Hu na zwigwada zwa vhaṱalutshedzeli zwi fhiraho phesenthe dza 60 zwine zwa shuma zwi ofisini dza u ṱalutshedzela (RTO), hu si ofisini dza davhi. Ndi ngani yeneyi nzudzanyo i tshi vhuyedza? Ndi zwishumiswa zwifhio zwine vhaṱalutshedzeli vha zwi ṱoḓa uri vha kone u ita mushumo wavho zwavhuḓi vhe RTO? Fhethu hune vhaṱalutshedzeli vha shuma vhe hone hu kwama hani nḓila ine vha ṱalutshedzela ngayo?

 RTO i ita uri vhaṱalutshedzeli vha vhe fhethu hune vhathu vhanzhi vha amba luambo lune vha khou lu ṱalutshedzela. Karin ane a vha muṱalutshedzeli wa luambo lwa tshi Low German o ri: “U bva tshee ra pfulutshela RTO i re ngei Cuauhtémoc Chihuahua kha ḽa Mexico, ri dzula ri tshi amba tshi Low German ri na vhaṱalutshedzeli nga riṋe, musi ri tsimuni na musi ri mavhengeleni. Ro tangiwa nga vhathu vhane vha amba luambo lwashu. Ri pfa maipfi ane ndi kale ro guma u a pfa nahone ri shumisa luambo lune vhathu vha henefho vha lu shumisa.”

 James ane a vha muṱalutshedzeli wa luambo lwa Tshifrafra ngei Ghana o amba uri nga zwiṅwe zwifhinga u a ṱuvha muṱa wa Bethele. Fhedzi o dovha a ri: “Ndi a zwi funa u shuma RTO. Zwi a ntakadza u huwelela nga luambo lune lwa ambiwa nga vhathu vha henefho na u vhona nḓila ine vhathu vha ṱanganedza ngayo mafhungo maḓifha.”

 Vhahashu vha khetha hani hune RTO ya ḓo vha hone? Joseph ane a shuma kha Muhasho Wa U Fhaṱa Wa Shango Ḽoṱhe u re ngei Warwick New York kha ḽa U.S.A, o ri: “Iṅwe thaidzo ine ra sedzana nayo ndi ya uri huṅwe fhethu hu vha hu si na muḓagasi, maḓi kana inthanethe ine ya ṱoḓea u itela u wana dzifaela dzine ra tea u dzi ṱalutshedzela. Nga zwenezwo, musi ri tshi ṱoḓa fhethu hune RTO ya ḓo vha hone, ri ṱoḓa fhethu ho vhalaho hune ha ambiwa luambo lune lwa khou ṱalutshedzelwa.”

 Arali hu na Holo ya Guvhangano, Holo ya Ṱhanzi dza Yehova kana hune vharumiwa vha dzula hone, ri nga hu shumisa sa RTO ine vhaṱalutshedzeli vha nga ya vha tshi shuma hone. U ita zwenezwo zwo leluwa nahone a zwi ḓuri. Arali hu si na zwenezwo zwifhaṱo, vhahashu vha nga ṋewa thendelo ya uri vha renge zwifhaṱo na ofisi hune vhaṱalutshedzeli vha nga dzula na u shuma vhe hone. Arali zwiimo zwa vhaṱalutshedzeli zwa shanduka, zwenezwi zwifhaṱo zwi nga rengiswa nga hu leluwaho nahone tshelede ya hone ya shumiswa kha zwithu zwa ndeme.

 Nga ṅwaha wa tshumelo wa 2020 ro shumisa R193 256 050 kha dzi RTO. Vhaṱalutshedzeli vhane vha shuma RTO vha ṱoḓa dzikhomphyutha, software dzo khetheaho, zwithu zwa u rekhoda, inthanethe na zwiṅwe zwishumiswa zwa ndeme. Sa tsumbo, khomphyutha yo fhelelaho ine ya shumiswa nga muthu muthihi i nga rengwa nga tshelede i ṱoḓaho u vha R11 149,39. Dzenedzo khomphyutha dzi na software na phurogireme ya Watchtower Translation System ine ya thusa vhaṱalutshedzeli u dzudzanya mushumo wavho na u wana zwithu zwoṱhe zwine vha zwi ṱoḓa zwi tshimbidzanaho na mushumo wavho.

 Vhaṱalutshedzeli vha dovha vha ṋewa zwishumiswa zwa u rekhoda zwine vha zwi shumisa ofisini. Zwenezwo zwishumiswa zwo thusa nga maanḓa musi dziedzi ḽa Corona ḽi tshi thoma. Vhaṱalutshedzeli vhanzhi vho ṱuwa na zwenezwo zwishumiswa mahayani avho nahone vha bvela phanḓa na u rekhoda zwine zwa ḓo ṅwaliwa kha khandiso u katela na dzividio.

 Vhashumi vha u thusa nga u ḓifunela vhane vha dzula tsini na RTO, kanzhi vha thusa nga u vhalulula u katela na u ṱhogomela zwifhaṱo zwa RTO. Cirstin ane a shuma RTO ya luambo lwa Afrikaans ngei Cape Town kha ḽa Afrika Tshipembe, o ri: “Vhahuweleli vhanzhi na vhavulanḓila vha tshifhinga tshoṱhe vha na tshibuli tsha u shumisa vhukoni havho fhano.”

 Vhenevho vhathu vhane vha shuma nga u ḓifunela vha a takalela ndugelo ine vha vha nayo. Muṅwe wahashu wa tshifumakadzini ane a shuma RTO, o amba uri u shuma henefho zwi a “mu homolosa.” Vhaṅwe vhahashu vha henefho vha dovha vha thusa nga u rekhoda. Juana ane a bva ngei Veracruz kha ḽa Mexico ndi muṱalutshedzeli wa luambo lwa Tshitotonac, o ri: “Samusi zwino ri tsini na ḓorobo dzine ha vha na vhathu vhane vha amba luambo lwashu, zwo lelutshela vhahashu vhanzhi uri vha thuse nga u rekhoda khandiso dzine dza thetsheleswa na dzividio.”

 Naa RTO dzo thusa u khwinisa nḓila ine ha ṱalutshedzelwa ngayo? Vhunzhi ha vhavhali vhashu vha amba uri zwo khwinisa. Cédric ane a shuma kha RTO ine ya ṱalutshedzela luambo lwa Tshikongo ngei Democratic Republic of Congo, o ri: “Vhaṅwe vhahashu vho vha vha tshi amba uri ṱhalutshedzelo ya Tshikongo ndi ‘Tshikongo tsha khandiso dza Watch Tower’ ngauri yo vha i sa tshimbidzani na nḓila ine vhathu vha Tshikongo vha amba ngayo. Fhedzi zwino vha amba uri khandiso dzashu dzi ṱalutshedzelwa nga Tshikongo tsha musalauno u tendelana na nḓila ine vhathu vha amba ngayo ḓuvha ḽiṅwe na ḽiṅwe.”

 Wahashu Vho Andile vhane vha shuma RTO ya Tshixhosa ngei Afrika Tshipembe na vhone vho vha na tshenzhelo i fanaho. Vho ri: “Vhunzhi ha vhathu vho ri vhudza uri ho no vha na tshanduko kha nḓila ine ra ṱalutshedzela ngayo. Na vhana vhaṱuku vhe vha vha vha tshi vhala Tshiingamo nga Tshiisimane vha vho tshi vhala nga Tshixhosa. Vha takalela nga maanḓa Bivhili ya Ṱhalutshedzelo Ya Shango Ḽiswa yo vusuluswaho ngauri i a pfala zwavhuḓi.”

 Tshelede ine ya shumiswa u fhaṱa, u ṱhogomela dzi-RTO na vhathu vhane vha shuma hone i bva kha miṋeelo ya u ḓifunela ine ya itwa u mona na shango u katela na ine ya itwa hu tshi shumiswa donate.pr2711.com.