhira dzina naho ḽi ḽifhio.—Yesaya 42:8.

Nḓila ine na vhuyelwa ngayo: Kha thabelo yawe ya tsumbo, Yesu o ri: “Khotsi ashu wa ṱaḓulu, dzina ḽau nga ḽi itwe ḽikhethwa.” (Mateo 6:9) Naa ni nga shumisa dzina ḽa Mudzimu kha thabelo dzaṋu? Yehova o ḓiimisela u tshidza vhoṱhe vhane vha sumbedza u ṱhonifha dzina ḽawe.—Vharoma 10:13.

HUNE MUDZIMU A DZULA HONE: Bivhili i funza uri hu na ḽifhasi ḽine ra dzula khaḽo na ṱaḓulu hune ha dzula zwivhumbiwa zwa muya. (Yohane 8:23; 1 Vhakorinta 15:44) Bivhilini, kanzhi ipfi “ṱaḓulu” ḽi ambela kha fhethu ha muya. Musiki u ‘dzula ṱaḓulu.’—1 Dzikhosi 8:43.

Nḓila ine na vhuyelwa ngayo: Ni pfesesa Mudzimu nga vhuḓalo. Musiki a si muya u re na maanḓa une wa sokou fhefheḓa hoṱhe-hoṱhe na kha tshiṅwe na tshiṅwe. Yehova u na fhethu hune a dzula hone. Naho  zwo ralo, “a hu na tshivhumbwa tsho dzumbamaho phanḓa hawe.”—Vhaheberu 4:13.

VHUMUTHU HA MUDZIMU: Bivhili i ri vhudza uri Yehova u na pfaneleo dzavhuḓi. “Mudzimu ndi lufuno.” (1 Yohane 4:8) Ha zwifhi. (Tito 1:2) Ha ṱaluli, u na khathutshelo nahone ha fheli mbilu. (Ekisodo 34:6; Mishumo 10:34) Zwi nga mangadza vhathu vhanzhi uri Musiki u ṱoḓa u “pfana” na vhane vha mu ṱhonifha.—Psalme ya 25:14.

Nḓila ine na vhuyelwa ngayo: Ni nga vha khonani ya Yehova. (Yakobo 2:23) Nga zwenezwo, musi ni tshi pfesesa vhumuthu ha Yehova, ni ḓo pfesesa khwine mafhungo a Bivhili.

Bivhili i ri sumbedza zwavhuḓi zwine Yehova Mudzimu a vha zwone. Musiki u ṱoḓa ni tshi mu ḓivha, ha ṱoḓi uri ni sa mu pfesese. Zwi re zwone ndi uri Ipfi ḽawe ḽine ḽa vha Bivhili ḽi fulufhedzisa uri: “U tshi mu ṱoda, u ḓo U dzumbuluwela.” (1 Koronika 28:9) Ndi ngani ni sa ḓiṋei tshifhinga tsha u ḓivha Mudzimu nga u vhala na u elekanya nga ha mafhungo a Bivhili? Arali na ita nga u ralo, Bivhili i fulufhedzisa uri Mudzimu “u ḓo sendela tsini haṋu.”—Yakobo 4:8.

Ni nga ḓivhudzisa uri, ‘Samusi ndi sa koni u pfesesa zwithu zwoṱhe nga ha Musiki, ndi nga kona hani u vha khonani yawe?’ Ṱhogomelani hezwi: Naa khonani ya dokotela wa muaro i fanela u vha i na digirii ya vhudokotela? Na khathihi! Khonani ya dokotela wa muaro i nga vha i na mushumo u sa fani na wawe. Naho zwo ralo, vha nga vha khonani dza tsini. Zwa ndeme vhukuma ndi uri khonani ya dokotela i ḓivha vhumuthu hawe, u katela zwine a zwi takalela na zwine a zwi vhenga. Nga nḓila i fanaho, ni nga guda Bivhilini nga ha uri Yehova ndi muthu wa mufuda-ḓe na u ḓivha zwine na fanela u zwi ita uri ni vhe khonani yawe.

Bivhili i sumbedza zwavhuḓi zwidodombedzwa zwine ra zwi ṱoḓa u itela u ḓivha Mudzimu, hu si u humbulela zwithu zwi si zwone nga ha Musiki. Naa ni nga takalela u ḓivha zwo engedzeaho nga ha Yehova Mudzimu? Ṱhanzi dza Yehova dzi guda Bivhili na vhathu nga mahala. Ri ni ramba uri ni kwamane na Ṱhanzi dzine dza vha hone hune na dzula hone kana ni dalele website yashu ya www.pr2711.com/ve